Mangʻit arna kanalining Arnaboʻyi mahallasidan oʻtuvchi qismiga mustahkam koʻprik qurildi

Muqaddas islom dinimiz taʼlimotlariga koʻra inson vafotidan soʻng barcha solih amallari toʻxtaydi. Ammo, hayotlik chogʻidagi 3 ta amalining savobi to qiyomatgacha kesilmaydi. Bular – joriy sadaqa, yaʼni musulmonlarga doimiy foyda berib turadigan xayrli ishlar, misol uchun koʻprik qurish, quduq yoki ariq qazib suv keltirish kabi), manfaat olinadigan ilm, xaqqiga duo qiladigan solih farzand qoldirishdir. Shu boisdan ham ajdodlarimiz el-yurtni obod etib, odamlarning uzogʻini yaqin qiladigan koʻpriklar qurishga alohida eʼtibor berishgan.

Asriy anʼanalarimizga sodiq hamyurtlarimizning ayni kunlarda amalga oshirayotgan solih amallari ham barchamizni quvontiradi.

Amudaryo tumanining Arnaboʻyi mahallasida istiqomat qiluvchi oddiy dehqon Haytimbat Tajiyev va ayoli Gulora opalar uch oʻgʻilni, qizlarini uyli-joyli qilishdi. Hozir ular 9 nafar nevaraning bobo-buvisi. 70 yosh ostonasida ham tinib-tinchib, boshqalarday rohatda oʻtirish oʻrniga doimiy kasbi – dehqonchilik bilan shugʻullanishadi. Farzandlari bilan ahillikda yetishtirgan sarxil meva, sabzavotlarini birinchilardan boʻlib bozorga olib chiqishadi, topganlariga qanoat qilib, shukrona aytib yashashadi.

Mahalla hududidan oʻtuvchi Mangʻit arna kanali ustiga qurilgan koʻprik yaroqsiz holga kelib, transport vositalari oʻta olmayotgan, nosoz koʻprik piyodalar uchun ham xavf tugʻdirayotgani ularni anchadan beri oʻylantirib kelayotgan edi.

Shu yilning yoz fasli avvalida Haytimbat Tajiyev va ayoli maslahatlashib, yaxshi niyat bilan haj safariga borishga gʻamlagan mablagʻiga koʻprik qurishga kelishdilar va tez orada harakatni boshladilar.

Mahallaning Oʻzbegim va Xoʻjakent koʻchalarini bogʻlab turadigan ushbu koʻprikdan oʻquvchilar 27-sonli maktabga, mahalla erkaklari namoz ibodatini ado etish uchun masjidga, koʻpchilik yoshlar ishga, tuman markaziga borish uchun har kuni takror-takror oʻtadilar. Shuning uchun ham Haytimbat Tajiyevning koʻprik qurish haqidagi qaroridan xursand boʻlib, yeng shimarib hasharga keladiganlar ham kun sayin koʻpaydi.

Tashabbuskor otaxon hech kimdan yordam soʻramadi. Biroq mahalla faollari, yoshlari yoz taftini pisand qilmay, koʻprik qurilishida jon-jahdlari bilan mehnat qilishdi. “Xonsaroy” qurilish tashkiloti, tuman Obodonlashtirish boshqarmasi, tuman uy-joy qurilish boshqarmasi, “Temir-beton” masʼuliyati cheklangan jamiyati rahbarlari ham qurilishga imkon qadar hissa qoʻshdilar.

Oʻtgan ikki yarim oy ichida kanal ustiga zamonaviy uslubda koʻrkam va mustahkam koʻprik bunyod etildi.

Joriy yilgi Mustaqillik kuni Arnaboʻyi mahallasi ahli uchun qoʻshaloq bayram boʻldi. Haytimbat Tajiyev koʻprikning uzoq yillar xalqimizga xizmat qilinishini tilab, qoʻy soʻyib, elga osh berdi. Mahalladoshlari ham Haytimbat Tajiyevga, unga koʻmakdosh boʻlgan barcha fuqarolarga buningdek ezgu ishni amalga oshirganlari uchun ulkan minnatdorchilik bildirdilar, ehsoni qabul boʻlishini tilab duo qildilar.

Piyodalar uchun ham, transport vositalari haydovchilari uchun ham qulay, koʻrkam va mustahkam koʻprik barcha mahalla ahlini quvontirdi. Bu koʻprik shunchaki bir yangi inshoot emas, azaliy anʼanalarimizning, oʻzbekona tantilikning, chin moʻʼminlikning ifodasidir.

Oygul RAJABOVA.