M.AHMEDOVA IShTIROKIDA AMUDARYoLIK FAOL AYoLLAR “YaShIL MAKON” UMUMMILLIY LOYIHASI DOIRASIDA "ONALAR BOGʻI"GA KOʻChAT EKDI

Har yili butun mamlakatimiz boʻylab kuz va bahor oylarida keng koʻlamli koʻchat ekish ishlari amalga oshiriladi. Joriy yil kuzgi koʻchat ekish mavsumi esa oʻzgacha koʻtarinki ruhda boshlandi. Prezidentimiz tashabbusi bilan amalga oshirilayotgan mazkur tadbirda barcha, shu jumladan, idora va tashkilotlar, muassasalar xodimlari, talaba va oʻquvchi-yoshlar, nuroniy otaxon va onaxonlar, davlat va jamoat arboblari faol ishtirok etishmoqda.

Mamlakatimizda “Yashil makon” umummilliy loyihasi Prezidentimiz tashabbusi bilan 2021-yil noyabr oyida boshlangan edi. Mazkur loyiha doirasida yiliga Oʻzbekiston miqyosida 200 mln. tup daraxt va buta koʻchatlarini ekish belgilab berilgan edi. Bunday keng koʻlamli tashabbusning amalga oshirilishi natijasida aholi maskanlaridagi yashil maydonlar hududi 8 foizdan 30 foizga oshirilishi xalqimiz uchun musaffo, toza havo hududlarini yanada kengaytirish imkonini beradi.

“Yashil makon” umummilliy loyihasi bir yillik tadbir emas, balki xalqimiz uchun bobomeros maʼnaviy qadriyat hisoblanadi va har yili mamlakatimiz boʻylab anʼanaviy koʻchat ekish mavsumini har bir fuqaro mamnuniyat bilan savobdi ish sifatida amalga oshiradi.

Amudaryo tumanida ham barcha tashkilot, muassasa va korxonalar tomonidan hududlarda obodonlashtirish va koʻkalamzorlashtirish, koʻchat ekish ishlari hamjihatlik bilan olib borilmoqda. Ushbu “Dolzarb 40 kunlik”da Amudaryo tuman xotin-qizlar boʻlimi xodimlari ham faol ishtirok etishmoqda.

Joriy yilning 3-noyabr sanasida Amudaryo tuman xotin-qizlar boʻlimi raisi Goʻzal Saburova rahbarligidagi ovul va mahalla fuqarolar yigʻinlarining xotin-qizlar faollari, shuningdek, “Oqila ayollar” jamoatchilik tuzilmasi aʼzolari ishtirokida 87-sonli umumtaʼlim maktabi hududida tashkil etilgan “Onalar bogʻi”da “Yashil makon” umummilliy loyihasining “Dolzarb 40 kunlik” doirasidagi koʻchat ekish tadbiri amalga oshirildi.

“Dolzarb 40 kunlik” doirasida oʻtkazilgan mazkur koʻchat ekish tadbirida Qoraqalpogʻiston Respublikasi xotin-qizlar qoʻmitasi raisi Maryam Ahmedova ishtirok etdi va mazkur tadbirning ahamiyati, “Yashil makon” umummilliy loyihasi 1 yillik tadbir emas, balki xalqimiz uchun azaliy anʼanaviy qadriyat, qolaversa, mamlakatimizda mazkur loyiha asosida kelgusi besh yillikda 1 milliard tup daraxt koʻchatlarini ekish rejalashtirilgani haqida toʻxtaldi va “Onalar bogʻi”ga koʻchat ekdi.

Shu kuni tadbir ishtirokchilari boʻlgan ovul va mahalla fuqarolar yigʻinlari faollari va “Oqila ayollar” jamoatchilik tuzilmasi aʼzolari boʻlgan onaxonlar oʻz qoʻllari bilan “Onalar bogʻi”ga yasen, pensilvaniya, sadaqayragʻoch, katalpa, gledichiya, mevali daraxt koʻchatlaridan oʻrik, olcha behi kabi nihollarni ekdilar.

Insonlar salomatligini tiklashda tabiiy kislorod fabrikasi – yashil olamning oʻrni beqiyos katta ahamiyatga ega. “Yashil makon” umummilliy loyihasini amalga oshirish maqsadida oʻtkazilayotgan “Dolzarb 40 kunlik” koʻchat ekish mavsumining ahamiyatini oʻsib kelayotgan yosh avlod ongiga singdirish, ular qalbida ona tabiatga cheksiz mehr uygʻotish, oʻzi yashab turgan hududning ekologik holatini yaxshilashda masʼuliyat hissini uygʻotishga qaratilgan bu xayrli tadbir har bir amudaryolik uchun anʼanaviylik kasb etmoqda. Mazkur tadbir butun tuman boʻylab keng quloch yoyib, unda yosh-u qari vijdonan va masʼuliyat bilan ishtirok etmoqda.

Robiya YOʻLDOShEVA.