Baxtiyor bolalik madhi

Bundan ikki yil oldin endi maktab ostonasidan hatlaydigan bolakay Mangʻit shahridagi Bolalar sport majmuasida boʻlib oʻtgan istiqlol bayrami tantanasida baxtiyor bolalik haqida joʻshib qoʻshiq kuylaganida, qoʻshiq ohangiga mos qalbidagi tugʻyonlarini harakatlari bilan ham ifodalashga intilganida tomoshagohga yigʻilganlarning barchasini hayratga solgan, jajjigina vujudidagi ona yurtga muhabbati, baxtiyor zamonasini sidqidildan kuylashga intilishi havasini keltirgan edi.

Ilk chiqishi bilan koʻpchilikning eʼtiborini qozongan bu jajji qoʻshiqchi hozir 36-umumtaʼlim maktabining 3-sinf oʻquvchisi, iqtidorli ashulachi sifatida koʻpchilikka tanilib ulgurgan Otabek Rahimovdir.

Ikki yildan beri tumanimizda, Qoraqalpogʻiston Respublikasi miqyosida oʻtkazilib kelinayotgan ommaviy tadbirlarda kuylagan qoʻshiqlari barchaga birdek manzur boʻlib kelayotgan Otabekdagi bu iqtidorli sezib, eʼtibor bergan odam - u tarbiyalangan 4-sonli maktabgacha taʼlim muassasasi xodimi, oʻz ammasi Nasiba boʻldi.

U Otabek bilan erinmay shugʻullandi, qobiliyatini rivojlantirish uchun harakat qildi. Bogʻcha musiqa pedagog-tarbiyachisi koʻmagida yoshi va ovoz imkoniyatiga mos qoʻshiqlar oʻrgatdi. Keyinchalik uning ijrochilik mahoratini sezgan tuman Madaniyat va sport ishlari boʻlimi xodimlari u bilan jiddiy shugʻullanishdi.

Otabek Rahimov 7 yoshida Qoraqalpogʻiston miqyosidagi ommaviy bayram tantanalarida baxtiyor bolalik, ona Vatanga muhabbat tuygʻularini tarannum etuvchi ajoyib qoʻshiqlari bilan koʻpchilikning eʼtiboriga tushdi. U mana bir necha yildirki, tumanimizda muhim sanalarga bagʻishlab oʻtkaziladigan barcha tadbirlarda faol qatnashadi. Tomoshabinlar uning chiqishlarini guldiros qarsaklar bilan olqishlashganida koʻngli togʻday yuksaladi. Yangi-yangi qoʻshiqlar yaratish ishtiyoqi tugʻiladi koʻnglida.

Joriy yilning yoz fasli Otabek uchun omadli keldi. U 9-sonli Bolalar musiqa va sanʼat maktabiga oʻqishga qabul qilindi. 15-avgust kuni Nukus shahrida mustaqilligimizning 23-yilligi va "Sogʻlom bola yili”ga bagʻishlab oʻtkazilgan estrada qoʻshiqchilari, bolalar qoʻshiqlari ijrochilari va folklor jamoalari Respublika koʻrik-tanlovida "Bolalik”, "Yoronlar-ey” nomli qoʻshiqlarini mahorat bilan ijro etib, faxrli uchinchi oʻrinni yengib oldi. Respublikamizning barcha tumanlari va Nukus shahridan koʻplab isteʼdodli qoʻshiqchilar qatnashgan mazkur tanlovda Otabekning ijrosini hakamlar hayʼati yuqori baholashdi, mukammal qoʻshiqlar yaratish borasida maslahatlar berishdi.

– Bu xushxabar oilamizni ulkan quvonchga beladi, - deydi Otabekning dadasi Oybek Ismoilov. – Yoshligimda men ham xalq cholgʻu asboblarini chalishga qiziqib, musiqa va sanʼat maktabida oʻqigan edim. Keyinchalik hayotim tadbirkorlik bilan tutashib ketdi. Oʻgʻlimning sanʼatga qiziqqanidan, qoʻshiqlari elga manzur boʻlayotganidan judayam quvonaman.

Ota-ona uchun farzandi yutuqlarini koʻrishdan-da ortiq baxt bormi? Yana u tengilar hali koʻcha changʻitib oʻynab yurgan davrida!

Otabek Rahimov erishgan muvaffaqiyatlarda u bilan sidqidildan shugʻullanib, sanʼatning sehrli olamiga yetaklab, kamolot pillapoyalaridan ildam odimlashiga koʻmaklashayotgan tuman Madaniyat va sport ishlari boʻlimi xodimlarining ham munosib hissalari bor. Ayniqsa, Sardorbek Kamolov unga mos sheʼrlar topib, musiqa bastalab berib, ijrosi mukammal boʻlishi uchun tinimsiz birgalikda mashqlar qilayapti. Otabek ijro etadigan qoʻshiqlarning koʻpchiligining musiqasini Sardorbek Kamolov bastalagan.

Yosh boʻlsa-da el olqishini olayotgan Otabek Rahimovning barkamol sanʼatkor boʻlib yetishishini tilab qolamiz.

Oygul RAJABOVA.