GENDER ZOʻRAVONLIKKA JAVOBAN XIZMAT KOʻRSATIShNING STANDART OPERATsION ISh TARTIBLARI BOʻYIChA SEMINAR-TRENING OʻTKAZILDI

Yaqinda tuman Mahalla va oilani qoʻllab-quvvatlash boʻlimi binosida oʻtkazilgan mazkur seminar-treningda 49 ta  fuqarolar yigʻinlari raislarining oila, xotin-qizlar va ijtimoiy-maʼnaviy masalalar boʻyicha oʻrinbosarlari ishtirok etishdi. Mashgʻulotni tuman Mahalla va oilani qoʻllab-quvvatlash boʻlimi boshligʻining birinchi oʻrinbosari Muqaddas Beknazarova,  mutaxassis-trenerlar Qoraqalpogʻiston Respublikasi Mahalla va oilani qoʻllab quvvatlash vazirligi ijtimoiy himoyaga muhtoj oilalar bilan ishlash boʻlimi boshligʻi Madina Turdimurodova, Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori Gavhar Chimbaychiyevalar olib borishdi.

Seminarda taʼkidlanganidek, 2020-yilda ayollarga nisbatan zoʻravonlikning har qanday turiga barham berish, sogʻliqni saqlash, ichki ishlar organlari, psixologik va ijtimoiy xizmatlar yoʻnalishlari boʻyicha standart operatsion ish tartiblari ishlab chiqildi. Bu boʻyicha qoʻllanmalar Qoraqalpogʻiston Respublikasi, Samarqand va Buxoro viloyatlarida amalga oshirish boʻyicha ikki bosqichli treninglar va ularning monitoringlaridan keyin 2021-yilda chop etildi.

Idoralararo Standart operatsion ish tartiblarini respublika miqyosida amaliyotga tatbiq etish maqsadida 1-3-dekabr kunlari davomida Oʻzbekiston Respublikasi Gender tenglikni taʼminlash masalalari boʻyicha komissiyasi, Birlashgan Millatlar Tashkilotining Aholishunoslik Jamgʻarmasi bilan hamkorlikda, Buyuk Britaniya hukumatining moliyaviy koʻmagi ostida Toshkent shahrida sogʻliqni saqlash, ichki ishlar organlari, psixologik va ijtimoiy xizmatlar yoʻnalishlari boʻyicha mutaxassis-trenerlarni tayyorlash yuzasidan treninglar ham oʻtkazilgan edi.

Tadbirda tashkilot markaziy tuzilmalar va 14 ta hududiy boshqarmalardan mutaxassis-trenerlar koʻrsatilgan mezonlar boʻyicha saralab olindi. Ularga treningda olingan bilimlar asosida kalendar rejalar boʻyicha hududlarida oʻquv mashgʻulotlarini tashkil etish va tushunchalar berish vazifasi yuklatildi. Shunga koʻra Qoraqalpogʻiston Respublikasidan mana shu seminarda ishtirok etgan 8 nafar soha vakillari tomonidan oʻz yoʻnalishlari boʻyicha hududlarda xuddi shunday treninglar tashkil qilinmoqda.  

Mazkur treningda qatnashchilar shu kabi maʼlumotlar bilan birga gender va gender zoʻravonligi boʻyicha asosiy tushunchalar, gender zoʻravonlikning jabrlanuvchisi kimligi, gender zoʻravonlikning sabablari va oqibatlari, bunday holatlarga javoban choralar taqdim etish mexanizmlari toʻgʻrisidagi taʼlim asoslari bilan tanishdilar. Trenerlar jabrlanuvchi bilan ishlashda kompleks yondashuvning ahamiyatiga alohida toʻxtalib oʻtdilar.

Seminar ishtirokchilari gender zoʻravonlik jabrlanuvchisi bilan bevosita ishlashda  ijtimoiy xizmat taqdim etuvchilar uchun ishlab chiqilgan va yetkazilgan hujjatdan foydalanish haqida batafsil maʼlumot va tushunchalarga ega boʻldilar.

Gavhar ChIMBAYChIYeVA, Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori.