DXX chegara qoʻshinlari xodimlari ishtirokida “Vatanni sevmoq – iymondandir!” shiori ostida maʼnaviy-maʼrifiy uchrashuv oʻtkazildi

Ona Vatanni sevish, uning sarhadlari daxlsizligini saqlash – bu shunchaki oddiy tushunchalar emas, balki insonning qoniga, jism-u joniga tutash eng buyuk tuygʻudir. Vatan sevgisi shuning uchun ham buyukki, ana shu muqaddas zaminda tugʻilib-oʻsganimiz, qalblarimizni gupirtirgan ezgu orzularimizni emin-erkin amalga oshirishga intilib va bundan zavqlanib yashashga musharraf boʻlganimiz, osuda tonglarimizning, tinchligimizning bardavomligidan! Ona Yurtga boʻlgan muhabbat tuygʻusi bilan yashash esa inson uchun bebaho qadriyat. Shuning uchun ham Vatanni sevish – iymondandir, degan bemisl ulugʻ tushuncha har bir insonga quvvat bagʻishlaydi.

Joriy yilning 25-yanvar sanasida Amudaryo tumani hududidagi Davlat xavfsizlik xizmati chegara qoʻshinlari harbiy zobitlari, muddatli harbiy xizmat burchini ado etayotgan askarlar, tumanning Qilichboy mavzesidagi umumtaʼlim maktablari oʻquvchilari, hududda istiqomat qiluvchi yoshlar hamda sobiq afgʻon urushi jangchilari ishtirokida “Vatanni sevmoq – iymondandir” shiori ostida maʼnaviy-maʼrifiy uchrashuv oʻtkazildi. Tadbirda Vatanparvarlik, tinchlik va bagʻrikenglik, oʻzaro mehr-oqibat, millatlararo totuvlik tuygʻularining buyukligi, xalqlar, millatlar va davlatlar oʻrtasidagi doʻstlik, tenglik, tinchlik tamoyillarining barqarorligini taʼminlashdagi ahamiyati haqida soʻz yuritildi.

Maʼnaviy-maʼrifiy tadbirni Davlat xavfsizlik xizmati chegara qoʻshinlari zobiti, podpolkovnik Sanjar Toshmatov harbiy vatanparvarlik, tinchlik va totuvlik, millatlar va davlatlar doʻstligini ulugʻlovchi daʼvatkor maʼruza bilan ochdi hamda yoshlar qalbiga koʻtarinki ruh bagʻishlovchi soʻzlari bilan tadbir ishtirokchilarini faollikka undadi.

Harbiy sohada tajribali zobit, podpolkovnik Sanjar Toshmatov ona Vatanni himoya qilishdek eng masʼuliyatli va sharafli kasb egalari boʻlgan harbiylar, Davlat xavfsizlik xizmati chegara qoʻshinlari saflarida oʻzlarining yigitlik burchlarini matonat bilan ado etayotgan askarlarning Vatan sarhadlarini himoya qilish borasidagi fidoyiliklari xususida yoshlarga soʻzlab berdi.

Uchrashuv tadbirida harbiy zobitlar – 1-darajali kapitan Hoshimjon Toshpoʻlatov, serjant Otabek Mahmudovlar yoshlarga oʻzlari faoliyat olib borayotgan harbiy qism tomonidan amalga oshirilayotgan ishlar, zamonaviy harbiy texnikalar, qurol-aslahalar haqida soʻzlab berishdi.

Shu bilan birga, kelajakda harbiy sohada xizmat qilishni xohlovchi yoshlar uchun mamlakatimizdagi oliy harbiy Akademiya, maxsus harbiy bilim yurtlari, “Temurbeklar maktabi” va ushbu harbiy oʻquv yurtlariga hujjat topshirish qoidalari, jismoniy yetuklik va nazariy bilimlar boʻyicha sinovlar tartib-qoidalari xususida zarur tushunchalar hamda maʼlumotlar berdilar.

Shundan soʻng, uchrashuv tadbiriga taklif etilgan sobiq afgʻon urushi ishtirokchilari A.Abdurahmonov, B.Jumaniyozov, X.Saparboyev, S.Xoʻrozov, O.Xoʻjaniyozov, R.Xoʻrozovlar bugungi tinch va osoyishta hayot, farovon turmushning qadriga yetish har bir insonning zimmasidagi burchi ekanligini taʼkidladilar. Shu bilan birga, tinchlik va taraqqiyot hokim boʻlgan mustaqil Vatanda harbiy xizmat burchini oʻtash bugungi yoshlar uchun chin maʼnodagi baxt ekanligini havas bilan eʼtirof etdilar.

Tadbir davomida yoshlar sobiq afgʻonchi-jangchilarga oʻzlarini qiziqtirgan savollar bilan murojaat qildilar va barcha savollariga batafsil javoblar oldilar. Uchrashuv tadbiri Davlat xavfsizlik xizmati chegara qoʻshinlarining kazarmasida davom ettirilib, bu yerda yoshlar harbiy zobitlar va askarlar uchun yaratilgan sharoitlar va imkoniyatlar bilan yaqindan tanishdilar.

Uchrashuv tadbirida Nukus harbiy prokuraturasi xodimi, katta leytenant Azizjon Karimov ishtirok etdi va Qilichboy mavzesidagi umumtaʼlim maktablarining yuqori sinf oʻquvchilari bilan samimiy muloqotda boʻlib, Oʻzbekiston Respublikasi sarhadlari daxlsizligini taʼminlashga qaratilgan qonuniy asoslar xususida soʻzlab berdi.

Uchrashuv yakunida sobiq afgʻon urushi ishtirokchilariga sovgʻalar berildi.

Boʻlib oʻtgan mazkur uchrashuv yoshlar qalbida “Vatanni sevmoq – iymondandir” degan ezgu gʻoyani yanada mustahkamladi.

Robiya Yoʻldosheva.