TOʻLQIN OVULIDA NAVROʻZI TANTANALARI NIShONLANDI

Xalqimiz tarixi va madaniyatining uzviy qismi boʻlgan Navroʻzi olam shodiyonalari har bir yurtdoshimizga koʻtarinki kayfiyat, yashashga ishtiyoq baxsh etadi. Ushbu bayramning necha-necha asrlar silsilasidan oʻtib, bizgacha yetib kelgani, tobora yangi maʼno-mazmun bilan boyib borayotgani bejiz emas. Axir Navroʻz tinchlik, totuvlik, bagʻrikenglik, mehr-oqibat timsoli, kishilarni birdamlikka, hamjihatlikka, mehnatsevarlikka chorlaydigan, ajdodlarimizdan meros boʻlib kelayotgan qadim anʼanalarimiz, urf-odatlarimiz, qadriyatlarimiz yaqqol namoyon boʻladigan qutlugʻ kun.

Sana munosabati bilan Toʻlqin ovulining Agronom aholi punktida 32-sonli maktab oʻqituvchilar jamoasi va hudud aholisi bilan birgalikda “Har kuning Navroʻz boʻlsin, jonajon Oʻzbekistonim!” shiori ostida oʻtkazilgan “Xush kelding, Navroʻz!” deb nomlangan bayram tadbirida ham ushbu kun mazmun-mohiyati teran ochib berildi.

Tadbirga maktab oʻqituvchilari, oʻquvchilari, hudud aholisi, 23-sonli davlat maktabgacha taʼlim tashkiloti xodimlari va tarbiyalanuvchilari ishtirok etdilar.

Tantanani 32-sonli maktab faxriy oʻqituvchisi Toʻliboy Yoʻldoshev ochdi va barchani Navroʻz bayrami bilan qutladi. Ovul xotin-qizlar faoli Gavhar Bobotoyeva, hudud profilaktika inspektori Ravshanbek Qalandarov, taʼlim faxriysi Dilorom Qurbonova, Gulchehra Arabovalar tabrigidan soʻng teatrlashtirilgan bayram tomoshasi boshlandi. Davraga boshiga gulchambar taqqan Navroʻzoyning tashrifini barcha qarsaklar bilan olqishlab qarshi olishdi.

Toʻkin dasturxon atrofidan joy olgan mahalla nuroniylari, faollari, taʼlim fidoyilari va yoshlar Navroʻzi olamni yurtimiz tinchligi, obodligi, inson qadri ulugʻlangan sheʼrlar, qoʻshiqlar, raqslarni miriqib tomosha qildilar. 23-sonli davlat maktabgacha taʼlim tashkiloti tarbiyalanuvchilari ijrosidagi badiiy chiqishlar ham barchaga bahoriy kayfiyat bagʻishladi.

Maktab, hudud badiiy havaskorlari birgalikda tayyorlagan teatrlashtirilgan bayram tomoshasidan soʻng navbat azal-azaldan Navroʻz tantanalaridan munosib oʻrin egallab kelayotgan xalq oʻyinlariga berildi. Sportchilarning tantanali chiqishlaridan soʻng tosh koʻtarish, arqon tortishish, musobaqalari oʻtkazildi. Nihoyat bolajonlar orziqib kutgan soniyalar keldi. Ular varrak uchirish musobaqasini boshladilar.

Bolajonlar har koʻklamda oʻynab maza qiladigan bu oʻyinda varrakning eng yuqoriga koʻtarilishi uchun ham epchillik kerak. Barchaga xush kayfiyat ulashgan xalq oʻyinlari gʻoliblari munosib taqdirlandi. “Assalom, Navroʻz” yozuvi aks etgan bugʻdoy maysalari ham goʻyo bayramni olqishlab mayin tebrandi.

Hudud fermerlari homiyligida oʻtkazildan Navroʻz tantanalari barchada oʻchmas taassurotlar qoldirdi.

Sevara ISMOILOVA.