“Yoshlar daftari”ga kiritilgan yoshlarga zarur uskunalar olib berildi

“Temir daftar”, “Ayollar daftari”, “Yoshlar daftari”, “Mehr daftari” deya nomlangan ijtimoiy himoya daftarlari hayotga tatbiq etilishi bilan ehtiyojmand, kam taʼminlangan oilalar, ijtimoiy koʻmakka muhtoj xotin­-qizlar va yoshlar turmush tarzida tub oʻzgarishlar yuz berganiga barchamiz guvohmiz.

Amudaryo tumanida ham yoshlar manfaatini himoya qilish, orzu-umidlari, iqtidor va salohiyatini roʻyobga chiqarish, ularni tadbirkorlikka oʻrgatish, kasbiy malakasini oshirish orqali bandligini taʼminlashga katta eʼtibor qaratib kelinmoqda. Ayniqsa, “Yoshlar daftari”ga kiritilgan yoshlarni manzilli qoʻllab-quvvatlash, ijtimoiy-iqtisodiy koʻmak koʻrsatish maqsadida amalga oshirilayotgan saʼy-harakatlar oʻzining ijobiy natijasini berib kelmoqda.

8-iyul kuni tuman hokimligi binosi oldida “Yoshlar daftari”ga kiritilgan 47 nafar yoshlarga tadbirkorlik faoliyatini boshlash va oʻzini oʻzi band qilishga koʻmaklashish maqsadida kasbiy koʻnikma va malakasiga qarab xarid qilingan asbob-uskunalar tantanali ravishda topshirildi.

Tadbirda tuman hokimi Sultonboy Yoʻldashev, 3-sektor rahbari, tuman Ichki ishlar boʻlimi boshligʻi Jamaladdin Yusupov, tuman hokimi oʻrinbosari Mahmud Shermetov, Kambagʻallikni qisqartirish va bandlik boʻlimi boshligʻi Gʻulomjon Duysenbayev, Yoshlar ishlari agentligi tuman boʻlimi boshligʻi Sardor Ismailovlar ham ishtirok etishdi.

Tuman hokimi Sultonboy Yoʻldashev mamlakatimizda yoshlarni qoʻllab-quvvatlash maqsadida amalga oshirilayotgan islohotlar, ular uchun yaratilayotgan keng imkoniyatlar haqida toʻxtalib oʻtdi. Yoshlarni oʻz ustida koʻproq ishlashi, tanlagan kasbini puxta egallab Vatanimiz koriga yaraydigan munosib farzand boʻlishlari lozimligini taʼkidladi.

3-sektor rahbari – tuman Ichki ishlar boʻlimi boshligʻi Jamaladdin Yusupov oʻz kasbi uchun zaruriy asbob-uskuna egalari boʻlayotgan yoshlarni tabrikladi. Kelajakda ushbu asbsob-uskunalar ularning yaxshi kunlarida xizmat qilishini aytib kelgusidagi ishlariga muvaffaqiyatlar tiladi.

Tuman hokimi oʻrinbosari Mahmud Shermetov mamlakatimizda aholining ijtimoiy himoyaga muhtoj qatlamini qoʻllab-quvvatlash, ularning ish bilan bandligini taʼminlash, yangi ish oʻrinlarini yaratish, ayniqsa, uyushmagan yoshlarning muammolarini hal etish borasida belgilangan chora-tadbir, ustuvor vazifalarga batafsil toʻxtalib oʻtdi.

Kambagʻallikni qisqartirish va bandlik boʻlimi boshligʻi Gʻulomjon Duysenbayev “Yoshlar daftari” roʻyxatiga kiritilgan yoshlar bilan manzilli ishlash boʻyicha erishilayotgan yutuqlar, koʻplab yoshlarning oʻzini-oʻzi band qilish tamoyili asosida ish yuritib, oilasi farovonligiga hissa qoʻshayotganligini eʼtirof etdi.

Tadbirda “Yoshlar daftari” roʻyxatiga kiritilgan yoshlar tuman hokimligi va Yoshlar ishlari agentligi tuman boʻlimiga oʻzlariga koʻrsatilayotgan begʻaraz yordamlar uchun minnatdorlik bildirishib, bundan keyin samarali faoliyat yuritajaklarini va albatta, Vatanimiz taraqqiyoti hamda xalqimiz turmushining yanada farovon boʻlishiga hissa qoʻshishlarini aytib oʻtdilar.

Tuman hokimligining Axborot xizmati.