Fuqaroligi boʻlmagan shaxslarni Oʻzbekiston Respublikasi fuqaroligiga qabul qilishning huquqiy asoslari tushuntirildi

Sayyor qabullar fuqarolarning muammolarini hal qilishning samarali mexanizmi sanaladi. Fuqarolarga qulay shart-sharoitlar yaratish hamda ortiqcha ovoragarchilikning oldini olish maqsadida mahallalarda tashkil etilayotgan sayyor qabullar orqali koʻpgina muammolar imkon qadar ijobiy hal qilinmoqda.

Yaqinda Amudaryo tumanining Qum yop mahallasida Qoraqalpogʻiston Respublikasi Ichki ishlar vazirligi Migratsiya va fuqarolikni rasmiylashtirish boshqarmasi boshligʻi, mayor Baxram Ubbiniyazov, Migratsiya va fuqarolikni rasmiylashtirish boshqarmasi katta inspektori, mayor Azamat Yesnazarov, Amudaryo tumani Ichki ishlar boʻlimi boshligʻining oʻrinbosari, mayor Sharofat Joldasbayev va Amudaryo tumani Ichki ishlar boʻlimi Migratsiya va fuqarolikni rasmiylashtirish boʻlinmasi boshligʻi, kapitan Abdurahmon Umarovlar ishtirokida sayyor qabul tashkil etildi.

Sayyor qabuldan koʻzlangan maqsad − fuqaroligi boʻlmagan shaxslarga Oʻzbekiston Respublikasi fuqaroligini berish uchun kerakli boʻlgan hujjatlarni topshirish tartiblarini tushuntirishdan iborat boʻldi.

Uchrashuvda Amudaryo tumanida doimiy yashovchi jami 332 nafar fuqaroligi boʻlmagan shaxslar boʻlib, shulardan 86 tasi Oʻzbekiston Respublikasi fuqaroligini olish istagini bildirgani aytib oʻtildi.

Qabulda ishtirok etgan ushbu fuqarolarga endilikda Oʻzbekistonda tugʻilgan fuqaroligi boʻlmagan shaxslarga fuqarolik berishda uzluksiz 5-yil yashash sharti talab etilmasligi, bu esa “Oʻzbekiston Respublikasining fuqaroligi toʻgʻrisida”gi Oʻzbekiston Respublikasi qonuniga qoʻshimcha va oʻzgartishlar kiritish haqida”gi qonunda belgilab qoʻyilganligi batafsil tushuntirib oʻtildi.

Oʻzgartirishga koʻra, 2005-yil 1-yanvarga qadar Oʻzbekistonda doimiy yashash joyi boʻyicha roʻyxatga olingan hamda muqaddam chet davlat fuqaroligida boʻlmagan shaxs xohish bildirgan taqdirda, Oʻzbekiston fuqarosi deb tan olinadi.

Shuningdek, ota-onasidan biri Oʻzbekiston fuqarosi deb tan olingan, chet davlat fuqaroligini qabul qilmagan va Oʻzbekistonda yashab kelayotgan bola xohish bildirgan taqdirda, Oʻzbekiston fuqarosi deb tan olinadi.

Undan tashqari, sayyor qabulda mamlakatimizda axborot tizimini jadal rivojlantirish, aholiga davlat xizmatlarini koʻrsatishda zamonaviy axborot-kommunikatsiya texnologiyalaridan keng foydalanish, turli axborot tizimlarida va masofaviy xizmat koʻrsatishda shaxsni identifikatsiyalashning yagona mexanizmini joriy etish maqsadida qabul qilingan Oʻzbekiston Respublikasi Prezidentining “Oʻzbekiston Respublikasida identifikatsiya ID kartalarini joriy qilish chora-tadbirlari toʻgʻrisida”gi qaror haqida batafsil maʼlumotlar berildi.

Sayyor qabul davomida ishtirokchilar oʻzlarini qiziqtirgan savollar bilan murojaat qilib, tegishlicha javoblar olishdi.

Tuman hokimligining Axborot xizmati.