NURONIYLARNING HAYoTIY TAJRIBALARI YoShLAR UChUN IBRAT MAKTABI BOʻLMOQDA

Xalqimizda azaldan yoshi ulugʻ, keksa otaxon va onaxonlarga ehtirom koʻrsatilib, ularning umri davomidagi ezgu ish va amallaridan ibrat olinadi. Zero, yillar davomida eliga xizmat qilgan, endilikda boy mehnat tajribasi, hayotiy hikmatlari, purmaʼno soʻzlari bilan jamiyat taraqqiyotiga hissa qoʻshayotgan nuroniylarning pand-nasihatlari ertangi kunga poydevor desak, aslo mubolagʻa boʻlmaydi. Darhaqiqat, har bir yurtning taraqqiyoti, avvalo, ana shu hududda yashovchi aholining bilimi, tajribasi, tarbiyasi va maʼnaviy yuksakligiga bogʻliq. Yoshlar tarbiyasida keksalarning boy hayotiy tajribalaridan keng foydalanish muhim ahamiyatga ega.

Oq oltin ovulida ham fuqarolar yigʻini xotin-qizlar faoli Mohira Yakubova hamda tuman Mahalla va nuroniylarni qoʻllab-quvvatlash boʻlimi qoshidagi “Buvijonlar maktabi” jamoatchilik kengashi raisi Xonimjon Rajabova tashabbusi bilan “Buvijonim kiygan liboslar”, “Zamonaviy oʻzbek qizining koʻrki – uzun soch va milliy libos”, “Mustahkam oila jamiyat koʻrki” mavzularidagi davra suhbatlari, maʼnaviy-maʼrifiy tadbirlar tashkil etilib, oʻsmir qizlar, yosh oila sohibalari, kelinlarning tushunchalari, dunyoqarashlari kengaytirilmoqda. Hududda muammoli oilalarni aniqlab, ulardagi oilaviy kelishmovchiliklarni, qaynona-kelin, kelin-kuyovlar, shuningdek, qoʻni-qoʻshnilar oʻrtasidagi muammolarni bartaraf etishga qaratilgan tadbirlar muntazam oʻtkazib kelinayotgani, targʻibot-tashviqot ishlariga 85 yoshli Ollambergan ota Rajabov hamda 82 yoshli Tursunoy momo Rajabova kabi ovuldagi nuroniylar jalb etilayotgani, ularning oʻgit-nasihatlariga amal qilinib kelinayotgani natijasida deyarli barcha xonadonlarda tinchlik, totuvlik hukmron. Oʻtgan yil mobaynida fuqarolar yigʻini hududida oilaviy ajrimlarning oldi olinib, birorta ham bunday holat qayd etilmadi.

Hayot yoʻli yoshlar uchun ibrat maktabiga aylangan, yarim asrdan ziyod umrini birga kechirib kelayotgan Ollambergan ota Rajabov hamda Tursunoy momo Rajabovalar birgalikda 2 oʻgʻil va 2 qizni dehqonchilik qilib topgan daromadi bilan ulgʻaytirishdi. Turmush qiyinchiliklarini sabr-u bardosh bilan yengib, farzandlarini el koriga yaraydigan, odob-ikromli qilib tarbiyalashdi. Oʻgʻillarni uylantirib, kelinlar olishdi, qizlarni esa uzatishdi, uyli-joyli qilishdi. Hatto nevara kelinlar tushirib, nevara qizlarni ham uzatishdi. Hozirgi kunda 30 nafarga yaqin nevara, 17 nafar chevaralarning sevimli bobo-buvilari boʻlgan bu piru-badavlatlar nafaqat oʻz xonadonlaridagi, balki ovuldagi boshqa oilalardagi kelinlarga, yigit-qizlarga oʻgitlar, nasihatlar berib, yoshlarning imon-eʼtiqodli, milliy odob va urf-odatlar ruhida tarbiyalanishiga oʻz hissalarini qoʻshib kelishmoqda. Ovul aholisi ham yoshi ulugʻlarning toʻy va boshqa oilaviy tadbirlarni ixcham, kam chiqim tarzda, belgilangan tartib-qoidalar asosida oʻtkazish, milliy urf-odat, anʼana va marosimlarni tartibli tashkil etish kabilar boʻyicha boy hayotiy tajribalaridan kelib chiqib berayotgan qimmatli maslahatlariga amal qilishgani natijasida bunday tadbirlar hamjihatlikda, tinch-totuvlikda fayzli oʻtadi.

Donishmandlar, eng katta boylik — bu aql-zakovat va ilm, eng katta meros — bu yaxshi tarbiya, eng katta qashshoqlik – bu bilimsizlikdir, deya bejizga aytishmagan. Shu bois tuman Mahalla va nuroniylarni qoʻllab-quvvatlash boʻlimi qoshida tashkil etilgan “Buvijonlar maktabi” jamoatchilik kengashi tomonidan yoshlarni oilaviy hayotga ruhiy-maʼnaviy jihatdan tayyorlash, oilaviy ajrimlarning oldini olish kabilar borasida nuroniy otaxonlar va buvijonlarning hayotiy tajribalaridan unumli foydalanilmoqda.

Oʻzining ibratli hayoti bilan boshqalarga oʻrnak boʻlib, yoshlarga tarbiyaviy ahamiyatga ega fikrlarini singdira oladigan nuroniy onaxonlarni oʻz atrofiga birlashtirgan “Buvijonlar maktabi” jamoatchilik kengashi raisi Xonimjon Rajabova fuqarolar yigʻinlaridagi kengash masʼullari bilan hamkorlikda bu borada aytishga arzigulik ishlarni amalga oshirmoqda. Boy hayotiy tajribaga ega boʻlgan yoshi ulugʻlarni ijtimoiy hayotga jalb etib, oilalardagi maʼnaviy muhitni yaxshilashga oʻz hissasini qoʻshmoqda.

Ozoda Xudoyberganova.