TUMAN FAVQULODDA VAZIYaTLAR BOʻLIMINING KUZ-QISh MAVSUMIGA TAYYoRLIK YuZASIDAN OʻQUV MAShQI MAShGʻULOTLARI OʻTKAZILDI

Kuz-qish mavsumi oldidan turli favqulodda hodisalarning oldini olish, mavsumni betalofat oʻtkazishga doir chora-tadbirlar koʻriladi. Bu yil ham qish mavsumiga tayyorgarlik koʻrish boʻyicha Vazirlar Mahkamasining «Iqtisodiyot tarmoqlari, ijtimoiy soha obʼektlari va koʻp kvartirali uy-joy fondini 2022/2023-yillar kuz-qish davrida barqaror ishlashini taʼminlash toʻgʻrisida»gi qarori, shunga koʻra Qoraqalpogʻiston Respublikasi Vazirlar Kengashining hamda tuman hokimining tegishli qarorlari qabul qilindi. Mazkur qarorlar bilan barcha yoʻnalishlar boʻyicha isitish mavsumi barqaror oʻtishini taʼminlashga doir aniq vazifalar belgilab berildi.

Shu yil 14-oktyabr kuni ushbu qarorlar ijrosini taʼminlash hamda kuz-qish mavsumiga tayyorgarlik koʻrish, betalofat oʻtkazishga jalb etiladigan kuch va vositalarning tayyorgarlik holatini tekshirish maqsadida Amudaryo tumani Favqulodda vaziyatlar boʻlimi tomonidan oʻquv mashqi mashgʻulotlari oʻtkazildi.

Mashgʻulotlar davomida tegishli texnika va boshqa kuch-vositalarning favqulodda vaziyatlarda harakatlanishga tayyorligi sinab koʻrildi. Shuningdek, aholiga elektr energiyasi, issiqlik taʼminoti kabilardan foydalanish jarayonida xavfsizlik qoidalariga rioya etilishini taʼminlashga doir tushunchalar berishga alohida eʼtibor qaratildi.

Maʼlumki, kuz-qish mavsumiga tayyorgarlik ishlarini oʻtkazish boʻyicha tuzilgan ishchi guruh tomonidan is gazidan zaharlanishning oldini olish maqsadida oʻrganish ishlari oʻtkazilib, aholi xonadonlaridagi isitish qozonlari va dudburonlardagi nosozliklar bartaraf etilib borilmoqda. Ushbu jarayonlarda tumandagi mavjud 55 ta koʻp kvartirali uy-joylardagi 712 ta xonadondan shu kunga qadar 39 ta koʻp kvartirali uylarning 513 ta xonadonidagi yongʻin xavfsizligi holati tekshirildi.

Tekshirishlar davomida 350 ta xonadonning isitish qozonidagi dudburonlar tozalandi, 4 ta koʻp kvartirali uylardagi 28 ta xonadonning dudburonlari izolyatsiyalandi. Shuningdek, 2 ta koʻp kvartirali uylardagi 16 ta kvartiraning shamollatish kanallari tozalanib, 21 ta koʻp qavatli uylarning tom qismi tekshirildi.

Undan tashqari, 36 ming 13 ta aholi uylaridan 5307 tasida yongʻin xavfsizligi holati tekshirilib, 458 tasi xonadonning isitish qozonidagi dudburonlar tozalandi. Shu bilan birga tumandagi 234 ta ijtimoiy soha obʼektlaridan 120 tasi toʻligʻi bilan tekshirilib, is gazi va yongʻindan zararlanishning oldini olishga doir tushunchalar berildi.

Statistika maʼlumotlarga koʻra, respublikada soʻnggi uch yil ichida kuzgi-qishki isitish mavsumida sodir bulayotgan favqulodda vaziyatlarning aksariyati is gazidan zaharlanish holatlari bilan bogʻliq boʻlgan.

Maʼlum boʻlishicha, is gazidan zaharlanish va yongʻin holatlarining aksariyati fuqarolar tomonidan gaz va muqobil yoqilgʻi, yaʼni koʻmir, oʻtin kabi yonuvchi ashyolardan foydalanishda xavfsizlik choralariga rioya etmaslik, nostandart, yaʼni qoʻlbola yasalgan yoki sertifikatga ega boʻlmagan isitish pechlari va anjomlaridan foydalanish, isitish pechlarining dudburonlarini notoʻgʻri oʻrnatish kabilardan kelib chiqqan.

Shuningdek, gaz yoki boshqa muqobil yoqilgʻiga moslashtirilgan isitish pechlarini dam olish xonalariga olib kirish, havo almashmaydigan xonalarni isitishda ochiq olov, koʻmir va oʻtin choʻgʻlaridan foydalanish, havoni almashtiruvchi shamollatish shaxtalari yoki tuynuklarni berkitib, toʻsib qoʻyish kabi holatlar ham yongʻinlarga sabab boʻlgan.

Oʻquv mashqi mashgʻulotlari davomida fuqarolarga is gazidan zaharlanish holati – isitish uchun foydalanadigan yoqilgʻining chala yonishi natijasida kelib chiqishi, bunday holatlarning kelib chiqishiga yoʻl qoʻymaslik uchun yongʻin xavfsizligi qoidalariga qatʼiy rioya etishlari kerakligi keng tushuntirildi. Shuningdek, bunday favqulodda hodisa yuz berganida 101,10 50 – yongʻin qutqaruv, 102 – IIB, 103 – tibbiy yordam, 104 – gaz avariya dispetcherlik xizmatlariga xabar berish kerakligi maʼlum qilindi.

 Mashgʻulotlar yakunida favqulodda vaziyatlarda harakatlanuvchi kuch va vositalar 2022-23-yilgi kuz-qish mavsumini betalofat oʻtkazishga, tabiiy va texnogen xususiyatli favqulodda vaziyatlarning oldini olishga va sodir boʻlganda oqibatlarini bartaraf etishga qaratilgan chora-tadbirlarni amalda bajarishga tayyor deb baholandi.

H.Matyakubov, tuman FVB boshligʻi.