36-SONLI MAKTABDA NAFOSAT VA GOʻZALLIK BAYRAMIGA BAGʻIShLANGAN TADBIR OʻTKAZILDI

Tarovatli bahor yurtimizga oʻz goʻzalliklari bilan birga bayramlarni ham boshlab keladi. Koʻklamning ilk kunida atoqli shoira Zulfiyaxonimning tavallud kuni nishonlansa, 8-martda nafosatli ayol-qizlar bayrami, shundan soʻng, Navroʻzi olam va boshqa bayramlar davom etadi. Ayniqsa, 8-mart – Xalqaro xotin-qizlar kuni munosabati bilan oʻtkaziladigan tadbirlar barchaga koʻtarinki kayfiyat baxsh etib, navbatdagi bayramlar tadoriklariga ulanib ketadi.

 7-mart kuni barcha hududlardagi kabi 36-sonli maktabda ham 8-mart – Xalqaro xotin-qizlar kuniga bagʻishlangan bayram tadbiri boʻlib oʻtdi. Bayram tadbiriga maktabda faoliyat olib borayotgan barcha ayollar va oʻquvchi-qizlar taklif etildi.

Tadbirni oʻquv ishlar boʻyicha direktor oʻrinbosari Sarvar Qutlimurodov ochib berdi va asrlar davomida xalqimiz tomonidan onalarni, ayol-qizlarni eʼzozlash ezgu qadriyatlardan biri sifatida alohida qadrlanishini, mehr-oqibat va odamiylikning ilk saboqlari har birimizning yuragimizga ona allasi bilan kirib, hayot soʻqmogʻi va turmush darsi, oila totuvligi mehribon onalarimiz tarbiyasidan, opa-singillarimiz muhabbatidan boshlanishni taʼkidlab oʻtdi.

Undan tashqari, bugungi kunda mamlakatimizda xotin-qizlarga berilayotgan eʼtibor, koʻrsatilayotgan ehtirom va gʻamxoʻrliklar haqida gapirib, aynan taʼlim sohasida mehnat qilayotgan xotin-qizlarning faoliyatlari haqida ijobiy fikrlar aytib, munosabat bildirib oʻtdi. Shuningdek, shu maktabda faoliyat yuritib kelayotgan xotin-qizlarni ushbu bayram bilan chin yurakdan qutladi. Ularni goʻzallik va nafosat, samimiylik va bahor ayyomi bilan muborakbod etib, sogʻlik-salomatlik, oilaviy baxt va bahoriy goʻzallik tiladi.

Shundan soʻng, maktabning boshlangʻich sinflari oʻqituvchilari Nasiba Bobojonova, Saragul Yusupova, Malohat Rahimova, Barno Matsapoyeva, Barchinoy Xoʻjamurodova, Farida Saidova, Barno Ibodullayevalar tomonidan tashkil etilgan tadbirning badiiy-musiqiy qismi boshlandi.

Bahoriy gullar, bezaklar bilan bezatilgan sahnada oʻquvchilar ayol, onalarni ulugʻlovchi sheʼrlarni ifodali yod aytib berdilar. Shu mavzudagi qoʻshiqlar, dilrabo raqslar nafosat egalariga yanada koʻtarinki kayfiyat bagʻishladi. Oʻquvchilar “Onajon”, “Qizaloq” qoʻshiqlarini aytib, “Bahor valsi”, “Doʻppi tikdim”, “Binafsha” raqslarini ijro etdilar. Ayniqsa, “Lazgi” va zamonaviy qoʻshiqlar raqslari barchaga juda manzur boʻldi.

Tadbir davomida boshlovchilik qilgan oʻquvchilar ham yurtimizda Prezidentimiz boshchiligida xotin-qizlarni qoʻllab-quvvatlash davlatimizning asosiy yoʻnalishlaridan biriga aylangani, Zulfiya nomidagi Davlat mukofoti mamlakatimiz iqtidorli qizlarini aniqlash, qoʻllab-quvvatlash, ragʻbatlantirish, yangi marralar sari har sohada yetuk boʻlishlariga zamin yaratayotgani, buni ularning ilm-fan, taʼlim, sogʻliqni saqlash, ishlab chiqarish, sanʼat, adabiyot va boshqa sohalar rivojiga oʻz hissalarini qoʻshayotganliklari, yetakchilar qatoriga chiqayotganliklari misolida koʻrish mumkinligini eʼtirof etdilar. Shuningdek, oʻzlariga qadrli boʻlgan ustozlarga, maktab oʻquvchi-qizlariga oʻzlarining samimiy tilaklarini bildirib, bayram bilan tabrikladilar.

Shundan soʻng, yana diltortar kuy-qoʻshiqlar ijro etilib, barchaga xushnudlik, bahoriy va bayramona kayfiyat ulashildi.

O.Xudoyberganova, 36-sonli maktabning ijodiy-madaniy masalalar boʻyicha targʻibotchisi.