HOKIM YoRDAMChISI OʻZ IShINI NAMUNALI TARZDA TAShKIL ETMOQDA

Maʼlumki Prezidentimiz tomonidan “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish boʻyicha davlat siyosatining ustuvor yoʻnalishlari toʻgʻrisida”gi farmon imzolandi. Ushbu farmonga muvofiq 2022-yil 1-yanvardan boshlab shaharcha, qishloq, ovullardagi har bir mahallalarda tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha tuman va shahar hokimlarining yordamchisi lavozimi taʼsis etildi.

Hokim yordamchilari zimmasiga aholining bandlik darajasini taʼminlash, mahallada tadbirkorlikni rivojlantirish, ishsiz yoshlar va ayol-qizlarni kasb-hunarga oʻqitish, mahallada hizmat koʻrsatish turlarini yanada kengaytirish, tadbirkorlik qilish istagidagi fuqarolarga imtiyozli kredit olishda yordam berishdek masʼuliyatli vazifalar yuklatilgan.

Amudaryo tumanida joylashgan Bosuv mahallasiga biriktirilgan tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha tuman hokimi yordamchisi Akbarjon Xoʻjamuratov ham oʻz zimmasiga yuklatilgan vazifalar ijrosini taʼminlash maqsadida mahalladagi ijtimoiy-iqtisodiy holatni “xonadonbay” oʻrganish ishlarini boshlab yubordi.

Hokim yordamchilari ish faoliyatini boshlaganiga qisqa muddat, yaʼni 4-5 kun boʻlganiga qaramasdan Akbarjon Xoʻjamuratov tomonidan mahalladagi 70 dan ortiq honadon xatlovdan oʻtkazildi. Rejaga koʻra, oʻrganish ishlari fevral oyida yakunlanib, mahallaning oʻsish nuqtalari va ixtisoslashuvi aniqlanadi va yoʻl xaritasi ishlab chiqiladi.

Maʼlumot uchun, Bosuv mahallasida jami aholi soni 3720 nafar boʻlib, shundan 1842 nafarini ayollar, 1655 nafarini yoshlar tashkil etadi. Ishsiz fuqarolar soni 140 nafar.

Mahalla aholisi daromadi asosan dehqonchilik, bogʻdorchilik, parrandachilik va chorvachilikka ixtisoslashgan. Shu sababdan aholiga issiqxonalar qurishida, dehqonchilik va chorvachilik bilan shugʻillanishida imtiyozli kredit va subsidiyalar ajratilishi boʻyicha harakatlar amalga oshirilmoqda.

Bundan tashqari, hokim yordamchisi tomonidan tadbirkorlik qilish istagidagi fuqarolarga loyihalar ishlab chiqishda ham amaliy yordam koʻrsatilmoqda. Jumladan, mahalla hududidagi 4-Ulugʻyoʻl koʻchasida istiqomat qiluvchi fuqaro Oʻrinboy Bobojanov oʻz xonadonida maktabgacha taʼlim muassasasi tashkil qilishi uchun 200 mln. soʻm kredit ajratilishida yordam soʻrab hokim yordamchisiga murojaat qildi.

2-Ulugʻyoʻl koʻchasida yashovchi fuqaro Begzod Bazarboyevga esa temir eshiklar va darvozalar yasash tsexini tashkil etishda huquqiy yordam berish masalasi koʻrib chiqilmoqda.

Yana bir fuqaro – Maxsud Joʻrayevning xonadonida issiqxona tashkil etish boʻyicha choralar belgilandi va amaliy koʻmak koʻrsatilmoqda.

Akbarjon Xoʻjamuratovning taʼkidlashicha, mahalla aholisi azaldan mehnatkash va halol peshona teri orqali daromad topib kelmoqda. Oʻzi ham Bosuv mahallasida tugʻilib, voyaga yetgan hokim yordamchisi oldiga qoʻyilgan vazifalarni sidqidildan bajarish va mahalladoshlarining ishonchini oqlash uchun bor kuch va bilimini sarflab harakat qilmoqda.

Hokim yordamchilarining zimmasiga kambagʻallikni qisqartirish va aholining yashash sharoitini yaxshilash bilan bir qatorda yuksak bilim va tashabbuskorlik asosida ish olib borib, mahalladoshlarining ishonchini oqlashdek yuksak masʼuliyatli burch va vazifalar yuklatilgan. Yangi tayinlangan barcha hokim yordamchilariga bu borada omadlar tilaymiz.

F. Eshimbetova.