SAYYoR SUDDA HUQUQBUZARLARGA QONUNIY ChORA KOʻRILDI

Beruniy nomli mahalla fuqarolar yigʻini maʼmuriy binosida ochiq sayyor sud majlisi boʻlib oʻtdi.

Shu yil 5-avgust kuni oʻtkazilgan ochiq sayyor sud majlisida Jinoyat ishlari boʻyicha Amudaryo tuman sudi masʼullari ishtirok etishdi. Sudda Qoraqalpogʻiston Respublikasi Oʻsimliklar karantini va himoyasi agentligi tuman boʻlimi tomonidan kelib tushgan 23 nafar fuqaroga nisbatan Oʻzbekiston Respublikasi MJtKning 107-moddasiga asosan toʻplangan maʼmuriy ishlar va tuman Ichki ishlar boʻlimining yoʻl harakati xavfsizligi boʻlinmasi tomonidan kelib tushgan 3 nafar fuqaroga nisbatan MJtKning 131-moddasi 1-qismi va boshqa moddalari bilan toʻplangan ish materiallari koʻrib chiqildi.

Oʻzbekiston Respublikasi MJtKning 107-moddasiga koʻra oʻsimliklar karantini obʼektlariga va boshqa zararli organizmlarga qarshi kurashishga doir fitosanitariya talablarini hamda boshqa qoidalarni buzish huquqbuzarlik hisoblanadi. Yaʼni, oʻsimliklar karantini obʼektlariga va boshqa zararli organizmlarga qarshi kurashishga doir fitosanitariya talablarini hamda boshqa qoidalarni karantin ostidagi mahsulotlarni ishlab chiqarish, tayyorlash, saqlash, tashish, qayta ishlash, realizatsiya qilish va yoʻq qilish chogʻida buzganlik uchun fuqarolarga bazaviy hisoblash miqdorining bir baravaridan uch baravarigacha, mansabdor shaxslarga esa uch baravaridan besh baravarigacha miqdorda jarima solinadi.
Oʻzbekiston Respublikasi MJtKning 131-moddasiga koʻra esa haydovchilarning transport vositalarini alkogolli ichimlikdan, giyohvand modda taʼsiridan yoki oʻzgacha tarzda mast holda boshqarishi, ularni transport vositasini boshqarish huquqidan bir yil-u olti oydan uch yilgacha muddatga mahrum qilib, bazaviy hisoblash miqdorining yigirma besh baravari miqdorida jarima solishga sabab boʻladi.

Mazkur holatlarga yoʻl qoʻygan huquqbuzarlarga nisbatan tegishli jarima jazolari qoʻllanilib, qonuniy choralar koʻrildi.

J.Oʻrazboyev, Jinoyat ishlari boʻyicha Amudaryo tuman sudi raisi.