NURONIYLAR UChUN "EHTIROM, EʼZOZ, EʼTIBOR" DEB NOMLANGAN KONTsERT DASTURI NAMOYISh ETILDI

"Keksalar haftaligi" doirasida nuroniylarning madaniy hordiq chiqarishlari uchun Mahalla va nuroniylarni qoʻllab-quvvatlash boʻlimi hamda Madaniyat boʻlimi hamkorligida "Ehtirom, eʼzoz, eʼtibor" deb nomlangan maʼnaviy-maʼrifiy musiqali kecha tashkil etildi.

13-oktyabr kuni Amudaryo tumani Madaniyat boʻlimining kontsertlar zalida boʻlib oʻtgan tadbirga 200 dan ziyod faxriylar va nuroniylar tashrif buyurdilar.

Tadbir boshlanishida tuman Mahalla va nuroniylarni qoʻllab-quvvatlash boʻlimi masʼullari haftalik doirasida oʻtkazilgan tadbirlar haqida maʼlumot berdi hamda yurtimizda keksa avlod vakillariga koʻrsatilayotgan eʼzoz va eʼtibor, gʻamxoʻrliklarni tilga olib oʻtdi.

Shundan soʻng, tuman Madaniyat boʻlimi tomonidan tayyorlangan katta musiqiy dastur boshlandi. Dastur davomida tuman sanʼatkorlari, Madaniyat markazlari toʻgaraklarining yosh havaskorlari mumtoz kuy va qoʻshiqlar, xorazmcha va estrada yoʻnalishidagi shoʻxchan navolar, dilrabo va jozibali raqslarni ijro qilib, tadbirga tashrif buyurgan otaxon va onaxonlar eʼtiboriga havola etishdi. Keksalarga, ayniqsa, “Uchqun” ashula va raqs ansambli, “Ofarin” folklor jamoasi ijrosidagi kuy va qoʻshiqlar juda manzur boʻldi.

Insoniylik, mehr-muruvvat, bagʻrikenglik kabi ijobiy xislatlar shu yurt, millat farzandi boʻlgan har bir insonga xos, desak aslo mubolagʻa emas. Shu bilan birga yoshi ulugʻ insonlarga, keksalarga hurmat-ehtirom koʻrsatish, ularning koʻp yillik hayotiy va mehnat tajribalari asosidagi qimmatli maslahatlaridan bahramand boʻlish va duolarini olish ham xalqimizning ulugʻ qadriyatlaridan biri sanaladi. Aytish joizki, ana shu olijanob qadriyat, fazilat bugun davlatimiz siyosatida ham oʻz ifodasini topmoqda.

Keyingi yillarda nuroniylarning nafaqa va pensiyalarini oʻz vaqtida, ular istagan shaklda yetkazib berish, ularni moddiy va maʼnaviy qoʻllab-quvvatlash, salomatligiga eʼtiborni kuchaytirish borasidagi amaliy ishlar mamlakatimizdagi barcha yoshi ulugʻ insonlar ogʻirini yengil qildi.

Yurtimiz boʻylab 3-9-oktyabr kunlari davomida “Keksalarni eʼzozlash, ularga hurmat-ehtirom koʻrsatish – xalqimizga xos ezgu fazilat” gʻoyasi ostida boʻlib oʻtgan “Keksalar haftaligi” tadbirlarida ham yoshi ulugʻ insonlarga hurmat, eʼtibor koʻrsatildi.

Koʻtarinki ruhda oʻtkazilgan haftalik doirasida tumanimizda ham keksalar holidan xabar olindi, ularga hurmat va ehtirom koʻrsatilib, turli sovgʻalar berildi. Nuroniylar tarixiy va ziyoratgoh maskanlarga sayohatlarga, sport va sogʻlomlashtirish mashgʻulotlariga jalb etildi. Bepul tibbiy koʻriklar tashkil etilib, salomatliklari tekshiruvdan oʻtkazildi.

“Keksalar haftaligi” tadbirlarining yakuni sifatida oʻtkazilgan musiqiy kechada nuroniylar miriqib hordiq chiqardilar. Eʼtibor va gʻamxoʻrliklardan koʻngli togʻdek koʻtarilgan nuroniylar bu kabi ehtirom, eʼzoz uchun barcha tashkilotchilarga, masʼullarga minnatdorchilik bildirdilar.

O.Xudoyberganova.