QOʻRIQLASh BOʻLIMI TOMONIDAN 182 TA XALQ XOʻJALIGI OBʼEKTLARI, 53 TA XONADON IShONChLI QOʻRIQLANMOQDA

Milliy gvardiyaning Amudaryo tumanidagi Qoʻriqlash boʻlimi oʻz faoliyatiga doir vazifalarni masʼuliyat va izchillik bilan amalga oshirib kelmoqda. Boʻlim xodimlari jismoniy va yuridik shaxslar mol-mulki hamda obʼektlarini ishonchli qoʻriqlash bilan birga hududlarda jamoat tartibini saqlash, huquqbuzarliklarni profilaktika qilish va ularga chek qoʻyish, qoʻriqlanadigan obʼektlarni nazoratdan oʻtkazish va obʼekt ichki rejimlarini taʼminlash kabilarni ham sidqidildan bajarishmoqda.

Amudaryo tumani Qoʻriqlash boʻlimi tomonidan qoʻriqqa olingan obʼektlar soni yanada ortib, xalq xoʻjaligi obʼektlari 182 taga, fuqaro xonadonlari 53 taga yetdi. Boʻlimda harbiylashtirilgan soqchilar tomonidan qoʻriqlanayotgan obʼektlar soni oʻtgan yilning shu davriga taqqoslanganda, 1 tadan 3 taga oshirildi. Hozirgi kunda barcha obʼektlar Boʻlimdagi texnik qoʻriqlash markazi tomonidan ishonchli qoʻriqlanmoqda.

Tuman hududidagi 87 ta umumtaʼlim maktablaridan 28 tasi, 51 ta maktabgacha taʼlim muassasalaridan 18 tasiga shartnoma asosida xizmat koʻrsatilmoqda. Shuningdek, maktabgacha taʼlim muassasalarida mayda tashmachiliklarning oldini olish maqsadida tashkilot xodimlariga huquqiy tushunchalar berish bilan birga mazkur muassasalarda taktik-amaliy oʻquv mashgʻulotlari oʻtkazilib borilmoqda. Maʼmuriy huquqbuzarliklarning oldini olish maqsadida tumandagi mahallalar va qator idora-tashkilotlarda ham muntazam ravishda targʻibot ishlarini oʻtkazish yoʻlga qoʻyilgan. Aytish kerakki, qoʻriqlash xizmatining samaradorligini oshirish, qoʻriqdagi obʼektlar sonini koʻpaytirish va mayda tashmachilik holatlarining oldini olish, qoʻriqlash xizmatining afzalliklarini tushuntirish borasida qator targʻibot-tashviqot ishlari amalga oshirildi.

Oʻtgan 2022-yil 2 nafar fuqaro sodir qilgan huquqbuzarligi uchun maʼmuriy javobgarlikka tortildi. Shuningdek, tuman Ekologiya va atrof-muhitni muhofaza qilish boʻlimi xodimlari bilan hamkorlikda olib borilgan tadbirlar natijasida noqonuniy ravishda ov qilish holati aniqlangan. Bu boʻyicha ham maʼmuriy bayonnomalar rasmiylashtirilgan va javobgarlarning har biriga eng kam ish haqining 5 baravari, yaʼni 1 mln. 350 ming soʻm miqdorida jarima belgilangan.

Xizmatga jalb etilgan xodimlarning jangovar shayligini oshirish hamda favqulodda holatlar sodir boʻlganda huquqni muhofaza qiluvchi organlar bilan hamkorlikdagi harakatlarni muvofiqlashtirish maqsadida shu paytga qadar 52 marotaba amaliy-taktik oʻquv mashgʻulotlar oʻtkazildi. Undan tashqari, tumandagi Sport maktabi bilan hamkorlikda belgilangan rejalar asosida tashkil qilingan sportning kamondan otish, ot sporti, qoʻl jangi, kurash sektsiyalari faoliyat yuritib kelmoqda.

Sport maktabida mazkur sport turlari boʻyicha oʻquv-amaliy mashgʻulotlar oʻtkazilib, ularda Boʻlim xodimlari bilan bir qatorda tuman yoshlarining ham ishtiroki taʼminlanmoqda. Mashgʻulotlarda ishtirok etgan uyushmagan yoshlar soni 514 nafarni, maktab oʻquvchilari soni 846 nafarni tashkil qiladi.

Shu oʻrinda Boʻlim xodimlari tuman va Respublika miqyosida oʻtkazilib kelinayotgan turli tanlovlarda namunali ishtirok etib, xizmat vazifasini oʻtash davrida fidoyilik koʻrsatib, barchaga oʻrnak boʻlib kelayotganini ham aytib oʻtish joizdir. 2022-yil 20-27-oktyabr kunlari Boʻlim xodimi safdor Farid Jumabayev Toshkent shahrida respublika boʻyicha oʻta muhim va toifalangan obektlar oʻrtasida oʻtkazilgan koʻrik-tanlovda faol qatnashib, faxrli 1-oʻrinni qoʻlga kiritdi va «Eng yaxshi qoʻriqlash xodimi» nominatsiyasi boʻyicha mintaqaviy bosqich gʻolibi deb topildi. 2022-yil 29-aprel kuni safdor Farid Jumabayev huquq-tartibot idoralari xodimlari oʻrtasida sportning triatlon turi boʻyicha Qoraqalpogʻiston Respublikasi «Dinamo» jismoniy tarbiya va sport qoʻmitasi birinchiligida ishtirok etib, faxrli 2-oʻrinni egalladi. Shuningdek, 2022-yil 23-aprel kuni safdor Jasur Erimbetov toifalangan obʼekt boʻlgan Qipchoq panton koʻprigida xizmat faoliyatini olib borayotgan paytida joniga qasd qilmoqchi boʻlib, oʻzini daryoga tashlagan ayolni xavf-xatarga qaramasdan, suvga tushib qutqarib qoldi.

Qoʻriqlash boʻlimi xodimlari tomonidan kecha-yu kunduz tuman hududida aholi xavfsizligini taʼminlash, bezorilik, oʻgʻirlik, janjal-toʻpolon kabi koʻngilsiz hodisalarning oldini olish kabilarga alohida eʼtibor qaratilmoqda. Oʻz xizmat vazifalarini masʼuliyatni his qilgan holda, astoydil bajarishga harakat qilib, jinoyat va huquqbuzarliklar kamayishiga, el-yurtda tinchlik-osoyishtalik barqaror boʻlishiga munosib hissalarini qoʻshishmoqda.

O.Xudoyberganova.