AMUDARYo TUMAN HOKIMI SOBIR XOʻJAMETOV MAHALLA FAOLLARI BILAN UChRAShDI

20-sentyabr kuni Amudaryo tuman hokimi Sobir Xoʻjametov va Qoraqalpogʻiston Respublikasi Joʻqorgʻi Kengesm qoʻmita raisi Sharapat Otemisovlar tumanning Qilichboy, Ayoqchi ovul va mahallarida boʻlib, mahalla faollari, koʻchaboshchilari hamda nuroniy oqsoqollari bilan uchrashdi.

Uchrashuvda tuman hokimi Sobir Xoʻjametov soʻzga chiqib, bugungi kunda olis hududlarni obodonlashtirish ishlari respublika boʻyicha keng miqyosda davom etayotganini taʼkidladi. Prezidentimizning Qoraqalpogʻistonga qaratayotgan eʼtibori natijasida olis va chekka hududlar aholisi uchun ham munosib turmush sharoiti yaratilmoqda. Qilichboy ovuli va uning tarkibidagi mahallalarda ham ijtimoiy infratuzilmani yaxshilash, xususan, aholini ichimlik suvi bilan taʼminlash, yoʻllarga tosh-shagʻal aralashmasini yotqizish, elektr energiyasi taʼminotidagi muammolarni bartaraf qilish borasida tizimli ishlar qilinmoqda.

Shundan soʻng uchrashuv qatnashchilari tuman hokimiga oʻz muammo va takliflari bilan murojaat qildi. Uchrashuvda koʻchaboshchilar, nuroniylar tomonidan turli mazmundagi murojaatlar kelib tushdi. Joyida hal qilish imkoni boʻlgan murojaatlar, taklif va tashabbuslar yuzasidan mahalla ahlining talablari qanoatlantirildi. Atroflicha oʻrganishni taqozo etadigan dolzarb masalalarni hal etish yuzasidan tegishli muassa-tashkilot idoralariga muddatlar belgilanib, topshiriqlar berildi. Murojaat va savollar barobarida uchrashuvda ishtirok etgan nuroniylar tuman hokimiga oʻz takliflarini ham berishdi.

Ayniqsa, xalqning kayfiyatiga toʻgʻridan-toʻgʻri taʼsir qiladigan yoʻl, elektr energiyasi hamda ichimlik suvi taʼminoti boʻyicha bir qator muammolar mavjudligi murojaatlarda alohida qayd etildi. Uchrashuvda bu muammolarni barataraf qilish haqida soʻz bordi va taʼkidlangan muammolar nazoratga olinib, tez orada ularni ijobiy hal qilish boʻyicha tegishli masʼullarga topshiriqlar berildi.

Joʻqorgʻi Kengesning qoʻmita raisi Sharapat Otemisov oʻz soʻzida tumanni har tomonlama rivojlantirish, xalqning turmush farovonligini taʼminlash bilan bogʻliq muammolarga yechim topish yoʻnalishida bugungi kunda amalga oshirilayotgan ishlar xususida alohida taʼkidlab oʻtdi. Amudaryo tumani, ayniqsa Qilichboy ovuli va uning tarkibidagi chekka hududlardagi mahallalardagi muammolar shaxsan Qoraqalpogʻiston Respublikasi Joʻqorgʻi Kengesi Raisining nazoratida ekani, ularni tez fursatlarda bartaraf etish boʻyicha topshiriqlar berilgani va topshiriqlar ijrosi muntazam nazorat qilib borilishi alohida qayd etildi.

Aholi bilan uchrashuv tumanning Ayoqchi mahallasida ham davom etdi. Uchrashuvda qayd qilinganidek, keyingi yillarda davlatimiz rahbari tomonidan qabul qilingan mamlakatimizning ijtimoiy-iqtisodiy rivojlanishining barcha yoʻnalishlarini belgilaydigan Farmon va Qarorlar, ularning faol ijrosi xalqimizning turmush tarzini butunlay oʻzgartirib yubordi. Avvalombor, inson va uning manfaatlarini koʻzlab olib borilayotgan islohotlarning natijasi yurtimizdagi har bir fuqaroning baxtli va farovon turmushi, oʻziga va yurt kelajagiga boʻlgan mustahkam ishonchida koʻrinmoqda.

Uchrashuv davomida mahallalardagi amalga oshirilayotgan obodonlashtirish ishlari, yordamga muhtoj, ehtiyojmand oilalarga yangi uylar qurilayotgani, qishloq mahallalar obod qilinib, yangi qiyofa kasb etayotganligi tumanimiz uchun yaratib berilayotgan imkoniyatlar samarasi ekanligi taʼkidlab oʻtildi.

Qoraqalpogʻiston Respublikasi Joʻqorgʻi Kengesining qoʻmita raisi Sharapat Otemisov bugungi kunda amalga oshirilayotgan ishlar bilan bir qatorda, hozirgi vaqtgacha oʻz javobini kutayotgan muammolar hamda ularni hal qilish boʻyicha amalga oshirilayotgan ishlar haqida maʼlumot berdi.

Shuning bilan birga ovul mahallalarda aholining turmush sharoitini yanada yaxshilash, hududni ijtimoiy-iqtisodiy tarafdan rivojlantirishga qaratilgan tadbirlarning amalga oshirilishi hamda mavjud muammolarning natijali va tez fursatda oʻz yechimini topishini moliyaviy tarafdan taʼminlash maqsadida respublikamizdagi mavjud 452 mahallaning har biriga 500 mln. soʻmdan mablagʻ ajratilgani qayd qilindi. Bu ajratilayotgan mablagʻlar mahalla faollari bilan koʻchaboshchilarning nazoratida mahalla hududida yashovchi fuqarolarning murojaat va takliflari asosida sarflanishi aytib oʻtildi.

Yigʻilish yakunida taklif, murojaatlar boʻyicha masʼullarga tegishli topshiriqlar berildi.

Tuman hokimligi Axborot xizmati