HUDUDLAR IChKI YOʻLLARINI TAʼMIRLASh, INFRATUZILMASINI RIVOJLANTIRISh MASALASIDA YIGʻILISh OʻTKAZILDI

Joriy yilning 25-oktyabrida qabul qilingan “2022-2023-yillarda mahallalar infratuzilmasini yanada yaxshilash boʻyicha qoʻshimcha chora-tadbirlar toʻgʻrisida”gi Prezident Qarorida mamlakatimiz hududini obod qilish, qishloq va mahallalarda infratuzilma bilan bogʻliq eng dolzarb masalalarni tizimli hal etish, xususan, joylarda Ichki yoʻllar, ichimlik suv, elektr energiyasi va gaz taʼminotini, taʼlim, sogʻliqni saqlash, madaniyat, sport va boshqa infratuzilma obʼektlarini yaxshilash, shu asosda aholi uchun munosib turmush sharoitlarini yaratish vazifa qilib qoʻyilgan edi. Ushbu vazifa ijrosini taʼminlash maqsadida barcha viloyatlarda boʻlgani kabi Qoraqalpogʻiston Respublikasida ham hududiy ishchi guruhlar tuzilib, ular tomonidan ovul va mahallalardagi aholining turmush darajasiga bevosita taʼsir koʻrsatuvchi eng dolzarb masalalar oʻrganilib, 2022-2023-yillarda infratuzilmasini rivojlantirish lozim boʻlgan mahallalar, bajariladigan ishlar koʻlamini belgiladi.

Tumanimizning Qipchoq shaharchasi, Beshtom, Daryoboʻyi mahallalari hududlarida ham taʼmirlashga muhtoj ichki koʻchalar hisobga  olinib, taʼmirlash uchun sarflanadigan mablagʻ miqdori aniqlandi.

Shu yil 10-noyabr kuni hududdagi 21-sonli Bolalar musiqa va sanʼat maktabida shu masalaga bagʻishlangan yigʻilish boʻlib oʻtdi.

Yigʻilishda tuman hokimligining sanoat, yirik qurilish, kommunikatsiya, kommunal xoʻjaligi va obodonlashtirish masalalari boʻyicha majmuasi boshligʻi Nodirbek Kamolov va mutaxassislari, Qipchoq shaharcha, Beshtom, Daryoboʻyi mahallalari fuqarolar yigʻinlari raislari, hokim yordamchilari va faollari ishtirok etdilar.

Yigʻilishda hokim oʻrinbosari Nodirbek Kamolov Prezidentning yuqorida qayd etilgan qaroriga asosan tumanimiz hududidagi mavjud muammolarni bartaraf etish va infratuzilmasini rivojlantirish uchun 22 milliard 209 million soʻm pul mablagʻi ajratilayotganligi, ushbu mablagʻdan Qipchoq shaharcha, Beshtom, Daryoboʻyi mahallalari hududlaridagi ichki yoʻllarni taʼmirlash, elektr energiyasi, ichimlik suvi taʼminotini yaxshilash ishlari amalga oshirilishini keng turda tushuntirdi.

Ajratilayotgan jami mablagʻning 12 milliard 516 million soʻmi tuman hududidagi 19 ta ovul va mahallalardagi jami 504 kilometr uzunlikdagi ichki yoʻllarni taʼmirlash, shuning 46,7 kilometriga tosh-shagʻal yotqizish, 1,6 kilometriga asfalt qoplamasini yotqizish, 2,1 kilometriga ShPS qoplamasini yotqizish ishlarini amalga oshirish belgilangan. Xususan, Qipchoq shaharchasi hududida elektr taʼminotini yaxshilash maqsadida hududdagi 63 ta xonadonni sifatli elektr energiyasi bilan taʼminlash uchun qiymati 100 million soʻmlik 2 kilometr uzunlikda kabellar yangidan tortiladi va 57 ta tayanch ustunlar yangidan oʻrnatiladi.

Yigʻilishda aholiga bular haqda batafsil maʼlumotlar berildi.

Ishtirokchilar davlatimiz rahbarining xalqimiz turmushi sifatini oshirish. munosib hayot kechirishlari yoʻlidagi saʼy-harakatlarini quvonch bilan eʼtirof etdilar.

Yurtimizda inson shaʼni, qadri ulugʻlanib, uning oʻz hayotidan rozi boʻlib yashashiga erishish yoʻlida izchil amalga oshirilayotgan chora-tadbirlar ahamiyatini, mohiyatini har bir fuqaro oʻz hayotida his qilayotgani mazkur yigʻilishda ham yaqqol namoyon boʻldi.

Oygul RAJABOVA.