ALIMENT MAJBURIYaTLARI IJROSI YaGONA AXBOROT TIZIMI ORQALI AMALGA OShIRILMOQDA

Majburiy ijro byurosi tuman boʻlimida jami 1008 ta voyaga yetmagan farzandlar taʼminoti uchun aliment undirish bilan bogʻliq ijro hujjati mavjud. Shundan 394 nafar qarzdor Oʻzbekiston Respublikasidagi oʻrtacha oylik ish haqi miqdoridan aliment pullarini toʻlaydi. Qolgan 614 nafar qarzdordan aliment pullari Oʻzbekiston Respublikasi “Sud hujjatlari va boshqa organlar hujjatlarini ijro etish toʻgʻrisida”gi Qonunining 64-moddasiga muvofiq, ish haqlaridan undirib kelinmoqda.

Aliment qarzdorligi 5 mln.dan ortiq boʻlgan qarzdorlarga nisbatan Oʻzbekiston Respublikasi MJtKning tegishli moddasiga koʻra ish ochilib, koʻrib chiqish uchun Jinoyat ishlari boʻyicha Amudaryo tuman sudiga oʻtkazilib, koʻrib chiqilmoqda.

Prezidentimizning 2020-yil 24-noyabrdagi 6118-son Farmoniga muvofiq, 2021-yil 1-martdan boshlab, ijro hujjatlari boʻyicha aliment majburiyatlarini bajarish qarzdorlar tomonidan Aliment majburiyatlarini ijro etish va nazorat qilishning yagona axborot tizimi orqali amalga oshirilishi koʻzda tutilgan edi. Shunga koʻra Byuro tomonidan Yagona axborot tizimida aliment majburiyatlari boʻyicha alohida bank hisobvaragʻini ochish, ijro hujjatlari boʻyicha undiruvchi, yaʼni aliment oluvchi nomiga tegishli bank kartasini rasmiylashtirish kabi aliment majburiyatlarini bajarishning yangi tartibini joriy etish choralari koʻrildi. Qarzdorlarning Oʻzbekiston Respublikasidan chiqishiga taʼqiq qoʻyish va chiqqanlarni qidirish yuzasidan barcha zaruriy choralar belgilandi.

MIB tuman boʻlimi tomonidan qonunchilikda belgilangan muddat mobaynida qarzdorlikni toʻliq toʻlamaganlarga nisbatan mol-mulklarini xatlash, realizatsiya qilish ishlari olib borilmoqda. Shuningdek, mehnat yarmarkalarini tashkillashtirish orqali aliment toʻlovchilar bandligini taʼminlash va ajrashgan oilalarni yarashtirish kabi choralarni qoʻllash orqali ham muammolar hal etilib kelinmoqda.

U.AShIRBOYeVA,

MIB tuman boʻlimi davlat ijrochisi, 2-darajali yurist.