“AYoLLAR DAFTARI” ROʻYXATIDAGI XOTIN-QIZLARGA REABILITATsIYa VOSITALARI TOPShIRILDI

Amudaryo tumanida Oila va xotin-qizlar boʻlimi tomonidan “Ayollar daftari” roʻyxatida turgan nogironligi boʻlgan xotin-qizlarga reabilitatsiya vositalarini topshirishga bagʻishlangan tadbir tashkil etildi.

15-sentyabr kuni Ayollarni reabilitatsiya qilish va moslashtirish tumanlararo markazi binosida boʻlib oʻtgan mazkur tadbirda Qoraqalpogʻiston Respublikasi Oila va xotin-qizlar qoʻmitasi raisi Maryam Ahmedova, Joʻqorgʻi Kenges qoʻmita raisi Sharapat Otemisov, tuman Oila va xotin-qizlar boʻlimi boshligʻi Goʻzal Saburova, Markaz direktori Gavhar Chimbaychiyevalar ishtirok etishdi.

Tadbirda soʻzga chiqqanlar Oila va xotin-qizlarni qoʻllab-quvvatlash davlat maqsadli jamgʻarmasi Prezidentimizning 2021-yil 5-martdagi “Xotin-qizlarni qoʻllab-quvvatlash, ularning jamiyat hayotidagi faol ishtirokini taʼminlash tizimini yanada takomillashtirish chora-tadbirlari toʻgʻrisida”gi Qaroriga muvofiq tashkil etilgani, jamgʻarma oʻz faoliyatini Vazirlar Mahkamasining 2022-yil 4-noyabrdagi “Oila va xotin-qizlarni qoʻllab-quvvatlash davlat maqsadli jamgʻarmasi faoliyatini tashkil etish toʻgʻrisida”gi qarori asosida olib borayotganini taʼkidlab oʻtishdi. Shuningdek, Jamgʻarmaning asosiy maqsadi xotin-qizlarni har tomonlama qoʻllab-quvvatlash, ogʻir ijtimoiy vaziyatga tushib qolgan xotin-qizlarga moddiy yordam koʻrsatish, oilaviy va xususiy tadbirkorlik, hunarmandchilikni tashkil etish, mehnat bozorida talab yuqori boʻlgan kasblar boʻyicha bilim hamda koʻnikmalarni egallashda ularga koʻmaklashish va ragʻbatlantirishdan iboratligini eʼtirof etishdi.

Tadbir davomida Jamgʻarma mablagʻlari hisobidan ehtiyojmand xotin-qizlarga tegishli tartibda reabilitatsiya vositalari ajratilayotgani, bu boradagi amaliy ishlar tizimli yoʻlga qoʻyilgani toʻgʻrisida ham soʻz yuritildi. Shuningdek, hududlarda xotin-qizlarni har tomonlama qoʻllab-quvvatlash, sogʻligʻini saqlash, ayollar sportini rivojlantirish, ularning mehnat va oʻqish sharoitlarini yaxshilash bilan bogʻliq tadbirlarni moliyalashtirishga koʻmaklashilayotgani aytib oʻtildi.

Undan tashqari, bu borada Amudaryo tumanida olib borilayotgan ishlarga ham qisqacha toʻxtalib oʻtilib, 4-bosqich “Ayollar daftari”ga 5398 nafar xotin-qizlar kiritilgani, ulardan 1943 nafarini ijtimoiy himoyaga muhtoj ishsiz, 685 nafarini tadbirkorlik qilish istagini bildirgan, 1183 nafarini boquvchisini yoʻqotgan, 911 nafarini ijtimoiy yordamga muhtoj I va II guruh nogironligi boʻlgan, shuningdek, tezkor tibbiy muolajaga muhtoj, 30 nafari uy-joyga muhtoj xotin-qizlar, 646 nafari qaramogʻida nogironligi bor farzandlari boʻlgan ehtiyojmand xotin-qizlar tashkil qilishi maʼlum qilindi. Oʻtgan davr mobaynida “Ayollar jamgʻarmasi” tomonidan 873 mln. 840 ming soʻm mablagʻ ajratilib, ijtimoiy yordamga muhtoj I va II guruh nogironligi boʻlgan va tezkor tibbiy muolajaga muhtoj 774 nafar xotin-qizlarga BHMning 4 barobari miqdorida bir martalik moddiy yordamlar koʻrsatilgani qayd etildi.

Shundan soʻng, tadbirga tashrif buyurgan masʼullar 4-bosqich “Ayollar daftari”da turgan 24 nafar xotin-qizlarga Oila va xotin-qizlarni qoʻllab-quvvatlash davlat maqsadli jamgʻarmasi tomonidan ajratilgan mablagʻlar hisobidan keltirilgan reablitatsiya vositalarini topshirishdi. Nogironligi boʻlgan ayol-qizlardan 4 nafariga hassa tayoq, 10 nafariga eshitish moslamasi, 10 nafariga nogironlik aravachasi berildi.

Oʻzlariga koʻrsatilgan alohida eʼtibor va gʻamxoʻrlikdan mamnun boʻlgan ayol-qizlar davlatimizga, masʼullarga katta minnatdorchilik bildirishdi.

O.Xudoyberganova