“Mahalla” xayriya jamoat fondi Amudaryo tuman boʻlinmasining “Obod mahallam” nomli grant loyihasi doirasida Qangli ovulida tadbir oʻtkazildi

Qoraqalpogʻiston Respublikasi Joʻqorgʻi Kengesi huzuridagi NNTlar va fuqarolik jamiyatining boshqa institutlarini qoʻllab-quvvatlash jamoat fondi tomonidan “Mahallalarda obodlikni taʼminlash, aholi oʻrtasida sogʻlom turmush tarzini targʻib qilish, aholining tibbiy va ekologik madaniyatini oshirish” mavzusida eʼlon qilingan 5-grant tanlovida Oʻzbekiston “Mahalla” xayriya jamoat fondi Qoraqalpogʻiston Respublikasi Amudaryo tuman boʻlinmasi “Obod mahallam” nomli loyihasi bilan ishtirok etib, 40,0 mln. soʻm grant mablagʻini yutib oldi.

Oʻzbekiston “Mahalla” xayriya jamoat fondi Amudaryo tuman boʻlinmasining ushbu loyihani amalga oshirishdagi asosiy maqsadi – atrof muhitni muhofaza qilish va tabiiy resurslardan oqilona foydalanish sohasidagi qonun hujjatlari talablari buzilishining oldini olish, uni aniqlash va unga chek qoʻyishga, tabiatni muhofaza qilish faoliyati samaradorligini oshirishga hissa qoʻshish maqsadida qonun hujjatlariga muvofiq fuqarolarning oʻzini oʻzi boshqarish organlari, nodavlat notijorat tashkilotlari va fuqarolar bilan hamkorlikda jamoatchilik ekologik nazoratini amalga oshirish, aholining ekologiyaga oid bilimlarini kengaytirish maqsadida uchrashuvlar, davra suhbatlari, tanlovlar tashkil qilish, hududlarni obodonlashtirish va koʻkalamzorlashtirish, atrof-muhit muhofazasiga hissa qoʻshishdan iborat.

Oʻzbekiston “Mahalla” xayriya jamoat fondi Amudaryo tuman boʻlinmasining “Obod mahallam” nomli grant loyihasi ish rejasi 2022-yilning dekabr oyidan 2023-yilning dekabr oyigacha 12 oyga moʻljallangan. Joriy yil mart oyi uchun belgilanagan ish rejasiga muvofiq Qangli fuqarolar yigʻinida tumanning Qipchoq hududidagi ovul va mahalla fuqarolar yigʻinlari ishtirokida fuqarolarning oʻzini oʻzi boshqarish organlari tomonidan atrof muhitni muhofaza qilish, hududning sanitariya holati, uni obodonlashtirish hamda koʻkalamzorlashtirish masalalari yuzasidan oʻz vakolati doirasida tegishli hududda joylashgan korxonalar, muassasalar va tashkilotlar rahbarlarining hisobotlarini eshitishga bagʻishlangan namunaviy yigʻilishi oʻtkazildi. Yigʻilishda Qilichboy hududidagi ovul va mahalla fuqarolar yigʻinlari raislari va Qangli ovuli mahallakomlari hamda faollaridan jami 47 nafari qatnashdi.

Yigʻilishda mahalla raisi, hokim yordamchisi, yoshlar yetakchisi, Qangli QVP mudiri va 29-67-sonli umumtaʼlim maktabi direktorlarining 2023-yilning I choragi davomida atrof muhitni muhofaza qilish, hududning sanitariya holati, uni obodonlashtirish hamda koʻkalamzorlashtirish masalalari yuzasidan amalga oshirgan ishlari boʻyicha hisobotlari tinglandi.

Shuningdek, atrof muhitni muhofaza qilish va tabiiy resurslardan oqilona foydalanish sohasidagi qonun hujjatlari talablarini aholining keng qatlamiga tushuntirish maqsadida “Mahalla” xayriya jamoat fondi Amudaryo tuman boʻlinmasi mutaxassisi X.Sultanov, Amudaryo tumani Mahalla va nuroniylarni qoʻllab-quvvatlash boʻlimi yetakchi mutaxassisi B.Turabayevlar qatnashib, mavzu boʻyicha maʼruza qildilar hamda masalaga oid tarqatma materiallar tarqatildi.