Tuman hokimligining Axborot xizmati tomonidan press-tur tashkil etildi

Tuman hokimligining Axborot xizmati tomonidan tumandagi maktabgacha taʼlim tashkilotlarida yosh avlod tarbiyasi borasidagi ishlarni oʻrganish maqsadida press-tur tashkil etildi. Unda tuman hokimligining Axborot xizmati rahbari Fotima Eshimbetova, Amudaryo televideniyesi muxbiri Aziza Madrahimova, foto muhbir Mahmudjon Shamurodov, tuman Sanitariya-epidemiologik osoyishtalik va jamoat salomatligi boʻlimi xodimlari ishtirok etishdi.

Press-tur doirasida 43-sonli davlat maktabgacha taʼlim tashkilotiga sayohat uyushtirildi. Taʼlim tashkiloti mudirasi Manzura Jumaniyozova tashkilot haqida batafsil maʼlumotlar berib oʻtdi. Bugungi kunda 194 nafar tarbiyalanuvchi qamrab olingan ushbu tashkilot 1992-yilda oʻz ish faoliyatini boshlagan boʻlib vaqtlar oʻtishi bilan taʼmirtalab ahvolga kelib qolgan edi. 2015-yilda muassasada joriy taʼmirlash ishlari olib borildi. Hamda bu orqali muassasaning moddiy texnik bazasi ancha yaxshilandi.

2008-yildan buyon mudira sifatida ishlab kelayotgan Manzura Jumaniyozova bolalar bilan ishlash unga alohida zavq bagʻishlashini, bolalarsiz hayotini tasavvur qila olmasligini faxr bilan tilga oldi.

Mehmonlar muassasadagi ahvolni toʻliq oʻrganishdi. Bolalarning tajribali pedagoglardan taʼlim olayotganiga, ular uchun tashkil etilayotgan oʻquv mashqlari yoshiga va dunyoqarashiga toʻla mos kelishiga guvoh boʻlishdi. Shuningdek, tarbiyalanuvchilarning shaxsiy gigiyena vositalari bilan toʻliq taʼminlangani va ularning ozodalik qoidalariga rioya qilingan holda saqlanishi tekshirildi. Undan tashqari bolalarning yotoq joylari, tartibi va ozodaligi koʻzdan kechirildi.

Jurnalistlar, tarbiyalanuvchilarning sogʻligi, tibbiy holati doimo nazorat ostida boʻlishi kerakligi, ularga berilayotgan oziq-ovqat mahsulotlari laboratoriya tekshiruvlaridan oʻtkazilgandan keyingina ishlatilishi lozimligi taʼkidlandi. Press-tur davomida oshxona jihozlarining ozodalagi, kundalik ishlatiluvchi buyumlaring yaroqlilik holatlari oʻrganildi. Shuningdek, qatnashchilar bolalar uchun har kuni tushlik paytida tayyorlanuvchi taomlar roʻyhati bilan qiziqishdi. Bolalar uchun tayyorlanayotgan taomlar vitamin va oqsillarga boy ekanligiga, sifatli va toza oziq-ovqat mahsulotlari ishlatilayotganligiga guvoh boʻlishdi.

Press-tur doirasida maktabgacha taʼlim tashkiloti mudirasi Manzura Jumaniyozova jurnalistlar tomonidan berilgan barcha savollarga javob berdi.

Shu oʻrinda aytish kerakki, farzandlarimizning oʻsib-unib kamolga yetishida oila, boqcha, maktab jipsligini taʼminlash muhim ahamiyat kasb etadi. Maktab ostonasiga qadam qoʻyish uchun endi tayyorgarlik koʻrayotgan bolalarga qanchalik chuqur bilim va yaxshi tarbiya berilsa u maktabda ham davom etadi, rivojlanadi.

Tuman hokimligining Axborot xizmati tomonidan tashkil etilayotgan bu kabi tadbirlar jurnalistlar va ota-onalarni qiziqtirgan koʻplab savollariga javob olishida muhim ahamiyat kasb etadi.

Tuman hokimligining Axborot xizmati.