MUSTAQILLIKNING 32 YILLIGIGA MUNOSIB TAYYoRGARLIK KOʻRILMOQDA

Mamlakatimiz oʻzining davlat mustaqilligiga erishgani va mustaqil taraqqiyot yoʻlidan odimlay boshlaganiga 32-yil toʻldi. Bugungi kunda barcha sohalar rivoji yoʻlida bir tan, bir jon boʻlib yashayotgan koʻpmillatli xalqimiz hurriyat bergan beqiyos imkoniyatlarning mohiyatini, qadrini chuqur anglaydi. Inson shaʼni, qadr-qimmati yuksak tutilib, yurtimizning har bir fuqarosi munosib turmush sharoitida yashashiga erishish borasidagi saʼy-harakatlarni yuksak qadrlaydi, aynan mustaqillik tufayli odamlarning yaxshi yashashi, munosib turmush darajasiga erishishi uchun imkon berilganini chuqur his qiladi.

Shu boisdan ham har yili davlatimiz mustaqillikka erishgan qutlugʻ sana – 1-sentyabr yurtimizda  keng tantana qilinadi. Bayram arafasida barcha hududlar obodonlashtirilib, tartibga keltiriladi, istiqlolimizning mazmun-mohiyatini, qadrini, bugungi kunda barcha sohalarda olib borilayotgan islohotlarning ahamiyatini targʻib etuvchi turli maʼnaviy-maʼrifiy  tadbirlar, xalq sayillari, ommaviy koʻngilochar tomoshalar oʻtkaziladi.

Ayni kunlarda tumanimizda ham mustaqillikning 32 yilligini munosib tarzda nishonlash maqsadida izchil saʼy-harakatlar olib borilmoqda.

Qoraqalpogʻiston Respublikasi Vazirlar Kengashining 2023-yil 2-avgust kungi “Oʻzbekiston Respublikasi davlat mustaqilligining oʻttiz ikki yillik bayramiga tayyorgarlik koʻrish va uni oʻtkazish toʻgʻrisida”gi Prezident Qarorining ijrosini taʼminlash maqsadida qabul qilgan Farmoyishi asosida Amudaryo tumani hokimligining maxsus qarori qabul qilindi. Qarorga muvofiq tumanimizda Oʻzbekiston Respublikasi davlat mustaqilligining oʻttiz ikki yillik bayramiga tayyorgarlik koʻrish, uni yuqori saviyada oʻtkazish boʻyicha tuman komissiyasi tarkibi tasdiqlandi va amalga oshiriladigan ishlar rejasi ishlab chiqilib, bu boʻyicha komissiyaning barcha aʼzolariga tegishli topshiriqlar berildi.

Qarorga koʻra, tumanimizda “Mahalladan – xonadongacha” tamoyili asosida “Obodonlashtirish oyligi” oʻtkazilmoqda. Bunda barcha hududlardagi ovul, mahallalar, xonadonlarda keng koʻlamli obodonlashtirish ishlari amalga oshirilmoqda. Yoʻllarni tekislash, daraxtlarga shakl berish, yoʻl boʻylarini tozalash ishlari boshlab yuborildi. Bunday harakatlarda yoshi ulugʻ nuroniylar yoshlarga yoʻl-yoʻriq koʻrsatib, ibrat boʻlishayapti. Hududlardagi obodonlashtirish, koʻkalamzorlashtirish ishlari xonadonlarga ham kirib borishi uchun bayram oldidan “Obod xonadon” dasturi ishlab chiqilib, har bir xonadonning koʻkalamzorlashtirilishi  bilan bir qatorda oilada sogʻlom turmush tarzi barqarorligi, xonadonda istiqomat qiluvchilarning sanitariya-gigiyena qoidalariga amal qilishi, chor-atrofni ozoda, saranjom-sarishta tutishi, shuningdek, suv, elektr energiyasi, tabiiy gazdan tejab-tergab foydalanishiga qarab, namunalilari ragʻbatlantiriladi.

Har bir ovul, mahalla, shaharcha fuqarolar yigʻinlarida “Yangi hayot uchun, Yangi Oʻzbekiston uchun!” degan bosh gʻoyani oʻzida mujassam etgan maʼnaviy-maʼrifiy, targʻibot-tashviqot ishlari yoʻlga qoʻyildi.

Oʻtkazilayotgan tadbirlarda “Har bir kun – bu imkoniyat, har bir kun – bu kelajak uchun poydevor” hayotiy shiorining mohiyati aholiga keng targʻib etilmoqda. Shuningdek, tumanimiz markazida mustaqillikning 32 yilligiga bagʻishlab oʻtkaziladigan ulkan bayram tantanasiga tayyorgarlik boshlanib ketdi. Tuman Madaniyat boʻlimi tomonidan tayyorlangan stsenariy asosidagi teatrlashtirilgan ulkan tomoshada tumanimiz aholisiga mamlakatimizning oʻttiz ikki yil davomida bosib oʻtgan tarixiy yoʻli, barcha sohalarda erishilgan natijalar ifoda etib beriladi va ular dilrabo kuy-qoʻshiqlar tinglab, xalq oʻyinlarini tomosha qilib, madaniy hordiq oladilar.

Yangi Oʻzbekiston tarixidagi qutlugʻ sana – Vatanimiz mustaqilligining oʻttiz ikki yillik bayramini munosib nishonlash maqsadida tumanimizda amalga oshirilayotgan keng qamrovli ishlar aholining ayni kundagi kayfiyatiga juda mos. Boisi mamlakatimizda yangi demokratik davlat, fuqarolik jamiyati barpo etish yoʻlida amalga oshirilayotgan ishlarda, yangilanish, bunyodkorliklarda tumanimiz xalqining ham munosib hissasi bor. Ular taraqqiyot, farovonlik asosi aynan istiqlol ekanligini chuqur anglaydilar va qadrlaydilar. Shuning uchun ham eng ulugʻ, eng aziz bayram – mustaqillik kunini munosib qarshi oladilar.

Oygul RAJABOVA.