MAʼMURIY NAZORAT OʻRNATIShGA DOIR SUD MAJLISI OʻTKAZILDI
Maʼmuriy nazorat – nazorat ostidagi shaxslarga sud tomonidan belgilanadigan maʼmuriy cheklovlarni qoʻllashdan iborat tarbiyaviy-profilaktik taʼsir koʻrsatish choralaridir. Sud tomonidan belgilangan muddat mobaynida maʼmuriy nazorat oʻrnatilgan shaxs oʻz hududidagi ichki ishlar organlarining muntazam nazoratida boʻladi.
Yaqinda Amudaryo tumani Ichki ishlar boʻlimining majlislar zalida Jinoyat ishlari boʻyicha tuman sudi tomonidan Ichki ishlar boʻlimining huquqbuzarliklar profilaktikasi boʻlimida hisobda turgan muqaddam sudlangan fuqarolarga nisbatan maʼmuriy nazorat oʻrnatish toʻgʻrisidagi taqdimnomalariga asosan ish materiallari koʻrib chiqildi. Unda Jinoyat ishlari boʻyicha tuman sudi raisi Jasur Oʻrazboyev, sudya yordamchisi Elyor Jumaniyozov, tuman Ichki ishlar boʻlimi masʼullari va profilaktika inspektorlari, voyaga yetmaganlar masalalari boʻyicha inspektor-psixologlar ishtirok etdilar.
Dastlab masʼullar “Jazoni ijro etish muassasalaridan ozod etilgan ayrim toifadagi shaxslar ustidan maʼmuriy nazorat oʻrnatish tugʻrisida”gi Oʻzbekiston Respublikasi Qonuni va unda belgilangan talablar, maqsadi kabilar toʻgʻrisida tushunchalar berishdi. Qonunga muvofiq, maʼmuriy nazorat voyaga yetgan shaxslarga sud tomonidan oʻrnatilishi, yaʼni oʻta xavfli retsidivistlar, ogʻir yoki oʻta ogʻir jinoyatlar sodir etganlik uchun ozodlikdan mahrum qilingan shaxslar, shu jumladan boshqa davlatlarda ozodlikdan mahrum qilinganlar, qasddan qilingan jinoyatlari uchun ikki yoki undan ortiq ozodlikdan mahrum qilinganlarga nisbatan qoʻllanilishini bayon etdilar.
Undan tashqari, tumanda jinoyatchilik va huquqbuzarlikning oldini olishda tegishli davlat organlari va tashkilotlar bilan xamkorlikda profilaktik va targʻibot ishlari olib borilayotgani xususida soʻz yuritdilar. Shuningdek, hududlarda voyaga yetmaganlar va yoshlar oʻrtasida jinoyatchilik, huquqbuzarliklarning oldini olish maqsadida tuman Ichki ishlar boʻlimining Huquqbuzarliklar profilaktikasi boʻlinmasi, voyaga yetmaganlar masalalari boʻyicha inpektor-psixologlari tomonidan targʻibot-tashviqot ishlari olib borilayotgani taʼkidlab oʻtdilar.
Boʻlib oʻtgan sud majlisida mazkur Qonunning talabidan kelib chiqib, muqaddam ogʻir jinoyat sodir qilganligi uchun jazo muddatini oʻtab kelgan 1 nafar shaxs ustidan maʼmuriy nazorat oʻrnatildi. Ushbu fuqaroning kelgusida turmush tarzi va xulq atvorini nazorat qilish, qayta jinoyat yoki huquqbuzarliklar sodir qilishiga yoʻl qoʻymaslik maqsadida kunning belgilangan vaqti davomida yashash uyidan chiqish, spirtli ichimliklar qoʻyib sotiladigan joylar, yaʼni kafe va shu kabi boshqa ovqatlanish joylarida boʻlish, ichki ishlar boʻlimining ruxsatisiz hududdan chiqib ketish, alkogolli ichimliklar isteʼmol qilmaslik kabi cheklovlar oʻrnatildi. Shuningdek, unga maʼmuriy nazoratdan boʻyin tovlash maqsadida hududdan oʻzboshimchalik bilan chiqib ketsa, oʻrnatilgan cheklovlarni buzsa qayta javobgarlikka tortilishi tushuntirildi.
Sud majlisi davomida tumandagi mahallalardan birida yashovchi yana bir fuqaroning bezorilik qilib, koʻchada yurish-turish qoidalarini buzganligiga doir ish ham koʻrildi. Ushbu fuqaro Oʻzbekiston Respublikasi Maʼmuriy javobgarlik toʻgʻrisidagi kodeksning 183-moddasida koʻrsatilgan huquqbuzarlikni sodir qilganlikda ayblandi va unga nisbatan 15 kunlik maʼmuriy qamoq jazosi berildi.
O.Qosimov, tuman IIB HPB boshligʻi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
