SUDLAR FAOLIYaTI TAKOMILLAShMOQDA

Amudaryo tumanida ham Jinoyat ishlari hamda Fuqarolik ishlari boʻyicha sudlar yangi va zamonaviy koʻrinishdagi binoda faoliyat olib bormoqda. Barcha zarur sharoitlar yaratilgan 2 qavatli sud binosida zamonaviy texnika vositalari imkoniyatlaridan keng foydalanishga alohida eʼtibor qaratilgan. Sudyalarning har biriga hamda xodimlar uchun alohida xonalar, maslahatxona, advokat va prokurorlar uchun ham xonalar ajratilgan boʻlib, buning natijasida ishdagi samaradorlik ortmoqda.  Binoda video konferentsiya aloqasi ham mavjud boʻlib, bu qulaylik masofadan turib sud ishlarini olib borishda qoʻl kelmoqda. Ushbu videokonferentsaloqa tizimi sudning adolat mezonlari asosida faoliyat yuritishiga xizmat qilmoqda.

Joriy yilning oʻtgan 10 oyi davomida Jinoyat ishlari boʻyicha tuman sudiga jami 118 shaxsga nisbatan 80 ta jinoyat ishi kelib tushgan. Shundan 78 shaxsga nisbatan koʻriladigan 60 ta ish koʻrib tamomlangan, 13 shaxsga nisbatan koʻriladigan 10 ish noyabr oyiga qoldirilgan. 57 ishga koʻra 86 shaxsga nisbatan jazo tayinlanib, hukm chiqarilgan. Shuningdek, oʻtgan 10 oyi davomida 52 shaxsga nisbatan yoshlarga oid 30 ta jinoyat ishi koʻrib tamomlandi. Taraflar yarashganligi munosabati bilan 24 shaxsga nisbatan 23 ta ish tugatildi. Sayyor sud majlislarida 28 ta jinoyat ishi koʻrildi.

Undan tashqari, 1193 nafar shaxsga nisbatan 1022 ta maʼmuriy ishlar kelib tushgan edi. Shundan 869 ishga koʻra 1006 nafar shaxsga nisbatan maʼmuriy jazo qoʻllanildi. Ayrimlariga nisbatan qoʻshimcha jazo, yengilroq jazo tayinlangan boʻlsa, ayrimlari tegishli tartibda tugatildi. Sayyor sud majlislarida 332 ta ish koʻrildi.

24-noyabr kuni “Gulzor” mahallasi fuqarolar yigʻini binosida sudyalar ishtirokida targʻibot tadbiri oʻtkazildi. «Korruptsiya rivojlanishga toʻsiq» mavzusidagi ochiq davra suhbati tarzida oʻtkazilgan tadbirda Qoraqalpogʻiston Respublikasi Maʼmuriy sudi sudyasi Rahima Xudoyberganova, Jinoyat ishlari boʻyicha Amudaryo tuman sudi raisi Jasur Oʻrozboyev, Beruniy tumanlararo Iqtisodiy sudi sudyasi Bayram Bekmuradov, Amudaryo tumani prokurori yordamchisi Abbaz Niyozimbetov, Ichki ishlar boʻlimi boshligʻi oʻrinbosari Muxtor Rahmatullayev, Yuridik xizmat koʻrsatish markazi mutaxassisi Mansur Matyusupovlar ishtirok etdilar. Tadbirda mahallada yashovchi fuqarolar ishtirok etdilar.

Suhbat davomida 9-dekabr – Xalqaro korruptsiyaga qarshi kurashish kuni deb belgilangani, korruptsiyaning davlat jamiyat rivojiga toʻsiqligi, korruptsiya bilan bogʻliq jinoyat ishlarning tahlili, bu illatga qarshi kurashish uchun har bir shaxsda immunitet shakillantirish lozimligi xususida soʻz yuritildi. Korruptsiyaga oid huquqbuzarliklarning tizimli sabab va shart-sharoitlarini bartaraf etish, korruptsiyaga qarshi kurashishning ustuvor huquqiy asoslari, huquqiy oqibatlari haqida tushunchalar berildi. Ushbu illatning siyosiy-iqtisodiy, ijtimoiy va madaniy jabhalarda amalga oshirilayotgan islohotlarga hamda jamiyatning rivojlanish negiziga salbiy taʼsiri xususida alohida toʻxtalinib, ushbu illatga har birimiz doimo hushyor boʻlgan holda qarshi kurashishimiz zarurligi taʼkidlandi.

Mamlakatimizda sud-huquq sohasida amalga oshirilayotgan islohotlar sudlarni jazolovchi organ emas, balki inson huquq va erkinliklarini ishonchli himoyalashga xizmat qiladigan mustaqil tizimga aylantirishda muhim ahamiyat kasb etmoqda. Buning natijasida sudlar chinakam maʼnodagi “Adolat qoʻrgʻoni”ga aylanmoqda va fuqarolarning mazkur tizimga boʻlgan ishonchi yanada ortmoqda.

J.Oʻrozboyev, Jinoyat ishlari boʻyicha Amudaryo tuman sud raisi.