Yangi qurilayotgan binolarda qurilish xavfsizligi qoidalariga amal qilinishi yuzasidan nazorat oʻtkazildi

Yoshi ulugʻlarimizning “turli balo-ofatlardan, nohaq tuhmatlardan oʻzining asragaysan”, deya duo qilishlari bejiz emas.

Ha, hammamiz ham ulkan imoratlarning yongʻin kelib chiqishi oqibatida kuli koʻkka sovurilganini, yo qulab tushib, fuqarolarning jabrlanganini, turli baxtsiz hodisalar tufayli ulkan yoʻqotishlarni boshidan kechirganlariga guvohmiz. Ayniqsa, keyingi yillarda yangi qurilib foydalanishga topshirilgan binolardan tabiiy gaz, elektr energiyasi tizimlariga ulashda zarur xavfsizlik qoidalariga rioya qilinmagani tufayli yongʻin kelib chiqishi, binolarda tabiiy gaz toʻplanib qolishi natijasida portlashlar yuzaga kelayotganini ijtimoiy tarmoqlarda kuzatmoqdamiz.

Buningdek baxtsiz favqulodda hodisalarning oldini olish uchun yangi qurilayotgan binolarda texnik xavfsizlik qoidalariga amal qilinishini nazorat qilib borish muhim ahamiyatga ega.

Yaqinda Amudaryo tumani Favqulodda vaziyatlar boʻlimining normativ texnik boʻlinmasi boshligʻi, katta leytenant Behzod Allaberganov tumanda yangi qurilayotgan binolarda qurilish xavfsizligi qoidalariga amal qilinishi yuzasidan nazorat oʻtkazdi.

Xususan, Toʻlqin ovulidagi 39-sonli maktabgacha taʼlim tashkiloti yangi binosi qurilishini amalga oshirayotgan quruvchilar bilan profilaktik suhbat oʻtkazdi.

Ushbu obʼekt loyihasi “ARTURUS” masʼuliyati cheklangan jamiyati tomonidan ishlab chiqilgan boʻlib, qurilishi “Jumurtov tex taʼmir servis” masʼuliyati cheklangan jamiyati quruvchilari tomonidan amalga oshirilmoqda. Obʼektda hozirgi kunda 6 ta brigada aʼzolari mehnat qilishmoqda va birinchi qavati qurilishini davom ettirishmoqda.

Loyihaga muvofiq ushbu qavatda yongʻinning oldini olishga qaratilgan 2 ta 30 metr kub hajmdagi suv hovuzi qurilishi kiritilganligi, bu ishlarni xavfsizlik qoidalariga amal qilgan holda amalga oshirish lozimligi batafsil tushuntirildi va bu borada yoʻriqnomalar tarqatildi.

Quruvchilar bilan profilaktik suhbatlashish jarayonida Behzod Allaberganov ularni qiziqtirgan savollarga ham batafsil javoblar berdi.

Bundan koʻzlangan maqsad – yangi qurilgan binolarda favqulodda baxtsiz hodisalar sodir boʻlishining oldini olish, binoning loyihaga muvofiq mukammal qurilishiga erishish natijasida koʻpgina koʻngilsizliklarning oldi olishiniga zamin yaratishdir.

Sevara Ismoilova, QDU talabasi.