Jasoratli mehnat samaralari

Bu yil tumanimiz paxtakorlari uchun, qolaversa doʻrmanlik paxtakorlar uchun kuz sahovati cheksiz boʻldi: koʻzni quvontiradigan yuksak "oq oltin” xirmonlari uyildi. Tumanimiz paxtakorlari 34 ming tonnaga yaqin yuqori navli paxta hosilini yigʻib-terib olib, ona Vatanga armugʻon qildi va Respublikamizda birinchi boʻlib yillik paxta tayyorlash shartnomaviy davlat rejalarini ortigʻi bilan bajardi. Bu albatta, paxtakorlarimizning jasoratli mehnati natijasidir. Aniqroq qilib aytganda, jasorat xirmonidir.

Har yili birinchi boʻlib gʻalaba tugʻini baland koʻtarishga odatlangan va buni eng yaxshi anʼanaga aylantirgan doʻrmanlik paxtakorlar sentyabr oyi boshidayoq tashabbusni qoʻlga olib, 14 ta fermer xoʻjaliklarining ming gektardan ziyod paxta maydonlarida paxta yigʻim-terim ishlarini uyushqoqlik bilan olib bordilar. Paxtazorlarda ikki mingdan ortiq terimchilar ter toʻkib mehnat qildilar va terim surʼatini kun sayin oshirdilar. Mavjud 14 ta fermer xoʻjaliklarining har birida bittadan paxta yigʻim-terim otryadlarining tashkil etilishi va faoliyat olib borishi terim surʼatini oshirishda asosiy omil boʻldi. Natijada qisqa muddatda "oq oltin” xirmonlari sarbaland boʻlib, yillik marra egallandi va davlat xazinasiga 2300 tonnadan ziyod yuqori navli paxta hosili yetkazib berildi.

- Bugungi katta mehnat gʻalabamizga har yili paxtadan moʻl hosil yetishtirib kelayotgan va 40 tsentnerchilik harakatining tashabbuskorlari boʻlgan "Kamoliddin Bekniyoz”, "Pirnazarov Toʻraboy”, "Matmurodov Botir”, "Pirmetov Bozorboy”, "Beshboyev Qurbongʻaliy” va "Ortiqov Rajabboy” fermer xoʻjaliklarida bugungi kunning oʻzidayoq, har gektar hisobiga 28-30 tsentnerdan xirmon koʻtarildi. Paxtazorlarimizda hosil hali moʻl. Yigʻim-terim ishlarini yanada qizitib, 3 ming tonnalik yuksak majburiyatimizni ham tez kunda bajarib xirmonlarga baraka kiritamiz, - deydi. Y.Oʻrozboyev nomidagi MMTP rahbari Ulugʻbek Oʻrozboyev faxr bilan.

Xoʻjalikdagi 40 tsentnerchilik harakatining tashabbuskorlaridan biri Qurbongʻaliy Beshboyev boshqargan "Beshboyev Qurbongʻaliy” fermer xoʻjaligida paxta yigʻim-terim ishlari avj pallasiga chiqqan. Paxtazorlarda har kuni 150-160 nafar chaqqon qoʻlli terimchilar unumli mehnat qilishmoqda. Paxtazorlar bugungi kunda goʻyo qaynoq mehnat maydoniga aylangan.

- Ha, bugungi kunda hammamizning oʻrnimiz paxtazorlarda. Peshona terlarimiz bilan yetishtirgan moʻl paxta hosilimizni qanchalik tez yigʻib-terib olsak, shunchalik qoʻlimiz baland, yuzimiz yorugʻ, daromadimiz moʻmay boʻladi. 67 gektar paxta maydonidan 200 tonnadan ortiq yuqori navli paxta hosilini yigʻib-terib olib marradan oshdik. Birinchi terimdayoq hosildorlik har gektar hisobiga 30 tsentnerga yetdi. Paxtazorlarimizdagi qolgan hosilni yigʻib terib olsak, hosildorlik 40 tsentnerdan ham oshib ketadi, - deydi ilgʻor fermer Qurbongʻaliy Beshboyev ishonch bilan.

Dala - tashkiliy ishlar bilan band boʻlgan 177-paxta yigʻim-terim otryadining rahbari Otamurod Yusupov ilgʻor terimchilar haqida faxru iftixor bilan gapira ketdi:

- Goʻzal Qurbonova, Muqaddas Yusupova, Shirin Soatova, Erkinoy Yoʻldosheva, Sharofat Oʻrozaliyeva, Yorqinoy Qurbonboyeva, Zubayda Abdullayeva, Nilufar Bobojonovalar har kuni 180-200 kilogrammdan paxta terib bermoqdalar, - deydi 177-paxta yigʻim-terim otryadi rahbari Otamurod Yusupov.

Qobul Shomurodov.

M.Habibullayev olgan surat.