KORRUPTsIYaGA QARShI KURAShISh – DOLZARB VAZIFA

Dunyo miqyosida insoniyatning azaliy muammolaridan biri bu – korruptsiya. Chunki ushbu illat har qanday mamlakatning iqtisodiy, ijtimoiy va siyosiy sohalariga salbiy taʼsir koʻrsatadi.

Oʻzbekiston Respublikasida bu boradagi  islohotlarning samarali amalga oshishiga zamin yaratuvchi va korruptsiyaga qarshi kurashish mexanizmlarini oʻzida aks ettirgan Qonunchilik palatasi tomonidan 2016-yil 24-noyabrda qabul qilingan, Senat tomonidan 2016-yil 13-dekabrda maʼqullangan va Prezident 2017-yil 3-yanvar kuni imzolagan “Korruptsiyaga qarshi kurashish toʻgʻrisida” Qonun amalga kiritildi. Mazkur qonun 34 moddadan iborat boʻlib, korruptsiyaga qarshi kurashish sohasidagi munosabatlarni tartibga solishdan iborat. Qonunda korruptsiya, korruptsiyaga oid huquqbuzarlik va manfaatlar toʻqnashuvi kabi yangi tushunchalar kiritilgan.

Korruptsiyaga qarshi kurashish sohasidagi davlat siyosatining asosiy yoʻnalishlari sifatida aholining huquqiy ongi va huquqiy madaniyatini yuksaltirish, jamiyatda korruptsiyaga nisbatan murosasiz munosabatni shakllantirish, davlat va jamiyat hayotining barcha sohalarida korruptsiyaning oldini olishga doir chora-tadbirlarni amalga oshirish, korruptsiyaga oid huquqbuzarliklarni oʻz vaqtida aniqlash, ularga chek qoʻyish, ularning oqibatlarini, ularga imkon beruvchi sabablar va shart-sharoitlarni bartaraf etish, korruptsiyaga oid huquqbuzarliklarni sodir etganlik uchun javobgarlikning muqarrarligi printsipini taʼminlash masalalari oʻz aksini topgan.

Yana bir muhim jihatlaridan biri sifatida aytish mumkinki, Qonunning 28-moddasida korruptsiyaga oid huquqbuzarliklar toʻgʻrisida axborot berayotgan shaxslar davlat himoyasida boʻlishi belgilangan.

Taʼkidlash joizki, korruptsiyaga qarshi kurashish – dolzarb vazifa sanaladi. Shu sababli korruptsiya kelib chiqishiga yoʻl qoʻymaslik, qonunlarning oʻz vaqtida ijro etilishini taʼminlash, uni keltirib chiqaruvchi holatlarning oldin olish choralarini koʻrish kabilar davlat organlari masʼullari bilan birgalikda fuqarolarning ham vazifasi boʻlishi kerak. Shundagina jamiyat rivojiga salbiy taʼsir koʻrsatuvchi ushbu illatni tag-tomiri bilan yoʻqotishga erishamiz.

Q.Atamuradov, Fuqarolik ishlari boʻyicha Amudaryo tumani sudi raisi.