“Ayollar daftari”da turuvchi ayollarga huquqiy maslahatlar berildi

Keyingi yillarda xotin-qizlarga qaratilayotgan alohida eʼtibor va gʻamxoʻrlik sababli mamlakatimizda amalga oshirilayotgan islohotlar jarayonida shijoatli, fidoyi opa-singillarimiz faol ishtirok etib, Vatanimiz ravnaqi va taraqqiyoti uchun munosib hissa qoʻshib kelmoqda. Xususan, ijtimoiy, siyosiy jarayonlarda xotin-qizlarning toʻliq va teng huquqli ishtiroki taʼminlanmoqda. Davlat organlarining barcha boʻgʻinlarida qaror qabul qilish jarayonidan tortib, uni hayotga tatbiq etish jarayonigacha ular bevosita ishtirok etmoqda.

Shuningdek, joylarda har bir ijtimoiy koʻmakka muhtoj xotin-qizlar bilan manzilli ishlash maqsadida 2020-yildan boshlab “Ayollar daftari” tashkil etildi. Yaqinda Amudaryo tumanining Qilichboy ovul fuqarolar yigʻini binosida “Ayollar daftari”da turuvchi 50 dan ortiq ayol-qizlar bilan uchrashuv tashkil etildi.

Uchrashuvda Fuqarolik ishlari boʻyicha Amudaryo tumani sudi raisi Qayrulla Atamuratov, tuman hokimining oʻrinbosari Oila va xotin-qizlar boʻlimi boshligʻi Goʻzal Saburova, Jinoyat ishlari boʻyicha tuman sudining devonxona mudiri Elyor Jumaniyozovlar ishtirok etishdi. Shuningdek, yigʻilishda Qilichboy, Xolimbeg, Ayoqchi, Doʻrman, Qoramon, Boʻz solma, Tosh qalʼa, Besh ovul, Amir Temur va Xizr eli ovul hamda mahallalarida yashovchi “Ayollar daftari”ga kiritilgan fuqarolar, shu hududlarning faol xotin-qizlari qatnashdi.

Uchrashuv “Ayollar daftari”da turuvchi ayollarga huquqiy maslahatlar berish, mavjud muammo va kamchiliklarini oʻrganish hamda takliflarini tinglash maqsadida tashkil etildi.

 Maʼlumki “Ayollar daftari”ga 30 yoshdan oshgan, ijtimoiy himoyaga muhtoj, ishsiz, boquvchisini yoʻqotgan, mehnatga qobiliyatiga ega boʻlmagan, I guruh nogironligi bor, noturar joylarda istiqomat qilayotgan, qaramogʻida bir va undan ortiq I yoki II guruh nogironligi boʻlgan bolalari boʻlgan yolgʻiz ayollar shuningdek, tibbiy himoyaga, huquqiy yordam olishga muhtoj, tazyiq va zoʻravonlikdan jabrlangan, ijtimoiy muammolari mavjud hamda psixologik maslahatga muhtoj xotin-qizlar kiritiladi.

Uchrashuv davomida huquqiy maslahatga muhtoj xotin-qizlar tomonidan aliment undirish uchun qanday hujjatlar zarurligi, yashayotgan hovlisini kadastrdan oʻtkazish boʻyicha murojaatlar kelib tushdi. Fuqarolik ishlari boʻyicha tuman sudi raisi murojaatlar yuzasidan batafsil tushuntirish hamda tavsiyalar berib oʻtdi.

Undan tashqari, yigʻilishda tuman hokimi oʻrinbosari Goʻzal Saburova ayol-qizlarni qoʻllab quvvatlash har qachongidan ham yuqori darajaga koʻtarilganligini taʼkidlab, ayollar uchun yaratilayotgan imkoniyatlar haqida batafsil maʼlumot berdi.

Shundan soʻng, xududlardan kelgan “Ayollar daftari”ga kiritilgan 12 nafar ayol-qizlar oʻzlarini qiynayotgan, yechim topilmayotgan muammoldarini aytib, huquqiy yordam soʻrab murojaat qildilar. Murojaatlarning har biri boʻyicha Fuqarolik ishlari boʻyicha tuman sudi masʼullari tomonidan huquqiy tushuntirishlar berildi.

Darhaqiqat, xotin-qizlarni qoʻllab-quvvatlash jamgʻarmasining tashkil etilishi, kelgusi oʻquv yilidan boshlab magistraturada oʻqiyotgan qizlarning kontrakt pullari toʻliq byudjetdan qoplab berilishi hamda taʼlim kontraktlarini toʻlash uchun qizlarga ilk marotaba 7-yil muddatga foizsiz kredit berish tizimi joriy etilgani xotin-qizlar uchun koʻplab imkoniyat eshiklarini ochmoqda. Bu esa, oʻz navbatida, jamiyatning ijtimoiy-siyosiy hayotida xotin-qizlarning roli tobora mustahkamlanib borishida muhim asos boʻlib xizmat qiladi.

Q.Atamuratov, Fuqarolik ishlari boʻyicha tuman sudi raisi.

E.Jumaniyozov, Jinoyat ishlari boʻyicha tuman sudi devonxona mudiri.