TARGʻIBOT TADBIRI OʻTKAZILDI

Davlatimiz rahbarining “Ichki ishlar organlari xodimlarini tayyorlash, qayta tayyorlash va malakasini oshirish tizimini tubdan takomillashtirish chora-tadbirlari toʻgʻrisida”gi Qaroriga muvofiq mamlakatimizda faoliyat yuritayotgan Ichki ishlar vazirligi akademik litseylarida oʻquv-tarbiya ishlarini yuksak pogʻonaga koʻtarish va shu asosda bitiruvchilarning yetuk, bilimdon mutaxassislar boʻlib yetishiga eʼtibor qaratilmoqda.

Qarorga muvofiq 2020-2021 oʻquv yilidan boshlab Oʻzbekiston  Respublikasi Ichki ishlar vazirligi  Akademiyasining kunduzgi shakliga qabul faqat Ichki ishlar vazirligi akademik litseylari, harbiy akademik litseylar bitiruvchilari, shuningdek, ichki ishlar organlari xodimlari tarkibidan amalga oshiriladigan boʻldi. Demak, kelgusida ichki ishlar organlarida faoliyat yuritishni istaydiganlar umumiy oʻrta taʼlim maktabining 9-sinfini bitirgach, avval Ichki ishlar vazirligi akademik litseyini tugatib, keyin ichki ishlar vazirligi Akademiyasida taʼlim olishlari mumkin.

Oʻzbekiston Respublikasi Ichki ishlar vazirligining Qoraqalpoq akademik litseyining asosiy maqsadi ham malakali, yuksak professional tayyorgarlikka ega ichki ishlar xodimlarini va vazirlik Akademiyasiga oʻqishga kirishni istovchi yoshlarni tayyorlashdan iborat.

Ushbu muassasada oʻqish muddati 2-yil boʻlib, oʻqishga kirishni xohlovchilardan arizalar 1-fevraldan 15-aprelga qadar shahar va tumanlar Ichki ishlar boʻlimlarida qabul qilinadi.

Bu haqda umumiy oʻrta taʼlim maktablarining 9-sinflari bitiruvchilariga keng tushuncha berish maqsadida 20-dekabr kuni Amudaryo tumani Madaniyat boʻlimi tomoshalar zalida targʻibot tadbiri boʻlib oʻtdi.

Tadbirga tumanimizda faoliyat yuritayotgan umumiy oʻrta taʼlim maktablarining 9-sinflari oʻquvchilari ishtirok etdilar. Ularga tuman Ichki ishlar boʻlimi boshligʻi oʻrinbosari, mayor Baxtiyor Oʻrozov, Oʻzbekiston Respublikasi Ichki ishlar vazirligining Qoraqalpoq akademik litseyi direktori, podpolkovnik Uchqun Qodirovlar akademik litseyga qabul qilish tartibi xususida tushunchalar berdilar.

Maʼruzalarda akademik litseyga qabul asosan uch bosqichda olib borilishi  – dastlabki tanlovda yakka tartibda suhbat oʻtkazish, nomzodlarning induvidual-psixologik xususiyatlarini oʻrganish, tibbiy komissiya koʻrigidan oʻtkazish, dastlabki tanlov boʻyicha nomzodlarning shaxsiy hujjatlar yigʻma jildini va tanlov  natijalarini oʻrganish hamda  ularni  maxsus – professional tanlovga qoʻyish  masalasini hal etish nazarda tutilganligi, ikkinchi bosqichda umumjismoniy tayyorgarlik darajasini  aniqlash, keyinchalik esa yakka  tartibdagi yakuniy suhbatni baholash amalga oshirilishi, uchta tanlov ham bir necha xil sinovlarni oʻz ichiga olganligi taʼkidlab oʻtildi.

Shuningdek, Oʻzbekiston Respublikasi Ichki ishlar vazirligining akademik litseylari qatori Qoraqalpoq akademik litseyi bitiruvchilari shu sohada ishga,  Ichki ishlar Akademiyasiga oʻqishga kirishda bir qator imtiyozlarga ega boʻlishi xususida batafsil maʼlumotlar berildi.

Oʻquvchilar maʼsullarga oʻzlarini qiziqtirgan savollarni berib, batafsil javoblar oldilar.

Targʻibot tadbiri oʻquvchilarning mazkur sohaga qiziqishlarini yana ham oshirdi.

Oygul RAJABOVA.