“MEHR HARAKATI” DOIRASIDA 20 TA XONADONLARGA OZIQ-OVQAT MAHSULOTLARI TARQATILDI
Mehr-oqibat, doʻstlik-birodarlik, bir-birovning quvonchi damlarida ham, tashvishli damlarida ham birga boʻlish, bir-birovni qoʻllab-quvvatlash xalqimizning azaliy odatlaridandir. Ana shunday ezgu amallar hayotimizga fayz baxsh etibgina qolmay, necha-necha insonlarning hayotga ishtiyoqini, ertagi kunga ishonchini oshiradi.
Bugungidek qishning izgʻirinli kunlarida isitish tizimi xarajatlarining oshishi, oila-aʼzolarining qishki kiyim-kechaklari uchun qoʻshimcha sarf-xarajatlar baʼzi xonadonlarda iqtisodiy yetishmovchiliklarni keltirib chiqarmoqda. Ushbu mavsumda kam taʼminlangan yurtdoshlarimizni qoʻllab-quvvatlash maqsadida tashkil etilgan “Mehr harakati” koʻpchilikka madad boʻlayotir.
Milliy qadriyat darajasiga koʻtarilgan mehr-oqibat, saxovat, himmat, olijanoblik kabi fazilatlarni ulugʻlab kelayotgan yurtdoshlarimiz bu harakatga bosh qoʻshib, aholining ijtimoiy himoyaga muhtoj qatlamiga beminnat koʻmak berib, jamiyatimizda tinchlik-osoyishtalik, hamjihatlik ustuvorligini taʼminlashga munosib hissa qoʻshmoqdalar.
Ana shunday insonlardan biri – qipchoqlik tadbirkor, “Qipchoq gʻalla klasteri” masʼuliyati cheklangan jamiyati taʼsischisi Bahrom Yoʻldoshevdir.
Ushbu klaster Amudaryo tumanida faoliyat yuritayotgan 327 ta fermer xoʻjaliklarining 5861 gektar gʻalla maydonlarini qamrab olgan. Oʻtgan yili ushbu maydonlarda bugʻdoydan yuqori hosil olindi. 2023-yil hosili uchun bugʻdoy ekilgan dalalarda ham toʻliq nihol olinib, kuzgi parvarish, oziqlantirish ishlari agrotexnika qoidalari asosida sifatli bajarildi. Buning uchun klaster tomonidan gʻallakorlar zarur oʻgʻitlar, zararkunandalarga qarshi preparatlar bilan yetarli taʼminlandi.
Tumanimizda aholining asosiy oziq-ovqat mahsuloti – moʻl gʻalla yetishtirish yoʻlidagi saʼy-harakatlari samarali boʻlmoqda. 18-dekabr kuni klaster taʼsischisi Bahrom Yoʻldoshev Qipchoq ovul va shaharcha, Daryoboʻyi, Beshtom mahallalari hamda Nazarxon ovul fuqarolar yigʻinlari tavsiyalariga koʻra, hududlardagi kam taʼminlangan 20 ta oilalarga kartoshka, piyoz, un, yogʻ, guruch kabi oziq-ovqat mahsulotlari, qishki kiyimlar hadya etdi.
Mahsulotlarni jamiyat raisi Yerkinboy Allamov tarqatdi va barcha xonadonlar aʼzolarini kirib kelayotgan Yangi yil bilan qizgʻin qutladi. “Mehr harakati” doirasidagi ushbu savobli amal 20 ta xonadonga yorugʻlik olib kirdi.
Shunisi eʼtiborliki, xalqimiz tarixiga nazar solsak, taraqqiyotning barcha davrlarida ham ajdodlarimiz turli sinov, tashvishlarni hamjihatlik bilan yengib kelganini, borini el bilan birga baham koʻrib kelganini anglaymiz. Ulugʻ qadriyatlarimizga sodiq insonlar omon boʻlishsin!
Oygul RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
