KASBLAR FESTIVALI OʻTKAZILDI

Umumiy oʻrta taʼlim  maktablari oʻquvchilarini kasbga yoʻnaltirish, ularning biror kasbga mehr qoʻyilishiga va shu kasbni egallash uchun  chuqur bilim olishiga erishish taʼlim tizimining asosiy  vazifalaridandir. Chunki inson hayotda oʻz oʻrnini kasbiy faoliyati, xulq-atvori va yaqinlariga, yurtiga mehr-muhabbati orqali topadi.

Shu boisdan ham tumanimizdagi barcha umumiy oʻrta taʼlim maktablari yuqori sinf oʻquvchilari orasida mehnati bilan elga tanilgan,kasbini ardoqlab, eʼzozlab xizmat qilayotgan insonlar bilan uchrashuvlar oʻtkazilib, ishlab chiqarish korxonalariga sayohatlar uyushtirib turiladi.

Shu yilning 10-dekabrida Choykoʻl ovulidagi 22-sonli maktabda ham “Kasbim – kelajagim” deb nomlangan kasblar festivali boʻlib oʻtdi.

Ushbu muassasada 689 nafar oʻquvchilar taʼlim-tarbiya olishmoqda. Shuning 130 nafari 9-11-sinflar  oʻquvchilaridir.

Tadbirda ular toʻla qamrab olindi hamda tuman xalq taʼlimi boʻlimi mudiri Akmal Ismoilov, boʻlim psixolog-metodistlari Jasur Otajonov, Tatyana Pirlepesovalar, maktab oʻqituvchilaridan tashqari 11-,18-,26-, 28-, 33-, 42-, 59-, 65-maktablar direktorlari, psixologlari va yuqori sinflarining oʻquvchilari ishtirok etdilar.

Oʻquvchilar ushbu kasblar festivalida mazkur maktabda faoliyat koʻrsatayotgan toʻgaraklar faoliyati bilan yaqindan tanishtirildi. Musiqa, kitobxonlik, kompyuter savodxonligi toʻgaraklari, shuningdek, sportning voleybol, futbol boʻyicha tashkil etilgan toʻgaraklari faoliyati oʻquvchilarda katta qiziqish uygʻotdi. Ayniqsa “Barkamol avlod” bolalar maktabi bilan hamkorlikda tashkil etilgan tikuvchilik toʻgaragi aʼzolari tikkan kiyimlarning oʻziga xos bezaklar bilan zeb berilgani barchaning diqqatini tortdi.

Maktabga tashrif buyurgan ovulda faoliyat yuritayotgan duradgorlik, payvandlash, avtomobillarga texnik xizmat koʻrsatish shohobchasidan, goʻzallik salonidan va oʻgʻil bolalar sartaroshxonasidan tashrif buyurgan turli kasb egalarining kasb-hunarlar haqidagi suhbati oʻquvchilarning kasblar haqida fikr-oʻylarini boyitdi.

Kasblar festivalida tumandagi 1-sonli va 2-sonli kasb-hunar maktablarida oʻqitilayotgan kasb-hunarlar koʻrgazmasi namoyish etildi. Shuningdek, “Barkamol avlod” bolalar maktabi amaliy sanʼat toʻgaragi aʼzolari ishlagan kulolchilik naqqoshlik, ganjkorlik ishlari namunalari, yumshoq oʻyinchoqlar, kiyimlar, bezaklar, quroqlarni koʻzdan kechirgan oʻquvchilar xalqimiz asrlar boʻyi asrab-avaylab kelayotgan qadimiy kasb-hunarlar bugungi kunda oʻz ahamiyatini yoʻqotmaganini yurakdan his qildilar. Shuningdek, oʻquvchilar ishlagan zamonaviy aviamodellar namoyishi ham barchaning diqqatini tortdi.

Tadbirda kasbning yaxshi-yomoni boʻlmasligi, uni chuqur egallash uchun zamonaviy bilimlar bilan qurollanish zarurligi taʼkidlandi.

Koʻrgazma soʻngida oʻquvchilar tomonidan tayyorlangan kontsert dasturi namoyish etildi.

Kasblar festivali oʻquvchilarga unutilmas taassurotlar hadya etdi.

Shu yilning 11-dekabrida tumanimiz umumiy oʻrta taʼlim maktablarining yuqori sinflari oʻquvchilarining tikuvchilik kasbiga qiziqish bildirgan 141 nafarining “Tamara tekstil” masʼuliyati cheklangan jamiyatiga sayohati tashkil etildi.

Sayohat davomida oʻquvchilar u yerda amalga oshirilayotgan ishlar bilan, yaratilgan sharoitlar bilan yaqindan tanishdilar.

Ushbu tadbirda ishtirok etgan tuman Xalq taʼlimi boʻlimi psixolog metodistlari Jasur Otajonov, Tatyana Pirlepesovalar kasb-hunarga mehr qoʻyish, kasb ustasi boʻlish – insonni ulugʻlashi haqida gapirdilar. Sayohat oʻquvchilarga juda manzur boʻldi.

Oygul RAJABOVA.