“Yashil makon” loyihasi doirasida sektorlar rahbarlari daraxt koʻchatlarini oʻtqazdi

Inson uchun yashab turgan maskanini yashillikka burkashdan ulugʻ ish yoʻq. Xalqimizda koʻchat ekkan, bogʻ yaratgan insonlarni qadrlashgani, hurmatini joyiga qoʻyishgani ham bunga aniq misol boʻla oladi. Binobarin, ekilgan har bir koʻchat zamirida bozorlarimiz toʻkinchiligi, qurilish materiallari sanoati, yerni erroziyadan saqlash, oʻzimiz nafas olayotgan kislorodni ishlab chiqarish va yurtga chiroy hamda fusunkorlik kasb etishi bilan muhim ahamiyatga ega.

Ushbu maqsad va vazifalardan kelib chiqqan holda, Muhtaram Prezidentimiz tashabbuslari bilan 25-martdan 5-maygacha koʻchat ekish boʻyicha “Dolzarb 40 kunlik” eʼlon qilindi.

Respublikamizning barcha hududlari singari “Yashil makon” loyihasi doirasidagi tadbirlar Amudaryo tumanida ham uyushqoqlik bilan oʻtkazilmoqda. Mazkur loyiha doirasida daraxtlarni ekish, parvarishlash va koʻkalamzorlashtirish ishlari hamda mahallalardagi koʻp-qavatli uylar atrofi, markaziy koʻchalarda, qishloqlarda obodonlashtirish ishlari olib borilmoqda.

30-mart kuni Amudaryo tumani prokurori Aziz Roʻzmetov, Ichki ishlar boʻlimi boshligʻi Ulugʻbek Xudoyberganov, Davlat soliq inspektsiyasi boshligʻi Aydos Seitov, Xalq taʼlimi boʻlimi boshligʻi Akmal Ismailov, Majburiy ijro byurosi tuman boʻlimi va boshqa qator tashkilotlar mutasaddilari tuman obodonlashtirish boʻlimi hamda Ekologiya va atrof-muhitni muhofaza qilish boʻlimi xodimlari ishtirokida Farovon mahallasi hududida joylashgan 87-sonli maktab oldida tashkil qilinayotgan yashil hududga mevali va manzarali daraxt koʻchatlarini ekdilar.

Aytish kerakki, sektor rahbarlari tomonidan ushbu hayrli ishga hissa qoʻshilishi yosh avlodga har tomonlama oʻrnak va namuna boʻldi.

“Yashil makon” loyihasining tadbiq etilishi faqatgina atrof-muhitni koʻkalamzorlashtirish uchun emas balki, xalqimizning azaliy qadriyatlarini yoshlar qalbiga chuqur singdirishi bilan ham ahamiyatlidir.

 Muhtaram Prezidentimiz taʼkidlaganidek, “Yashil makon” umummilliy loyihasi bir yillik tadbir emas. Uning doirasida kelgusi besh yilda 1 milliard tup daraxt koʻchatini ekilishi maqsad qilingan. Bu umummilliy harakatning natijasi har bir mahallada koʻrinishi hamda har bir yurtdoshimiz bu savobli ishga oʻzining munosib hissapsini qoʻshishi kerak.

Qolaversa, atrof-muhitni obodonlashtirish va koʻkalamzorlashtirish faqatgina Ekologiya va atrof-muhitni muhofaza qilish qoʻmitasi xodimlarining vazifasi emas. Shunday ekan, keling har birimiz oʻzimiz yashab turgan hovli, koʻcha va mahalladagi yoʻl boʻylariga, oʻzimiz mehnat qilayotgan korxona yoki tashkilot hududiga koʻchat ekib, yon-atrofimizni yashil makonga aylantirishga hissa qoʻshaylik. Koʻchat ekish boʻyicha “Dolzarb 40 kunlik” davrida faollik koʻrsatib, “Yashil makon” umummilliy loyihasi doirasidagi tadbirlarda uyushqoqlik bilan ishtirok etaylik. Zero, bizdan kelgusi avlodga faqatgina obod goʻshalar meros boʻlib qolsin!

Tuman hokimligining Axborot xizmati