YoShLAR BILAN UChRAShUVDA HUQUQBUZARLIKLARNING OLDINI OLISh MASALALARI MUHOKAMA ETILDI

Yoshlar oʻrtasida jinoyatchilik va huquqbuzarliklarning oldini olish – bugungi kundagi muhim masalalardan biri hisoblanadi. Shu bois yoshlarning maʼnaviy-axloqiy tarbiyasiga jiddiy yondoshish, ularning huquqiy ongini oshirish, turli huquqbuzarlik, jinoyatchilik, ekstremizm va aqidaparastlik kabi illatlarga berilishining oldini olish kabilarga alohida eʼtibor qaratilib kelinmoqda.

25-noyabr kuni tuman Ichki ishlar boʻlimi binosida ichki ishlar organlari Probatsiya guruhi masʼullari tomonidan shu masalalarga bagʻishlangan uchrashuv oʻtkazildi. Yigʻilishda tuman Ichki ishlar boʻlimi boshligʻining oʻrinbosari Muxtor Rahmatullayev, Yoshlar ishlari agentligi  tuman boʻlimi xodimi Sardor Quranboyev, tuman Ichki ishlar boʻlimi huquqbuzarliklar profilaktikasi boʻlinmasi katta inspektori Ulugʻbek Qoʻchqorovlar ishtirok etdilar.

Uchrashuv davomida asosan Probatsiya guruhi nazorati ostida jazo oʻtayotgan yoshlarning boʻsh vaqtlarini mazmunli oʻtkazish, ularning bandligini taʼminlash, moddiy tomondan qoʻllash va kasbga yoʻnaltirish orqali sogʻlom turmush tarziga qaytarish hamda ular tomonidan qayta jinoyat sodir etilishi oldini olishga doir masalalar muhokama etildi.

Taʼkidlanganidek, hozirgi kundagi globallashuv jarayonida mamlakatlar oʻrtasida oʻzaro aloqalar kengaygan, oʻzaro taʼsirlar chegara bilmagan davrda terrorizm va ekstremizm barcha xalqlar uchun birday tahdid solmoqda. Bugungi murakkab mafkuraviy jarayonlarni ilmiy-amaliy jihatdan atroflicha tahlil qilish va baholash, oʻsib kelayotgan yosh avlod qalbiga milliy tafakkurni, maʼnaviyatni va sogʻlom dunyoqarash asoslarini mustahkamlash alohida ahamiyat kasb etadi.

Uchrashuvda yoshlarning boʻsh vaqtlarini mazmunli tashkil etish, bandligini taʼminlash borasida amalga oshirilgan ishlar toʻgʻrisida maʼlumot berildi. “Yoshlar daftari”ga 6 753 nafar yoshlar roʻyxatga olingani, koʻrilgan amaliy chora-tadbirlar natijasida 6 599 nafar yoshlar daftardan chiqarilgani, hozirda tuman boʻyicha 44 nafar yoshlar “Yoshlar daftari”da qolganligi qayd etib oʻtildi.

“Yoshlar daftari”ga kiritilgan yoshlarni qoʻllab-quvvatlash maqsadida tashkil etilgan maxsus jamgʻarma hisobidan 1551 nafar yoshlarni ijtimoiy qoʻllab-quvvatlash uchun 1 mlrd 60 mln. soʻm mablagʻ sarflangani, 21 nafar yoshlarga bir martalik moddiy yordam uchun 20,7 mln. soʻm, 189 nafar yoshlarga asbob-uskunalar va mehnat qurollari xarid qilish uchun 307,8 mln. soʻm, 76 nafar yoshlarga haydovchilik guvohnomasi uchun 106,3 mln. soʻm, 12 nafar yoshlarga toʻlov-kontrakt summasining 50 foiz qismi 51,5 mln. soʻm, 2 nafar yoshlarga safarbarlik chaqiruv rezerifi xizmati badali 10,5 mln. soʻm ajratib berilgani maʼlum qilindi. Shuningdek, “Yoshlar daftari”dan chiqarilgan yoshlarning 858 nafari doimiy va jamoat ish oʻrinlariga, 318 nafariga 9 mlrd. 617 mln.soʻm imtiyozli kreditlar, 309 nafariga subsidiya, 5114 nafariga “Har bir yoshga – bir gektar” tamoyili asosida 1135 gektar yer maydonlari ajratilgani aytib oʻtildi.

Uchrashuvda maʼruzachilar hozirda mamlakatimizda olib borilayotgan islohotlar haqida hamda yoshlar va voyaga yetmaganlar oʻrtasida huquqbuzarliklarning oldini olish chora-tadbirlari, bu borada qabul qilingan Qonun hujjatlarining mazmun-mohiyati toʻgʻrisida toʻxtalib, huquqiy tushunchalar berishdi. Shu bilan birga muntazam ravishda hamkorlikda targʻibot tadbirlari oʻtkazilayotgani, voyaga yetmaganlar oʻrtasida jinoyatchilikning oldini olish uchun yoshlarning huquqiy madaniyatini oshirish,  mahalla va ota-onalar oʻrtasida doimiy ravishda hamkorlik oʻrnatish lozimligi taʼkidlandi.

Tadbir yakunida huquqbuzarliklarning oldini olish uchun shu kabi huquqiy targʻibot tadbirlarini hamkorlikda muntazam ravishda oʻtkazishga kelishib olindi.

Ozoda Xudoyberganova.