TOʻLQIN OVULIDA 11 MILLIARD SOʻMLIKDAN ZIYoD OBODONLAShTIRISh, QURILISh IShLARI BAJARILDI

Yurtimizda “Obod qishloq”, “Obod mahalla” dasturlarini amalga oshirish orqali hududlarning yoʻl-transport infratuzilmasini, muhandislik-kommunikatsiya tarmoqlari hamda ijtimoiy soha obʼektlarini rivojlantirish va shu asosda aholi farovonligini hamda turmush darajasini yuksaltirish koʻzda tutilgan.

2022-yil “Obod qishloq” dasturiga kiritilgan tumanimizning Toʻlqin ovulida dastur doirasida amalga oshirilgan ishlar ovul aholisining hayotiga chinakam obodlik baxsh etdi, ertagi kunga ishonchini mustahkamladi, davlat boshqaruviga hurmat hissini yuksaltirdi.

Dastur doirasida shu kungacha 24-sonli davlat maktabgacha taʼlim tashkiloti binosini mukammal taʼmirlash, 11 kilometrlik ichki yoʻllarni taʼmirlash, shu jumladan Buyuk kelajak koʻchasining 0,6 kilometr qismiga beton qoplama yotqizish, 21 ta ichki koʻchalarining jami 11 kilometr qismini joriy taʼmirlash, shuningdek, zahira mablagʻlari hisobidan Turon, Maʼrifatchilar, Quvonch koʻchalarining 1,77 kilometr qismini joriy taʼmirlash ishlari amalga oshirilmoqda.

Ovul hududida tabiiy gaz taʼminotini yaxshilash maqsadida 4,4 kilometrlik gaz tarmogʻi va 19 ta gaz taqsimlash punktlarini taʼmirlash, 4 ta ichimlik suvi inshootini qurish ishlari toʻliq yakunlandi. 2 kilometrlik piyodalar yoʻlakchasini qurish ishlari yakuniga yetay deb turibdi. Elektr taʼminotini yaxshilash maqsadida 3,3 kilometrlik liniya tortish va 3 ta transformator oʻrnatish, 115 ta elektr tayanch ustunlarini oʻrnatish ishlari toʻliq yakunlanib, hozirgi kunda tuman elektr tarmoqlari korxonasi tomonidan elektr liniyalarini tarmoqqa ulash ishlari amalga oshirilmoqda. Shuningdek 80 dona tungi yoritgichlar oʻrnatildi, 4 kilometrlik aloqa tarmogʻi tortildi, 4 ta chiqindi konteynerlari oʻrnatildi, 160 ta turar joylarning fasad qismi taʼmirlandi.

Bir yil ichida amalga oshirilgan buningdek oʻzgarishlar, bunyodkorliklar Toʻlqin ovuliga chinakam obodlik, koʻrkamlik, oʻzgacha fayz baxsh etdi. Hudud aholisi buningdek eʼtibor, yangilanishlarga munosib mehnat qilishga, turmush kechirishga intilmoqda.

 Ovul fuqarolar yigʻini oqsoqoli Rashid Abdugaliyev, hokim yordamchisi Ruslan Sagʻinboyev, yoshlar yetakchisi Fozilbek Qurbonboyev, xotin-qizlar faoli Gavhar Bobotoyevalar oʻzgalar parvarishga muhtoj nuroniy keksalar, ijtimoiy himoyaga muhtoj oilalar holidan xabar olib, qoʻllab-quvvatlamoqda.

Yil boshida 142 nafar ayol “Ayollar daftari”ga kiritilgan edi. Shularning 79 nafari ishlash istagidagi ayollar edi. Gulora Bobojonova yigʻin binosining boʻsh turgan xonalarida tikuvchilik tsexi tashkil etdi va oʻzi kabi 6 nafar ayolning bandligini taʼminladi, 20 nafar ayol-qizlarni tikuvchilik kasbiga oʻqitib, hunarli qildi. 7 ta kam taʼminlangan oila kredit hisobiga tadbirkorlik faoliyatini boshladi, 3 ta ijtimoiy himoyaga muhtoj oilaning turar joyi taʼmirlab berildi. Yigʻin binosi yonida qad rostlagan bolalar oʻyingohi oʻquvchi-yoshlarning sport bilan shugʻullanib, boʻsh vaqtlarini mazmunli oʻtkazishlariga yordam bermoqda.

Ovulning 42 nafar yoshlari respublikamizning turli oliy taʼlim muassasalarida taʼlim olishmoqda. Joriy yilda kam taʼminlangan oilalarning, kontrakt shartnoma asosida oʻqiyotgan 6 nafar yoshlarining kontrakt pullari toʻlab berildi.

Ovulda tadbirkorlik, dehqonchilik, chorvachilik bilan shugʻullanib, oʻz oilasi farovonligini taʼminlab, yangi ish oʻrinlari yaratayotgan, ovuldoshlarining ham hayoti toʻkin boʻlishiga hissa qoʻshayotganlar koʻp.

15-dekabr kuni ovul aholisi hayotida yana bir quvonchli voqea boʻldi: Investitsiya dasturi asosida qayta qurilgan 39-sonli davlat maktabgacha taʼlim tashkilotining zamonaviy, koʻrkam barcha sharoitlarga ega muhtasham binosi foydalanishga topshirildi.

Obodlik koʻngildan boshlanadi. Joriy yilda toʻlqinliklarning koʻngillari ham, ovuli ham obod boʻldi.

Oygul RAJABOVA