TUMAN MADANIYaT BOʻLIMI TOMONIDAN “TIL – MILLAT KOʻZGUSI” MAVZUSIDA BADIIY-MUSIQIY TADBIR OʻTKAZILDI

Barcha xalq va millatlarning asosiy muloqot vositasi bu ularning milliy tili hisoblanadi. Har bir millat tili elining urf-odat, anʼana va madaniyatlarini saqlaydi, shularning va xalq oʻtmishi, tarixining avloddan avlodga oʻtishini taʼminlaydi. Shu bois barcha elatlarning milliy tili oʻz davlatida juda qadrlanadi.

Joriy yil mamlakatimizda ham oʻzbek tiliga davlat tili maqomi berilganiga 33-yil toʻladi. Maʼlumki, 1989-yil 21-oktyabrda oʻzbek tiliga Davlat tili maqomi berildi. Bu haqda Konstitutsiyamizda ham “Oʻzbekiston Respublikasining davlat tili oʻzbek tilidir” deb yozib qoʻyilgan. Bu kun yurtimizda cheksiz quvonch va iftixor bilan bayram qilinadi, sana munosabati bilan barcha hududlarda har xil tadbirlar oʻtkazilib, keng nishonlanadi.

20-oktyabr kuni Amudaryo tumanidagi Prezident taʼlim muassasalari agentligi tizimidagi ixtisoslashtirilgan maktabda ham “Til – millat koʻzgusi” mavzusida badiiy-musiqiy tadbir boʻlib oʻtdi. Tuman Madaniyat boʻlimi tomonidan tashkil etilgan ushbu tadbirda maktabning oʻquv ishlari boʻyicha direktor oʻrinbosari Ravshan Xolmurodov, ona tili va adabiyot fani oʻqituvchilari Mohira Sobirova, Charosxon Norimbetova, Dilnoza Jumaboyeva, Yulduz Tursunboyeva hamda maktabning boshqa oʻqituvchilari, oʻquvchilar ishtirok etishdi.

Tadbirda dastlab soʻzga chiqqanlar barchani til bayrami bilan qutlab, oʻzbek tilining nechogʻlik boy til ekanligini eʼtirof etib, milliy tilimizda ijod qilgan ulugʻ bobokalon allomalarimiz, ularning dunyoga mashhur boʻlgan ijod namunalari haqida faxr bilan soʻzlab oʻtdilar.

Maktabning ona tili va adabiyot fani oʻqituvchilari ona tili — millat gʻururi, uning eng ulugʻ qadriyati, milliyligimiz, buyuk tariximiz, yuksak maʼnaviyatimizning asosi ekanligini, uzoq yillik tarixga ega oʻzbek tilining rivoji ulugʻ bobokalonimiz Alisher Navoiy davrida yana bir pogʻonaga koʻtarilgani, buyuk shoir va mutafakkir boʻlgan bu zot turkiy tilni lugʻat boyligi va nafisligi jihatidan boshqa tillardan hech ham kam emasligini oʻzining koʻplab asarlari orqali isbotlaganini taʼkidlab oʻtdilar.

Shuningdek, boshqada buyuk ijodkorlarning oʻzbek tilining sermaʼno ekanligini koʻrsatib beruvchi sheʼrlaridan namunalar aytib berdilar. Maktabning 5-, 7-, 8-sinf oʻquvchilari ham til, millat, Vatanimizni madh etguvchi sheʼrlar aytib, faxru-iftixorini namoyon etdilar.

Shundan soʻng, bayramga bagʻishlab tayyorlangan musiqiy dastur namoyish etildi. Dastur davomida Drama toʻgarak rahbari Mirsaid Qodirov rejissyorligida sahnalashtirilgan, maktabning 6-sinf oʻquvchilari ishtirokidagi adib Gʻafur Gʻulomning “Shum bola” asaridan parcha sahna koʻrinishida havola qilindi. Sahnaga shum bola obrazida chiqqan Javlonbek Olimov, Boy obrazidagi Akobir Abdusamatov ijrosi tomoshabinlarga juda manzur boʻldi.

Tadbirga tuman Madaniyat boʻlimi estrada xonandalari,”Uchqun” ansambli badiiy rahbari Anvar Xudoyberganovlar ijrosidagi qoʻshiq va taronalar, 38-sonli maktabning raqs jamoasi ijrosidagi jozibali va dilrabo raqslar yanada fayz kiritdi va barchaga xushnudlik baxsh etdi.

O.Xudoyberganova.