BAXTIYoR VA FAROVON HAYoTIMIZ KAFOLATI

Oʻzbekiston Respublikasi Konstitutsiyasining 53-moddasiga koʻra bozor munosabatlarini rivojlantirishga qaratilgan Oʻzbekiston iqtisodiyotining negizini xilma-xil shakllardagi mulk tashkil etadi.

Davlat isteʼmolchilarning huquqi ustunligini hisobga olib, iqtisodiy faoliyat, tadbirkorlik va mehnat qilish erkinligini, barcha mulk shakllarining teng huquqliligini va huquqiy jihatdan bab-baravar muhofaza etilishini kafolatlaydi. Xususiy mulk boshqa mulk shakllari kabi daxlsiz va davlat himoyasidadir. Mulkdor faqat qonunda nazarda tutilgan hollarda va tartibdagina mulkidan mahrum etilishi mumkin. Bu norma har fuqaroning mulkdor boʻlishi va tadbirkorlik faoliyati bilan shugʻullanish huquqini kafolatlaydi.

Tadbirkorlik faoliyatini olib borish uchun davlatimiz tomonidan tadbirkorlarga keng yoʻl ochib berildi.

Jumladan, amaldagi “Tadbirkorlik faoliyati erkinligining kafolatlari toʻgʻrisida”gi qonunga asosan tadbirkor oʻziga tegishli mol-mulkka egalik qilish, undan foydalanish va uni tasarruf etish, mustaqil ravishda ishlab chiqarish dasturini shakllantirish, mahsulot yetkazib beruvchilarni va oʻz mahsulotining isteʼmolchilarini tanlash, tadbirkorlikdan cheklanmagan miqdorda daromad olish va uni oʻz ixtiyoriga koʻra tasarruf etish, oʻz mahsulotini ishlab chiqarish, mustaqil ravishda belgilanadigan narxlar va tariflar boʻyicha yoki shartnoma asosida realizatsiya qilish, binolar, inshootlar, uskunalar va boshqa mol-mulkni olish yoki ijaraga olish, belgilangan tartibda tashqi iqtisodiy faoliyatni amalga oshirishi mumkin.

Shuningdek, ushbu qonunga koʻra davlat iqtisodiy faoliyat, tadbirkorlik erkinligini, barcha mulk shakllarining teng huquqliligini va huquqiy jihatdan bab-baravar muhofaza etilishini taʼminlaydi.

Konstitutsiyamiz  barcha fuqarolar, shu jumladan, tadbirkorlar huquqlarini kafolatlovchi muhim hujjatdir. 8-dekabr – Konstitutsiyamiz qabul qilingan kun barchaga qutlugʻ boʻlsin!

A.TOJIBOYeV,

tuman Yuridik Xizmat koʻrsatish markazi bosh yuriskonsulti.