YaShIRIN TsEX TAShKIL QILGAN “TADBIRKOR” FAOLIYaTIGA ChEK QOʻYILDI

Koʻp yillar davlat ishida ishlagan Mohigul (ismlar oʻzgartirilgan) boshqalarga havas qilib, savdo-sotiqqa qoʻl urib koʻrdi. Oʻzi yashaydigan joyga yaqin boʻlgan bozorda mayda-chuyda sotib, hech koʻngli toʻlmadi.

Shunday kunlarning birida dorixonadan tibbiyot uchun moʻljallangan spirt sotib olib, qoʻlbola aroq tayyorlab koʻrdi. Uyidagi noutbukda qalbaki aktsiz markalar ishladi va rangli printerda chiqarib, aroq shishalarining qopqogʻiga yopishtirdi. Qarasa binoyidek, haqiqiysiga oʻxshadi. Dastlabki tayyorlagan “mahsulot”larini oziq-ovqat doʻkonida savdo qiladigan tanishi Durdonaga berib, “xaridorgir”ligini sinovdan oʻtkazdi. Shundan soʻng, omadi chopib, unga buyurtmalar kelib tusha boshladi. Moʻmay daromadga ega boʻlayotgan Mohigul darhol ishga kirishdi va kerakli jihozlarni sotib olib, noqonuniy tarzda yashirin tsex tashkil qildi.

Shu tariqa ishga kirishib, 0,5 litr hajmdagi 112 shisha va 0,45 litr hajmdagi 68 shisha, jami 180 shishaga qoʻlbola usulda tayyorlangan aroq mahsulotlarini quyib, qopqoq bilan yopdi. Ushbu aroqlarga davlat standartlariga javob bermaydigan qalbaki aktsiz markalarni yelimlab yopishtirdi. Qoʻlbola usulda tayyorlangan “Qaratau” aroq mahsulotlarining har bir shishasini 18.500 soʻmdan jami 3 mln. 330 ming soʻmga qonunga xilof ravishda sotdi.

Oʻzining ushbu jinoiy harakatlari bilan Oʻzbekiston Respublikasi JKning  176-moddasi 1-qismida koʻrsatilgan jinoyatni sodir qilgan Mohigul “tadbirkor”ligini uzoq davom ettira olmay qoʻlga olindi. Uning uyi koʻzdan kechirilganda 2078 dona qalbaki aktsiz markalar topilgani sababli Oʻzbekiston Respublikasi JKning 176-moddasi 2-qismi  “a” bandida koʻrsatilgan jinoyatni ham qasddan sodir qilganlikda ayblandi. Oson yoʻl bilan moʻmay daromad topishni koʻzlagan soxta “tadbirkor” barcha jinoyatiga yarasha jazoga tortildi.

U.Orazbayeva, Nukus shahar IIO FMB 1-son IIB  huzuridagi Tergov guruhi tergovchisi.