Probatsiya hisobidagi yoshlar bilan uchrashuv boʻlib oʻtdi

Davlatimiz tomonidan amalga oshirilayotgan islohotlar, eng avvalo, inson, uning manfaatlari, huquqlari va erkinliklarini himoya qilishni taʼminlash uchun xizmat qilmoqda. Tobora ravnaq topib borayotgan yurtimizda azaldan insonparvarlik tamoyillari, inson shaʼni va qadri oliy masala sifatida alohida eʼtiborga olingan.

Ichki ishlar organlarining Probatsiya xizmati tashkil etilgandan buyon jazolarning bajarilishi nazorat qilinishi barobarida, ushbu toifa shaxslarni ijtimoiy hayotga moslashtirish, ularning bandligini taʼminlash, oʻqishga va ishga joylashtirish, nazorat ostidagilarga ijtimoiy, huquqiy va psixologik yordam koʻrsatish, eng asosiysi, shaxsni tarbiyalash masalalariga eʼtibor qaratilib kelinmoqda. 

 Mamlakatimizda Probatsiya boʻlinmalari nazoratida turgan mahkumlar oʻrtasida ichki ishlar organlarining boshqa sohaviy xizmatlari, fuqarolarning oʻzini oʻzi boshqarish organlari va boshqa jamoatchilik tuzilmalari bilan hamkorlikda profilaktik tadbirlar amalga oshirilib, qayta huquqbuzarlik va jinoyatlar sodir etilishining oldi olinmoqda.

Joriy yilning 25-mart kuni Amudaryo tumani Ichki ishlar boʻlimining katta majlislar zalida jami 39 nafar Probatsiya hisobidagi yoshlar bilan uchrashuv tashkil etildi.

Maʼlumot uchun aytib oʻtish kerakki, Ichki ishlar organlarining probatsiya xizmati boshqa huquqni muhofaza qilish organlari, Bandlik va mehnat munosabatlari, Sogʻliqni saqlash, Xalq taʼlimi, Oliy va oʻrta maxsus taʼlim vazirliklari ularning quyi boʻgʻinlari bilan hamkorlikda ish olib boradi. Shuningdek, “Mahalla” xayriya jamoat fondi, “Nuroniy” jamgʻarmasi, Xotin-qizlar qoʻmitasi, Vazirlar Mahkamasi huzuridagi “Oila” ilmiy-amaliy tadqiqot markazi, Yoshlar ishlari agentligi hamda Yoshlar ittifoqi bilan doimiy ravishda hamkorlik yoʻlga qoʻyilgan.

Uchrashuvga Amudaryo tumani prokurori katta yordamchisi 3-darajali yurist Abboz Niyazimbetov, Amudaryo tumani prokurori yordamchisi 2-darajali yurist Sanjar Xalmuratov, tuman IIB boshligʻining oʻrinbosari jamoat xavfsizligi xizmati boshligʻi Muhtor Raxmatullayev hamda Yoshlar ishlari agentligi Amudaryo tumani boʻlimi bosh mutaxassisi Sardor Kuraboyevlar qatnashdi.

 Uchrashuv davomida  Amudaryo tumani prokurori katta yordamchisi Abboz Niyazimbetov tomonidan Probatsiya xizmatining vazifalari haqida keng turda maʼlumotlar berib oʻtildi.

Shundan soʻng, tuman Ichki ishlar boshligʻining oʻrinbosari Muxtor Raxmatullayev tomonidan probatsiya nazoratidagi shaxslarning ijtimoiy moslashuviga, oʻqish va ishga joylashishiga hamda ularga huquqiy va psixologik yordamlar muntazam ravishda koʻrsatilishi aytib oʻtildi.

Bunday uchrashuvlarni oʻtkazishdan maqsad fuqarolarning toʻgʻri yoʻldan adashmasliklari, jamiyatda oʻz oʻrnini topib Vatan koriga yaraydigan inson boʻlib yetishishlari uchun maslahat va koʻmak berishdan iboratdir.

Tuman hokimligining Axborot xizmati