BOʻLFUSI ARXITEKTOR

Mamlakatimizda yoshlarga berilayotgan eʼtiborni koʻrib, biz yoshlarning ijodga, ilm olishga boʻlgan ishtiyoqimiz tobora ortmoqda. Ayniqsa, mana shunday iqtidorli yoshlarni izlab topish hamda ularning maʼlum sohaga boʻlgan qiziqishini oshirish, isteʼdodini kamol toptirish maqsadida koʻplab koʻrik-tanlovlar oʻtkazib kelinmoqda. Mana shunday koʻrik-tanlovlardan biri – "Kamolot” YoIH tomonidan oʻtkazilayotgan "Yurt kelajagi iqtidorli yoshlar qoʻlida” koʻrik-tanlovidir. Bu tanlovda 14 yoshdan 25 yoshgacha boʻlgan oʻgʻil-qizlar oʻzlari qiziqqan yoʻnalish va nominatsiyalar boʻyicha isteʼdodlarini namoyish qiladilar.

Xuddi mana shu tanlovning tuman bosqichida faxrli oʻrinlarni egallagan 18 nafar amudaryolik yoshlar respublika bosqichiga yoʻl oldilar. Tanlovning respublika bosqichida qatnashgan ishtirokchilarning bir qanchasi "Eng faol qatnashgan ishtirokchi” deb topilib, diplombilan taqdirlandilar. 3 nafar ishtirokchi esa tanlovning Oʻzbekiston respublikasi bosqichiga yoʻllanmani qoʻlga kiritdilar. Mana shunday baxtga musharrafboʻlgan ishtirokchilarning biri hozirgi kunda Mangʻit Iqtisodiyot kasb-hunar kollejining 9-12 guruhida tahsilolayotgan Ixlos Yeshniyozovdir.

U shu tanlovning "Arxitektura va interer dizayni” yoʻnalishida oʻzining yasagan ikki qavatli uy maketi bilan ishtirok etdi.

Ushbu maketga hakamlar hayʼati tomonidan yuqori baho berildi va Ixlosni faxrli ikkinchi oʻringa loyiq, deb topishdi. Tanlov gʻoliblari eʼlon qilinayotgan paytda "Amudaryo tumanidan” deya taʼrif berilib uning ism, familiyasi aytilganida koʻzlaridan yosh chiqib ketdi. Albatta bu quvonch yoshlari edi. Ixlos maktabda oʻqib yurgan kezlaridayoq koʻplab tanlovlar gʻolibi edi. Uning musiqaga, chizmachilikka boʻlgan mehri boʻlakcha. U skripkada kuy chalganida beixtiyor toʻlqinlanib ketardik. Ixlosning musiqaga boʻlgan ixlosini koʻrib, nazarimda sinfdoshim mashhur skripkachi boʻladi, deb oʻylardim, ammo uning arxitekturaga boʻlgan ishtiyoqi boʻlakcha. Kollejni tamomlab, arxitektura boʻyicha oʻz izlanishlarini davom ettirmoqchi.

Bir yozuvchi "Noʻnoq haykaltarosh tirik odamni shohsupaga chiqarib qoʻysa ham oʻlikka oʻxshaydi, haqiqiy haykaltaroshning oʻlik toshdan yasagan haykali ham tirikka oʻxshaydi. Talant degani shu!” deb yozgan edi. Haqiqatan ham Ixlosni haqiqiy isteʼdod egasi deyish mumkin. Sababi uning chalgan musiqalarida, yasagan maketlarida oʻzgacha maʼno bor.

Jamiyatimizda mana shunday tinib-tinchimas ijodkor yoshlar koʻp, ular vaqtni, hayotni qadrlashadi. Agar tengdoshlarim vaqtini boʻlmagʻur narsalarga sarflab, yoshligini bekorchilikda oʻtkazayotgan boʻlishsa, ularga tilagim shunday: izlaning, aziz yoshlar! Inson kelajagini oʻz qoʻli bilan yaratadi. Shunday ekan, hunar egallashga oshiqing, ilm olishga intiling!

Aziza MADRAHIMOVA.