Beshtom mahallasi yoshlari bilan tuman hokimining navbatdagi uchrashuvi boʻlib oʻtdi

Mamlakat taraqqiyoti, jadal rivojlanishi, muayyan yutuqlarga erishishi, xalqning farovon boʻlishi shu davlat tomonidan yoshlar taʼlim-tarbiyasi va kelajagiga beriladigan eʼtiborga bogʻliq. Shunga koʻra, Oʻzbekistonda yoshlar masalasi davlat siyosatining eng ustuvor yoʻnalishlaridan biriga aylantirildi.

Shu boisdan yoshlarni barkamol qilib tarbiyalash, ularning hayotga mustaqil qadam qoʻyishlari uchun barcha sharoitlarni yaratish, yoshlar bilan ishlash samaradorligini oshirish boʻyicha koʻplab tizimli ishlar amalga oshirib kelinmoqda. Ayniqsa, bu borada tashkil etilayotgan hokim va yoshlar uchrashuvlari muhim ahamiyatga ega boʻlmoqda.

11-avgust kuni Amudaryo tumanining Beshtom mahalla fuqarolar yigʻini binosida “Hokim va yoshlar uchrashuvi” boʻlib oʻtdi. Unda tuman hokimi Sultonboy Yoʻldashev, tuman Xalq qabulxonasi boʻlimi mudiri Erkin Rajabov, hokim oʻrinbosari Mahmud Shermetov hamda mahallaning 30 ga yaqin faol yoshlari ishtirok etishdi.

Uchrashuvda tuman hokimi yoshlarga murojaat qilar ekan, davlatimiz rahbarining tashabbusi bilan keyingi yillarda yoshlar bilan ishlash boʻyicha mutlaqo yangi tizim yaratilganligi, yoshlar faoliyatiga doir muhim qaror va farmonlar, qonunlar qabul qilinayotgani va unda yoshlarning ham takliflari oʻrin olayotganligi kelajagimiz egalariga qaratilayotgan yuksak eʼtiborning namunasi ekanligini aytib oʻtdi.

Uchrashuvda tuman Xalq qabulxonasi mudiri Erkin Rajabov Vatan kelajagi faqat yoshlar qoʻlida ekanligi, ularni har tomonlama qoʻllab-quvvatlash, muammolarini hal qilish uchun tumanimizdagi barcha mutasaddi tashkilot rahbarlari masʼul ekanligini aytib oʻtdi. Shuningdek, yoshlar uchun tuman Xalq qabulxonasi eshiklari doimo ochiqligi taʼkidlandi.

Uchrashuv davomida yoshlar oʻzlarining oldiga qoʻygan maqsadlari va rejalari bilan oʻrtoqlashdilar. Qolaversa, ushbu rejalarini amalga oshirishda tuman hokimidan maslahat olishdi.

Bugun Oʻzbekistonda yuksak maʼnaviyatli avlod tarbiyalanmoqda. Bugungi yoshlarning ong-u shuuri, dunyoqarashi ham oʻzgargan. Yoshlarimiz orasida yangicha oʻylaydigan, innovatsion gʻoyalarini amalga tatbiq eta oladigan kuchlar borligi bizni quvontiradi.

Tuman hokimi yoshlarga murojaat qilib, bugun amalga oshirilayotgan ulkan bunyodkorlik ishlarining barchasi yoshlar uchunligini, yoshlar oʻz ustida doimiy ishlab, hamisha yuqori marralarni zabt etishga intilishlari lozimligini taʼkidladi.

Uchrashuvda yoshlar oʻzlarini qiynab kelayotgan muammoli masalalar yuzasidan tuman hokimiga murojaat qildi. Oʻz navbatida tuman hokimi mazkur masalalar tegishli masʼullar tomonidan koʻrib chiqilib, natijalari haqida murojaat egalariga javob qaytarilishini taʼkidlab oʻtdi.

Tuman hokimligining axborot xizmati