Oʻrta qalʼa ovul fuqarolar yigʻinining Yoshlar yetakchisi faoliyatiga bir nazar

Mamlakatimizda yoshlarning ijtimoiy-siyosiy faolligini oshirish, ularga zarur shart-sharoitlar yaratish, intilish va qobilyatlarini qoʻllab-quvvatlashga qaratilgan koʻplab chora-tadbirlar amalga oshirilmoqda. Ayniqsa, yoshlar bilan ishlashning yangicha boshqaruv mexanizmlarini joriy etish, ular bilan ishlashning vertikal tizimini yaratish, yoshlar muammolarini bevosita mahallalarda hal etish maqsadida muhtaram Prezidentimiz tomonidan shahar, qishloq, hamda ovullardagi har bir mahallada yoshlar yetakchisi lavozimi joriy etildi.

Amudaryo tumanidagi 49 ta mahalla va ovul fuqarolar yigʻinlarida bugun 49 nafar Yoshlar yetakchilari faoliyat olib borishmoqda. Ularga oʻz mehnat faoliyatini samarali tashkil etishlari uchun munosib shart-sharoitlar yaratilib, zarur texnik vositalar bilan toʻliq taʼminlangan.

Yoshlar yetakchilari oʻz ish faoliyatini boshlaganiga koʻp vaqt boʻlmadi. Ammo, bir oydan oshiq vaqt davomida oʻz mahallasi hududidagi yoshlar bilan bevosita muloqot qilib, mavjud muammo va takliflarini tizimli ravishda oʻrganishmoqda.

Jumladan, Oʻrta qalʼa ovul fuqarolar yigʻini Yoshlar yetakchisi Nigora Saidmurotova tomonidan yoshlar balansini shakllantirish, mahallaning “Yoʻl xaritasi”ni ishlab chiqish hamda “Yoshlar daftari” ni yuritish boʻyicha 30 yoshgacha boʻlgan yoshlarni xatlovdan oʻtkazish, ularning har biriga soʻrovnoma toʻldirish, muammo va takliflarini oʻrganib, tegishli choralar koʻrish yuzasidan tizimli ishlar amalga oshirilmoqda.

Shuningdek, Oʻzbekiston Respublikasi Prezidentining “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida”gi qarori ijrosini taʼminlash maqsadida 10-fevral kuni tumanimizning 2-sektori hududida Yoshlar forumi boʻlib oʻtdi. Forum doirasida “Salomatlik uchun besh ming qadam”, ertalabki badantarbiya mashqlari va turli sport musobaqalari, “Zakovat” intellektual oʻyini, “Yosh kitobxon” tanlovlari oʻtkazildi. Bundan tashqari, tumandagi harbiy qismda xizmat burchini oʻtayotgan harbiylarning chiqishlari, kechki kontsert dasturi va gulxan yoqish marosimlari ham boʻlib oʻtdi. Butun kun davomida oʻtkazilgan tadbirlar barcha yoshlar dilida oʻzgacha taassurot qoldirdi. Forumga 1000 nafarga yaqin yoshlar qamrab olindi.

Maʼlumot uchun, Oʻrta qalʼa ovul fuqarolar yigʻinida 1017 nafar yoshlar istiqomat qilishadi. Shu oʻrinda aytish joizki, yoshlarning boʻsh vaqtlarini mazmunli oʻtkazish uchun ovul hududida barcha sharoitlar yaratilgan. Hududdagi umumtaʼlim maktablarining sport zallari, informatika xonalari va kutubxonalardan ovul yoshlari ham foydalanishlari mumkin.

Bugun yoshlarning taʼlim olishi, kasb-hunar egallashi, yetuk insonlar boʻlib ulgʻayishi yoʻlida zamonaviy shart-sharoitlarni yaratib berish uchun Oʻzbekiston bor kuch va imkoniyatlarini ishga solmoqda.

Chunki, yosh avlodni har tomonlama qoʻllab-quvvatlash, maʼnaviy yetuk, jismonan sogʻlom, vatanparvar va fidoyi etib tarbiyalash, huquq hamda manfaatlarini himoya qilishga eʼtibor qancha kuchaytirilsa, uning samarasi ham shuncha yuqori boʻladi. Ushbu vazifalar ijrosini taʼmnlash uchun mahalladagi Yoshlar yetakchilari bor kuch va gʻayratini safarbar qilmoqda.

Biz ularga masʼuliyatli va shu bilan birga sharafli kasblarida muvaffaqiyatlar tilaymiz.

Tuman hokimligining axborot xizmati.