FRONT ORTI MEHNAT FAXRIYLARIGA HURMAT-EHTIROM KOʻRSATILDI

9-may – Xotira va qadrlash kuni yurtimizda keng tantana qilinadi. Ikkinchi jahon urushida halok boʻlgan bobolarimiz jasoratini, matonatini chuqur hurmat bilan esga olamiz, janggohlardan omon qaytib, jismida urush asoratlari bilan yashayotgan sobiq jangchilar xotiralarini tinglab ibrat olamiz. Front ortida mehnat faxriylari tortgan ogʻir mehnat, fidoyiliklarini eshitib, bugungiday baxtiyor kunlarning qadrini chuqurroq anglaymiz.

Tumanimizda istiqomat qiluvchi 36 nafar front orti mehnat faxriylari hudud aholisining doimo hurmat-ehtiromida. Urush yillarida qahatchilik, ogʻir mehnatdan ezilgan faxriylarimiz bugungiday dorilomon kunlarga shukrona aytib yashashmoqda.

Tumanimizda ham mehnat faxriylariga hurmat-ehtirom koʻrsatish borasida koʻpgina chora-tadbirlar amalga oshirildi. Ommaviy axborot vositalarida ular haqida turli materiallar yoritildi, maktab oʻquvchilari, ovul, mahalla fuqarolar yigʻinlari masʼullari uylariga borib, xabar olishib, sovgʻa-salomlar hadya etishdi. Qahramonlar tilidan suronli yillar haqidagi xotiralarini tinglab, Vatanimiz tarixi haqida chuqurroq bilib oldilar.

Sana munosabati bilan har bir front orti mehnat faxriysiga 1 qop un, 2 litr moy, termos hadya  etildi. 6 nafar faxriyga pul mablagʻi topshirildi. Ushbu sovgʻalarni tuman hokimi S.Yoʻldashev, oʻrinbosarlari R.Salayev, G.Soburova,  “Nuroniylar” jamoatchilik Kengashi raisi oʻrinbosari B.Allamberganov, sektorlar rahbarlari,  “Nuroniy” jamgʻarmasi tuman boʻlinmasi raisi A.Qoʻshayev, tuman Mahalla va nuroniylarni qoʻllab-quvvatlash boʻlimi boshligʻi oʻrinbosari B.Boltaboyev faxriylarning uylariga birma-bir borib, tantanali suratda topshirdilar.

Nuroniy yoshga yetgan otaxon, onaxonlar oʻzlariga koʻrsatilayotgan buningdek hurmat-eʼtibordan koʻngillari yuksalib, chuqur minnatdorchilik bildirdilar. Yurtimizda tinchlik, osudalik barqaror boʻlishini tiladilar.