YaNGI YIL MUBORAK, AZIZLAR!
Aziz yurtdoshlar! Muhtaram otaxon va onaxonlar, munis va mehribon opa-singillar, qondosh va qarindosh aka-ukalar!
Xalqimizning kelajagi, ishonchi va tayanchi boʻlgan navqiron yoshlar!
Avvalo, barchamizning hayotimizda yangi sahifa ochib, har birimizning qalbimizda yangi orzu-niyatlar uygʻotib, ona Vatanimizga kirib kelayotgan Yangi – 2022-yil muborak boʻlsin. Siz azizlarga yuksak ehtirom va hurmat ila ezgu tilaklarimizni izhor etamiz.
Azizlar, hayot davom etar ekan, albatta, sinovlar bor, qiyinchiliklar bor. Shuning uchun ham donishmand xalqimiz: “Yil yilga oʻxshamaydi, har yilning oʻz sir-sinoati bor”, deb bejiz aytmagan. Buni shu kunlarda dildan his etmoqdamiz. Tarix sahifalaridan joy olayotgan 2021-yilda ham avvalgi yildagi kabi koronavirus degan koʻrinmas yov xavf-xatarini boshimizdan kechirdik. Albatta, bu xavf-xatarlarni bartaraf etish uchun davlatimiz, hukumatimiz barcha choralarni koʻrdi, xalqimiz bir tan-u bir jon boʻlib jipslashdi. Nuroniy otaxon va onaxonlarimizning duolari bilan yuksak onglilik hamda mustahkam intizom tufayli bu sinovni, inshaalloh, yengib oʻtmoqdamiz.
Butun mamlakatimiz xalqi kabi amudaryoliklar ham sinovlar qarshisida sinmay, matonat va mardlik namunalarini koʻrsatayotganlari qalbimizga quvonch va gʻurur bagʻishlaydi. Nihoyatda murakkab kelgan, qurgʻoqchilik, suv tanqisligi, harorat keskin koʻtarilib, jazirama issiq havo kuzatilgan 2021-yilda tuman ishlab chiqarishining barcha sohalarida muvaffaqiyatlarga erishildi. Mirishkor dehqonlarimiz – chorvador-u gʻallakor, paxtakor va pillakorlar, sohibkor-bogʻbonlar, tadbirkor va ishbilarmonlar erishgan yutuqlar solnomasi har bir koʻngilga xotirjamlik, ertangi kunga yuksak ishonch bagʻishlaydi. Chunki bu yutuqlarda xalqimizning obod va farovon hayoti namoyon.
Yurtimizga Yangi yil kirib kelayotgan tarixiy lahzalarda bilimga chanqoq, intiluvchan, dunyo yoshlari bilan bellashishga qodir amudaryolik yoshlarning qalblarga nur va surur bagʻishlovchi ezgu orzulari yoʻlida dadil olgʻa tashlayotgan har bir qadami nafaqat Amu eliga, balki jonajon Oʻzbekistonimiz taraqqiyotiga, kelajagiga betakror qudrat bagʻishlashiga chin dildan ishonamiz.
Aziz va qadrli yurtdoshlar!
Ilohim, dilimizdagi jamiki olijanob tuygʻularimiz, orzu-intilishlarimiz roʻyobga chiqsin! Xalqimiz tinch va xotirjam, Vatanimiz sarhadlari daxlsiz, osmonimiz musaffo boʻlsin. Kirib kelayotgan 2022-yil har bir xonadonga mehr-oqibat, koʻngillarga xotirjamlik, yurtimizga fayz-baraka, tan-u jonlarimizga sogʻlik baxsh etsin!
Yangi yil muborak, azizlar!
Yangi yil har qalbda Quyoshday balqsin,
Xavf-u xatarlardan yiroq boʻlsin dil.
Ezgu niyatlarga poyidor xalqim,
Umringizga porloq chiroq boʻlsin yil!
"Taraqqiyot koʻzgusi" gazetasi tahririyati
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
