EL BIRLAShIB, XAYRLI IShNING UDDASIDAN ChIQDI

Muqaddas islom dinimiz taʼlimotiga koʻra, inson vafot etgach, barcha amallari toʻxtaydi. Faqat joriy sadaqadan, elga manfaat keltiradigan ilmdan va uning haqqiga solih farzandlar qiladigan duodan doimo manfaat yetib turaveradi. Bu yerda joriy sadaqa deyilganda musulmonlarga doimiy ravishda foyda berib turadigan xayrli ishlar koʻzda tutilgan. Koʻpchilik foydalanishi uchun koʻprik qurish, quduq, ariq qazib suv keltirish shular jumlasiga kiradi.

Ajdodlarimiz asrlar davomida bajarib kelgan buningdek solih amallarning mazmun-mohiyati, qadri bizning davrimizda ham yuksak tutilmoqda. Yurtdoshlarimiz tashvishlariga yelka tutib, hayoti farovonlashuviga xizmat qilayotgan tanti hamyurtlarimiz koʻp.

Joriy yilning 13-iyulida Mangʻit shahrining Chordara mahallasida bir guruh tadbirkorlar, nuroniylar bamaslahat bir xayrli ishga qoʻl urdilar.

Maʼlumki ushbu mahalla hududida oqar suv necha oʻn yillardan beri muammo boʻlib kelayotgan edi. Hududda yashovchi aholiga ichimlik suvi ham vaqti-vaqti bilangina yetib borardi. Shu bois koʻchalar boʻylarida yashil daraxtlar kam, borlari ham suvsizlikdan rivojlanmay qolgan. Oʻz tomorqasini sugʻorish uchun baʼzilar yer quduqdan foydalansa, baʼzilar oqar suvni kutib yashaydi.

Buningdek, ahvol mahallada istiqomat qiluvchi ichki ishlar faxriysi, ayni kunda tadbirkorlik bilan shugʻullanayotgan Karomaddin Ibodullayevni ham oʻylantirib kelayotgan edi. U hududdagi tadbirkorlar Ozod Qurbonboyev, Jambul Boymurodovlar bilan birga mahalla fuqarolar yigʻini idorasiga borib, muammolarning yechimi boʻyicha oʻz fikrlarini bildirdi.

Yigʻin raisi Tursunboy Serikboyev ham ularni qoʻllab-quvvatlab, kerakli idoralarga murojaat qildi. Qisqa fursatda mahallaga oqar suv olib kelish yoʻli xaritasi, loyiha-smeta hujjatlari tegishli idoralar tomonidan tayyorlab berildi.

Shu tariqa Mangʻitning Durunki mahallasi boʻylab “Yusufxoʻja” fermer xoʻjaligi ekin maydonlariga suv yetkazib berib turgan ariqni 1,5 chaqirimcha uzunlikda qazib, tumanimizning avval “Telman yoʻl” deb nomlanib kelgan ulkan asfalt yoʻlini kesib oʻtib, Chordara mahallasiga oqar suv olib kelish ishlari boshlab yuborildi.

Shu yil 13-iyul kuni ushbu hayrli ishning boshlanishi ulkan tadbir tusini oldi. Tuman Obodonlashtirish boshqarmasining ekskavatori ishni boshlash jarayonida tuman hokimligi masʼullari, mahalla fuqarolar yigʻini raisi, tadbirkorlardan tashqari mahallaning nuroniy keksalari Jumamurot Erimbetov, Qodir Davboyev, Tursunboy Xudoyberganov, Erkin Hayitboyev, Davlatboy Qilichevlar, shuningdek Saʼdulla Matkarimov, Baxtiyor Erkaboyevlar ishtirok etdilar.

Nuroniylar boshlangan ishning xayrli boʻlishini tilab, duoga qoʻl ochdilar. Shu tariqa Chordara mahallasining Nodirabegim, Zebuniso, Zavqiy va boshqa koʻchalariga oqar suv keltirish uchun ariq qazish ishlari boshlanib ketdi. Ariqning ulkan asfalt yoʻlni kesib oʻtuvchi qismiga chidamli truba tashlandi.

Endi Chordara mahallasida istiqomat qiluvchi aholining necha yillik oqar suv orzusi ushaladigan boʻldi.

Yaqin kunlarda ariqqa suv yuboriladi. El birlashib, ushbu xayrli ishning uddasidan chiqdilar. Mahalla aholisi buning uchun begʻaraz yordamini ayamagan 4-sektor, tuman Obodonlashtirish boshqarmasi, mahalla fuqarolar yigʻini masʼullaridan, tadbirkorlardan juda minnatdor boʻlishdi.

Oygul RAJABOVA.