“YuKSAK MAʼNAVIYaTLI VA AXLOQLI YoShLAR – KELAJAK POYDEVORI” GRANT LOYIHASI DOIRASIDA “BUVIJONLAR OʻGITI” DAVRA SUHBATI BOʻLIB OʻTDI

Yoshlar – xuddi yangi oʻtqazilgan nihol kabi, agar ularning taʼlim-tarbiyasiga eʼtibor berilmasa, yosh nihol shamolning yoʻnalishiga qarab egilganiday, milliy mentalitetimizga tamoman yot oqimlar taʼsiriga tushib qolishi hech gap emas. Shuning uchun ham mamlakatimizda yoshlarga oid davlat siyosatiga eng ustuvor yoʻnalish sifatida qaraladi. Yoshlar maʼnaviyatini yuksaltirish, ularning kitobxonlikka, kasb-hunar oʻrganishga boʻlgan intilishlarini qoʻllab-quvvatlash, yutuqlarini munosib ragʻbatlantirish orqali yangi marralar sari ruhlantirish maqsadida koʻplab loyihalar amalga oshirilmoqda.

Amudaryo televideniyesining “Jaholatga qarshi – maʼrifat” tamoyili asosida ijtimoiy-maʼnaviy muhitni sogʻlomlashtirish yoʻnalishi boʻyicha “Yuksak maʼnaviyatli va axloqli yoshlar – kelajak poydevori” loyihasini amalga oshirishdan maqsad ham yoshlar maʼnaviyatnini yuksaltirish, ular ongida Vatanga muhabbat, milliy va umuminsoniy qadriyatlarga sadoqat ruhini shakllantirishdan iborat. Shu maqsadda Amudaryo televideniyesi ijodiy jamoasi tomonidan mazkur grant-loyiha doirasida turli tanlovlar, davra suhbatlari, taniqli ijodkorlar bilan uchashuvlar oʻtkazilib, bu tadbirlarga turli yosh toifasidagi yoshlar, nuroniylar ibratli oila sohib va sohibalari keng qamrab olinmoqda.

Loyiha doirasida tumanning “Barkamol avlod” bolalar maktabida tashkil etilgan davra suhbatida ham mahallalarda va taʼlim muassasalarida yosh qizlarni mustaqil hayotga tayyorlash, yosh oilalar oʻrtasidagi ajrashishlarning oldini olish yuzasidan koʻpni koʻrgan onaxonlar va yoshlar oʻzaro fikrlashib oldilar.

Amudaryo televideniyesi, “Barkamol avlod” bolalar maktabi hamda Olmazor mahallasi hamkorligida tashkil etilgan “Buvijonlar oʻgiti” deb nomlangan samimiy davra suhbatida Amudaryo televideniyesi ijodkor-jurnalistlari, “Barkamol avlod” bolalar maktabi masʼullari, maktabning turli toʻgaraklarida tahsil olayotgan oʻquvchi-yoshlar va Olmazor mahallalik nuroniy hoji onaxonlar koʻcha boshchi ayollar ishtirok etdilar.

Tadbirni Olmazor MFY xotin-qizlar faoli Oʻrozgul Yoqubova mazmunli tarzda olib bordi. U, avvalo Olmazor mahalla fuqarolar yigʻini hududida yoshlar maʼnaviyatini yuksaltirish maqsadida amalga oshirilayotgan chora-tadbirlar xususida soʻz yuritib, mahalla hududida jinoyatchilikning keskin kamaygani, aholining ishsiz, ijtimoiy himoyaga muhtoj qatlami tobora kamayib borayotgani haqida qisqacha toʻxtalib oʻtdi.

Shundan soʻng, loyiha koordinatorlaridan biri, jurnalist Robiya Yoʻldosheva “Buvijonlar maktabi” aʼzolarining hayoti, ibratli ishlari oʻsib kelayotgan yosh avlod uchun haqiqiy hayot maktabi ekanligini aytib, bugungi “Onalar oʻgiti” tadbiri har bir yosh uchun juda katta maʼnaviy oziq ulashishini taʼkidladi.

Shuningdek, tadbirda oʻzlarining qimmatli maslahatlari bilan ishtirok etgan “Barkamol avlod” bolalar maktabi direktori, Qoraqalpogʻiston Respublikasida xizmat koʻrsatgan madaniyat xodimi, “Buvijonlar maktabi” aʼzosi Xonimjon Rajabova, Olmazor mahallasi faoli, hoji ona Guliston Ahmedova, koʻcha boshchi onaxonlardan Diloromxon opa Toʻrayev, Amudaryo tuman Tibbiyot birlashmasi shifokori Tamara Saidovalar yosh qizlarni mustaqil hayotga tayyorlash, oilaviy nizolarning oldini olish, ajrashish yoqasiga borib qolgan oilalarning hamjihatligini taʼminlash boʻyicha oʻzaro fikr almashdilar. Shu barobarida yoshlarga qimmatli maslahatlarini berdilar.

Tadbirda oʻzlarini qiziqtirgan masalalar boʻyicha yoshlar ham faol ishtirok etdilar.

Qizgʻin va samimiy, oshkora muloqot tarzida oʻtkazilgan “Onalar oʻgiti” davra suhbati ishtirokchilarda katta taassurotlar qoldirdi.

Tadbir yakunida “Barkamol avlod” bolalar maktabining “Shoʻx bolalar” badiiy havaskorlik jamoasi tomonidan kontsert dasturi namoyish etildi. Havaskor sanʼatkor bolajonlarning chiqishlari tadbir ishtirokchilariga zavq-shavq bagʻishladi.

Robiya Yoʻldosheva.