BOSh QOMUSIMIZ QABUL QILINGAN KUN MUNOSABATI BILAN TANTANALI TADBIR OʻTKAZILDI
Har bir davlat oʻzining taraqqiyot va rivojlanish yoʻlini oʻzining Asosiy Qonunida mustahkamlab qoʻyadi. 1992-yilning 8-dekabrida respublika Oliy Kengashining sessiyasida mustaqil davlatimizning Asosiy qonuni – Konstitutsiyasi qabul qilingan edi.
Mamlakatimiz mustaqilligining ilk davrlarida Qabul qilingan Konstitutsiyamizda shaxs, jamiyat va davlat oʻrtasidagi munosabatlarda oʻzaro huquq va majburiyatlar hamda ularning kafolatlari belgilab berilgan.
Bosh Qomusimiz jinsi, millati, tili, dini va ijtimoiy kelib chiqishidan qatʼiy nazar, yurtimizda istiqomat qiluvchi barcha fuqarolarni tengligining kafolatlanishini eʼtirof etadi.
Shu boisdan Asosiy Qonunimizni ulugʻlab, har tomonlama chuqur oʻrganib, unga izchil amal qilish barchaning sharafli burchidir.
Fuqarolar erkin, baxtli va osoyishta yashashi, munosib sharoitlarda mehnat qilishi, keksaygan chogʻida ijtimoiy taʼminot olish kabi huquqlari kafolati hisoblanmish Konstitutsiyamiz qabul qilingan kun har yili yurtimizda ulkan tantalar bilan nishonlanadi.
Joriy yilning 7-dekabr kuni tuman Madaniyat boʻlimi tomoshalar zalida “Konstitutsiya – baxtimiz poydevori” deb nomlangan tadbir ham aynan ushbu sanaga bagʻishlandi.
Tadbirga tuman hokimligi masʼul xodimlari, huquqiy muhofaza qiluvchi organlari, korxona, tashkilotlar rahbarlari, mehnatda ulkan yutuqlarga erishayotgan yoshlar, jamoatchilik faollari taklif etildi.
Tuman hokimi Sultonboy Yoʻldoshev soʻzga chiqib, mamlakatimizda nishonlanayotgan muhim sana – Konstitutsiyamiz qabul qilinganligining 29 yilligi bilan barchani qizgʻin qutladi va mamlakatimizda istiqomat qilayotgan fuqarolar hayotida ushbu muhim hujjatning nechogʻlik ulkan ahamiyatga ega ekanligi xususida gapirdi. Barchani shunday tinch va osoyishta, dorilomon hayotni qadrlab, oʻzaro ahillikda yashashga chaqirdi, bugungi yurtimizda amalga oshirilayotgan islohotlarni qoʻllab-quvvatlab, ularda fidoyilik bilan ishtirok etishga chaqirdi.
Shundan soʻng tuman Adliya boʻlimi boshligʻi Moʻʼminjon Matyusupov soʻzga chiqib, yigʻilganlarni yurtimiz taraqqiyotining poydevori, tinch va farovon kunlarimiz asosi boʻlgan asosiy qonunimiz – Konstitutsiyamiz qabul qilinganligining 29 yillik bayrami bilan qizgʻin qutladi.
Shundan soʻng Oʻzbekiston Qoraqalpogʻiston Respublikalari davlat madhiyalari yangradi va bayram tantanalari boshlandi.
Bosh Qomusimiz – bu istiqlol va mustaqil Oʻzbekiston ramzi, gʻurur-iftixori, shu zaminda istiqomat qilayotgan, millati, dini, irqi va tilidan qatʼi nazar, barcha uchun mustahkam himoya, fuqarolik jamiyati istiqbolini belgilab beruvchi dasturilamal hujjatdir.
Oʻtgan qisqa davrda jamiyatimizning siyosiy-huquqiy va ijtimoiy-iqtisodiy qiyofasi, odamlarimizning dunyoqarashi butunlay oʻzgargani, har bir yurtdoshimiz mamlakatimizning taraqqiyotiga munosib hissa qoʻshayotgani Bosh qomusimizning hayotbaxsh qudrati va ulkan salohiyatidan dalolat beradi.
Ana shu ulkan salohiyatga tayanib, xalqimiz bugungi kunda murakkab sinovlarni mardona yengib, yurtimizda erkin, obod va farovon hayot – yangi Oʻzbekistonni barpo etish yoʻlida fidokorona mehnat qilmoqda.
Bayram tadbiridagi musiqiy dasturdan oʻrin olgan yurtimizni, baxtiyor hayotni, tinchlikni madh etuvchi kuy-qoʻshiqlar, raqslar barchaga zavq bagʻishladi.
Tuman Madaniyat boʻlimi xodimi Nasiba Eshchanova stsenariysi asosida tayyorlangan bayram dasturi ishtirokchilarga manzur boʻldi.
Bosh qomusimiz – Oʻzbekiston Respublikasi Konstitutsiyasi qabul qilingan kunga bagʻishlangan bayram tadbirlari tumandagi muassasa, korxona va tashkilotlarda, ovul va mahallalarda davom etmoqda.
Oygul RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
