“MY.GOV.UZ” TIZIMI QULAY VA TEZKOR

Oʻzbekiston Respublikasi Yagona interaktiv davlat xizmatlari portali Internet tarmogʻida Oʻzbekiston Respublikasining Hukumat portali doirasida, shu jumladan, «bir darcha» tamoyilida faoliyat koʻrsatadi. Yagona portal orqali interaktiv davlat xizmatlarini koʻrsatish  Oʻzbekiston Respublikasi Vazirlar Mahkamasining 2017-yil 15-sentyabrdagi "Oʻzbekiston Respublikasi yagona interaktiv davlat xizmatlari portali orqali elektron davlat xizmatlari koʻrsatish tartibini takomillashtirish chora-tadbirlari toʻgʻrisida"gi qarorida keltirilgan Oʻzbekiston Respublikasi Yagona interaktiv davlat xizmatlari portali toʻgʻrisidagi nizomga muvofiq roʻyxatdan oʻtish va avtorizatsiya qilish jarayonlaridan oʻtgan foydalanuvchilar uchun amalga oshiriladi.

Ushbu nizomda Yagona portal maqsad va vazifalari koʻrsatilgan. Yagona portal davlat organlari tomonidan koʻrsatiladigan, shu jumladan pulli asosda koʻrsatiladigan interaktiv davlat xizmatlaridan erkin foydalanishning yagona nuqtasi hisoblanadi.

Foydalanuvchilarga davlat organlariga toʻgʻridan-toʻgʻri murojaat qilish uchun imkoniyat berish Yagona portalning asosiy vazifalaridan biri hisoblanadi. Shuningdek, foydalanuvchilarni axborot-kommunikatsiya texnologiyalari sohasidagi boshqa loyihalar bilan integratsiyalash, foydalanuvchilarning davlat organlari bilan oʻzaro hamkorligi samaradorligini oshirish kabi vazifalar ham amalga oshiriladi. Davlat organlariga murojaat qilinganda foydalanuvchilar uchun byurokratik toʻsiqlarni qisqartirish va ularni bartaraf etish, «Elektron hukumat» tizimini yanada rivojlantirish va davlat boshqaruviga zamonaviy axborot texnologiyalarini joriy etishda koʻmaklashish kabilar ushbu portal vazifalariga kiradi.

Yagona portal zamonaviy axborot texnologiyalaridan foydalanish asosida interaktiv davlat xizmatlari olishda foydalanuvchilarning shart-sharoitlarini rivojlantirish va imkoniyatlarini kengaytirish uchun moʻljallangan.

Yagona portal orqali interaktiv davlat xizmatlaridan foydalaniladi. Yagona portal, foydalanuvchilarga davlat organlari tomonidan koʻrsatiladigan bir tomonlama, ikki tomonlama va tranzaktsion shakldagi interaktiv davlat xizmatlaridan foydalanish imkoniyatini beradi. Interaktiv davlat xizmatlari Yigʻma reyestri 2013-2020-yillarda Oʻzbekiston Respublikasining Milliy axborot-kommunikatsiya texnologiyalarini rivojlantirish kompleks dasturini amalga oshirishni muvofiqlashtirish boʻyicha Respublika komissiyasi tomonidan tasdiqlanadi.

Yigʻma reyestrga kiritilgan interaktiv davlat xizmatlari majburiy tartibda Yagona portal orqali berilishi kerak. Yagona interaktiv davlat xizmatlari portal orqali 424 ta davlat xizmatlari joriy qilindi.

Yagona interaktiv davlat xizmatlari portali orqali jismoniy va yuridik shaxslar davlat xizmatlaridan foydalanishsa davlat xizmati koʻrsatilishi uchun yigʻim summasining 90 foizi undiriladi. Shuningdek, fuqarolar Davlat xizmatlari markazlari orqali koʻrsatilmaydigan davlat xizmatlaridan Yagona interaktiv davlat xizmatlari portal orqali foydalanishlari va oʻzlariga zarur boʻlgan tizimga kiritilgan maʼlumotnomalarni ham olishlari mumkin.

Umida Saparboyeva, tuman Davlat xizmatlari markazi boʻlim boshligʻi.