56-sonli maktabda “Oila-mahalla-taʼlim muassasasi" hamkorligi jamoat Kengashining kengaytirilgan yigʻilishi oʻtkazildi

Har tomonlama barkamol, komil insonni tarbiyalash jamiyatimiz oldida turgan dolzarb masalalardan biri boʻlib kelmoqda.

Yosh avlodni maʼnaviy-axloqiy, maʼdaniy-maʼrifiy jihatdan yetuk insonlar qilib tarbiyalash ishi birinchi navbatda oiladan boshlanadi. Bu borada barkamol avlodni tarbiyalashda ota-ona, mahalla va taʼlim muassasalarining hamkorligi muhim ahamiyat kasb etadi.

 Ayniqsa, ushbu hamkorlikni toʻgʻri yoʻlga qoʻyish – oʻsmirlar orasida qarovsizlik, huquqbuzarlik va jinoyatchilikning oldini olishda muhim tarbiya vositasidir. Bolaning qanday inson boʻlib voyaga yetishi ota-ona tarbiyasi va atrof-muhit tasiriga bogʻliq.

Bola tarbiyasida ularning yosh jihatiga, ruhiyat va tushunchasiga, feʼl-atvoriga alohida ahamiyat berish zarurdir. Ushbu talab asosida mamlakatimizda jismonan sogʻlom, bilim va tafakkuri oʻtkir, maʼnaviyatli, aniq kasbga va mutaxassislikka ega, gʻoyaviy sobitqadam farzandlar, yaʼni barkamol avlod modeli yaratildi va uni shakllantirish davlat siyosati darajasiga koʻtarildi.

2012-yilning 19-iyunida Oʻzbekiston Respublikasi Vazirlar mahkamasining “Barkamol avlodni tarbiyalashda oila instituti va fuqarolarning oʻzini oʻzi boshqarish organlarining taʼlim muassasalari bilan oʻzaro hamkorligini yanada rivojlantirish chora-tadbirlari toʻgʻrisida”gi qarori qabul qilinib, Xalq taʼlimi Vazirligi huzuridagi “Oila-mahalla-taʼlim muassasasi” hamkorligi Jamoat kengashi faoliyatiga asos solingan edi.

Mana shu davrdan boshlab barcha joylarda tashkil etilgan “Oila-mahalla-taʼlim muassasasi” hamkorligi jamoat kengashlari oʻzlarining yillik rejalariga asosan muvaffaqiyatli faoliyat yuritib kelmoqda.

Joriy yilning 5-fevral kuni 56-sonli maktab huzurida faoliyat koʻrsatayotgan “Oila-mahalla-taʼlim muassasasi” hamkorligi jamoat Kengashining kengaytirilgan yigʻilishi oʻtkazilib, unda jamoat Kengashi aʼzolari va Mangʻit shahrida joylashgan bir qator taʼlim muassasalari vakillari ishtirok etdilar.

Ushbu yigʻilishda bugungi kunning dolzarb masalasi – “Oila-mahalla-taʼlim muassasasi” hamkorligi mexanizmini yanada takomillashtirish masalasi muhokama etildi.

Yigʻilishni maʼnaviy-maʼrifiy ishlar boʻyicha maktab direktori oʻrinbosari Rohatoy Xudayberganova ochdi va olib bordi. Yigʻilishda maktab direktori, jamoat Kengashi raisi Arzigul Xudayberganova kun tartibidagi masala yuzasidan maʼruza qildi.

Maʼruza yuzasidan boʻlgan muzokaralarda jamoat Kengashi aʼzosi, Durunki mahalla fuqarolar yigʻini raisining oila, xotin-qizlar, ijtimoiy masalalar boʻyicha oʻrinbosari Gavhar Mingboyeva, jamoat Kengashi aʼzosi, maktabning ota-onalar qoʻmitasi raisi Gulnazira Salayeva, jamoat Kengashi aʼzosi, ota-onalar vakili Omongul Qayupova, 1-sonli maktab direktorining maʼnaviy-maʼrifiy ishlar boʻyicha oʻrinbosari Guliston Madraximova, jamoat Kengashi aʼzosi, shifokor Mehri Husainova, jamoat Kengashi aʼzosi, maktab psixologi Doniyor Yoʻldoshev, 8-sonli maktabgacha taʼlim muassasasi xodimi Mavluda Allamberganova va jamoat Kengash aʼzosi, sinf rahbari Soliya Yusupovalar ishtirok etdilar.

Yigʻilish yakunida muhokama etilgan masala yuzasidan tegishli qaror qabul qilindi.

Allambergan Jumaniyozov.