Yoshlar oyligi doirasida hokim va yoshlar uchrashuvlari davom etmoqda

16-iyun kuni Amudaryo tumanining Daryoboʻyi mahallasi hududida joylashgan 21-sonli Bolalar musiqa va sanʼat maktabi binosida “Hokim va yoshlar uchrashuvi” boʻlib oʻtdi. Unda tuman hokimi Sultonboy Yoʻldashev, tuman Xalq qabulxonasi boʻlimi mudiri Erkin Rajabov, Oʻzbekiston Respublikasi Milliy gvardiyasi Qoraqalpogʻiston Respublikasi boshqarmasi boshligʻi Muxtor Yusupov, tegishli tashkilot masʼullari hamda 30 dan ortiq faol yoshlar ishtirok etishdi.

 Uchrashuv davomida tuman hokimi Sultonboy Yoʻldashev tarixan qisqa davrda Oʻzbekiston yoshlari erishgan muvaffaqiyat va yutuqlar zamirida davlatimiz tomonidan koʻrsatilayotgan katta gʻamxoʻrlik va yuksak eʼtibor mujassam ekanligini taʼkidladi.

 Qayd etilganidek, bugun mamlakatimizda yoshlarni har jihatdan barkamol qilib tarbiyalash, ularning salomatligini mustahkamlash, qobiliyatlarini roʻyobga chiqarish va bandligini taʼminlashga koʻmaklashish, boʻsh vaqtini mazmunli oʻtkazish, barcha sohalarda olib borilayotgan islohotlar jarayonidagi ishtirokini kengaytirish masalasiga davlat siyosati darajasida eʼtibor qaratilmoqda.

Ayniqsa, yuksak maʼnaviyatli, mustaqil fikrlovchi, qatʼiy pozitsiyasi, keng dunyoqarash va chuqur bilimlarga ega boʻlgan vatanparvar yoshlarni tarbiyalash, ularda turli mafkuraviy tahdidlarga qarshi immunitetni shakllantirish, sportga jalb qilish orqali ular orasida sogʻlom turmush tarzini targʻib qilish borasida hayotga tatbiq etilayotgan islohotlar oʻz samarasini bermoqda.

Uchrashuvda Oʻzbekiston Respublikasi Milliy gvardiyasi Qoraqalpogʻiston Respublikasi boshqarmasi boshligʻi Muxtor Yusupov tomonidan tumanda yoshlar oʻrtasida jamoat tartibini saqlash, huquqbuzarliklarga yoʻl qoʻymaslik, hamda yoshlarning murojaatlariga alohida eʼtibor qaratilayotgani oʻzining ijobiy natijasini berayotgani, shuningdek, hududlarda oʻtkazilayotgan “Hokim va yoshlar uchrashuvlari” yoshlarning hayotida uchrayotgan toʻsiq va muammolarning ijobiy hal etilishida muhim omil boʻlib xizmat qilayotgani eʼtirof etib oʻtildi.

Uchrashuvda yoshlar tomonidan turli mazmundagi 8 ta murojaat kelib tushdi.

Jumladan murojaatlar yer ajratilishi, tikuv mashinasi uchun hamda asbob-uskuna  uchun subsidiya ajratilishi, imtiyozli kredit olish, kontrakt toʻlovining qoplab berilishi, moddiy yordam koʻrsatilishi kabi masalalarda boʻldi.

Murojaatlar tegishliligi boʻyicha masʼullarga yuklatilib, ijrosi nazoratga olindi. Ochiq va samimiy ruhda oʻtgan uchrashuvda yoshlarga taalluqli barcha dolzarb masalalar muhokama qilindi.

Shu bilan birga yoshlar oʻzlarini qiziqtirgan masalalar, gʻoya va tashabbuslarini tuman hokimiga tugʻridan-toʻgʻri murojaat qilib yetkazishdi.

Uchrashuv yakunida tuman hokimi barcha yoshlarni yaqinlashib kelayotgan “Yoshlar kuni”ni bilan samimiy tabriklab, oʻqish va ishlarida muvaffaqiyat tiladi.

Tuman hokimligining Axborot xizmati.