Aholiga sanatoriyalarda davolanish uchun yoʻllanmalar berish sohasi yanada takomillashtirilmoqda

Soʻnggi yillarda mamlakatimizda aholiga davlat xizmatlarini koʻrsatish tizimi tubdan takomillashtirilib, sohada tub islohotlar amalga oshirilmoqda. Xususan, Oʻzbekiston Respublikasi Vazirlar Mahkamasining 2021-yilning 20-noyabr sanasida imzolagan “Aholiga sanatoriyalarda davolanish uchun yoʻllanmalar berish sohasiga axborot-texnologiyalarni joriy etish toʻgʻrisida”gi qarori xizmat koʻrsatish sohasidagi muhim hujjatlardan biriga aylanmoqda.

Mazkur qaror Oʻzbekiston Respublikasi Prezidentining “Aholiga davlat xizmatlari koʻrsatishning milliy tizimini tubdan isloh qilish chora-tadbirlari toʻgʻrisida”gi, “Jamiyatda ijtimoiy-maʼnaviy muhitni sogʻlomlashtirish, mahalla institutini yanada qoʻllab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari toʻgʻrisida”gi farmonlari hamda “Xizmatlar sohasini jadal rivojlantirish chora-tadbirlari toʻgʻrisida”gi qaroriga muvofiq, shuningdek, keksalar va nogironligi boʻlgan shaxslarga sanatoriylarda davolanish uchun yoʻllanmalar berish boʻyicha davlat xizmatlari koʻrsatish tizimini yanada takomillashtirish maqsadida imzolangan.

Qaror bilan quyidagilarni nazarda tutuvchi keksalar va nogironligi boʻlgan shaxslarga sanatoriylarda davolanish uchun yoʻllanmalar berish boʻyicha davlat xizmatlari koʻrsatishning maʼmuriy reglamenti tasdiqlangan:

a) keksalar va nogironligi boʻlgan shaxslarga Davlat xizmatlari markazlari orqali sanatoriylarda davolanish uchun yoʻllanmalarni berish boʻyicha davlat xizmati koʻrsatish tartibi;

b) keksalar va nogironligi boʻlgan shaxslar yoki ularning vakillari tomonidan sanatoriylarda davolanish uchun yoʻllanmalarni berish boʻyicha davlat xizmatidan foydalanish tartibi;

c) keksalar va nogironligi boʻlgan shaxslarga Davlat xizmatlari markazlari orqali sanatoriylarda davolanish uchun yoʻllanmalarni taqsimlash tartibi.

Shuningdek, 2022-yil 1-iyuldan boshlab ushbu qaror bilan tasdiqlangan maʼmuriy reglamentga muvofiq koʻrsatiladigan davlat xizmatlaridan foydalanish uchun jismoniy shaxslar faqat Davlat xizmatlari markazlari yoki Oʻzbekiston Respublikasi Yagona interaktiv davlat xizmatlari portali orqali murojaat qilishlari koʻrsatilgan.

Taʼkidlash kerakki, ushbu qaror aholiga yanada keng qulayliklar yaratib, ortiqcha ovoragarchiliklarning oldini olishni hamda sifatli davlat xizmatlarini amalga oshirishni taʼminlaydi.

Akmal Tursunboyev, tuman Davlat xizmatlari markazi katta mutaxassisi.